ਅਸੀਂ ਤੁਰੇ ਹਾਂ ਸਦਾ, ਦਰਿਆਵਾਂ ਦੇ ਨਾਲ ਨਾਲ ।
ਜਿਉਂ ਤੁਰੇ ਦੁਨੀਆਂ, ਇਛਾਵਾਂ ਦੇ ਨਾਲ ਨਾਲ ।।
ਹੈ ਬਦਨਾਮ ਨੇਤਾ ,ਜੋ ਕੁਰਸੀ ਲਈ ਬਦਲਦੈ ।
ਕੌਣ ਨੀ ਬਦਲਦਾ , ਦੱਸ ਛਾਵਾਂ ਦੇ ਨਾਲ ਨਾਲ ।।
ਮੌਸਮ ਚੋਣਾਂ ਦਾ ,ਜੰਗਲ ਵਿੱਚ ਮੰਗਲ ਹੋ ਗਿਆ।
ਗਿਰਝਾਂ ਸਰਗਰਮ ਨੇ, ਹੁਣ ਕਾਵਾਂ ਦੇ ਨਾਲ ਨਾਲ।।
ਜ਼ਿੰਦਗੀ ਦੀ ਗੱਡੀ ,ਕਦ ਇੱਕਸਾਰ ਹੈ ਚਲਦੀ ।
ਹੌਂਕੇ ਹੰਝੂ ਮਿਲਦੇ , ਚਾਵਾਂ ਦੇ ਨਾਲ ਨਾਲ ।।
ਮੰਜਿਲ ਪਾਉਣ ਲਈ, ਦੀਵਾ ਮੱਥੇ ਦਾ ਜਗਾਈ ।
ਕਦਮ ਮਜਬੂਤ ਰੱਖੀਂ ,ਪੜਾਵਾਂ ਦੇ ਨਾਲ ਨਾਲ ।।
ਹਨੇਰੇ ਤੋਂ ਡਰਕੇ , ਨਿਹੱਥਾ ਨਾ ਸਮਝ ਬੈਠੀਂ ।
ਤਰਕਵਾਦ ਹੈ ਚਲਦਾ, ਬਲਾਵਾਂ ਦੇ ਨਾਲ ਨਾਲ ।।
ਭਵਿੱਖ ਬਚਾਉਣੈ ,ਤਾਂ ਇਤਿਹਾਸ ਸੰਭਾਲ ਰੱਖੀਂ ।
ਵਹਿਣ ਬਦਲ ਜਾਂਦੇ ਨੇ, ਹਵਾਵਾਂ ਦੇ ਨਾਲ ਨਾਲ ।।
ਕਾਬੁਲ ਵਿੱਚ ਜਨਮੇ, ਮਹਿੰਮਾਂ 'ਤੇ, ਰਹਿਣ ਸਦਾ ।
ਹੌਸਲੇ ਬੁਲੰਦ ਨੇ , ਘਟਨਾਵਾਂ ਦੇ ਨਾਲ ਨਾਲ ।।
ਤੈਨੂੰ ਕਿਵੇਂ ਦੱਸਾ ,ਔਲਖ਼ ਦੀ ਕੀ ਪਹਿਚਾਣ ਹੈ ।
ਸਿਰਨਾਵਾਂ ਬਦਲਦੈ , ਥਾਵਾਂ ਦੇ ਨਾਲ ਨਾਲ ।।
94647-70121
ਸੁਖਦੇਵ ਸਿੰਘ ਔਲਖ਼