ਹੁਣ ਬੱਚੇ ਆਪਣੇ ਫ਼ਰਜ਼ਾਂ ਨੂੰ ਸਮਝਣ
ਅਕਸਰ ਆਮ ਸੁਣਨ ਵਿੱਚ ਆਉਂਦਾ ਹੈ, ਮਾਪੇ ਬੱਚਿਆਂ ਨੂੰ ਲਾਲਚ ਦਿੰਦੇ ਸਨ ਕਿ ਜੇ ਤੇਰੇ ਵਧੀਆ ਨੰਬਰ ਆਏ ਮੋਟਰਸਾਈਕਲ ਜਾਂ ਬੁਲਟ ਜਾਂ ਤੇਰੀ ਹਰ ਖੁਆਇਸ਼ ਪੂਰੀ ਕਰਾਂਗੇ ।ਬੱਚੇ ਹੁਣ ਸਮਝ ਜਾਣ ਕਿ ਮਹਾਂਮਾਰੀ ਕਰਕੇ ਬਾਪ ਦੀ ਆਮਦਨੀ ਹੁਣ ਬਿਲਕੁਲ ਵੀ ਨਹੀਂ ਰਹੀ ਹੈ ।ਇੰਨਾ ਸ਼ੁਕਰ ਕਰੋ ਮਾਂ ਬਾਪ ਅਜਿਹੀ ਮਾਰ ਵਿੱਚ ਆਪਣੇ ਪਰਿਵਾਰ ਦਾ ਗੁਜ਼ਾਰਾ ਚਲਾ ਰਹੇ ਹਨ ।ਬੱਚਿਆਂ ਨੂੰ ਜ਼ਿੱਦੀ ਬਣ ਕੇ ਮਾਂ ਬਾਪ ਨੂੰ ਪ੍ਰੇਸ਼ਾਨ ਨਹੀਂ ਕਰਨਾ ਹੈ। ਉਨ੍ਹਾਂ ਨੂੰ ਸੋਚਣਾ ਚਾਹੀਦਾ ਹੈ ਕਿ ਸਾਡੇ ਮਾਂ ਬਾਪ ਆਪ ਤੰਗੀਆਂ ਕੱਟ ਕੇ ਸਾਨੂੰ ਇਸ ਦੌਰ ਵਿੱਚ ਪੜ੍ਹਾ ਰਹੇ ਹਨ। ਪਤਾ ਨਹੀਂ ਕਿਸ ਤਰ੍ਹਾਂ ਮਾਂ ਬਾਪ ਸਕੂਲਾਂ ਦੀ ਫੀਸ ਦੇ ਰਹੇ ਹਨ, ਬੱਚਿਆਂ ਦੀ ਜ਼ਿੰਮੇਵਾਰੀ ਹੁਣ ਵੱਧ ਗਈ ਹੈ ਕਿ ਉਹ ਆਪਣੀ ਖੁਆਇਸ਼ ਪੂਰੀ ਕਰਨ ਲਈ ਮਾਂ -ਬਾਪ ਦੇ ਗਲ ਵਿੱਚ ਗੁੱਠਾਂ ਨਾ ਦੇਣ ।ਹਾਲਾਂਕਿ ਮਾਂ ਬਾਪ ਆਪ ਤੰਗੀਆਂ ਕੱਟ ਕੇ ਬੱਚਿਆਂ ਦੀਆਂ ਫਰਮਾਇਸ਼ਾਂ ਪੂਰੀਆਂ ਕਰ ਦਿੰਦੇ ਹਨ। ਫਿਰ ਵੀ ਸਮਾਂ ਅਜਿਹਾ ਚੱਲ ਰਿਹਾ ਹੈ ਬੱਚਿਆਂ ਨੂੰ ਆਪ ਸੋਚਣਾ ਚਾਹੀਦਾ ਹੈ ਕੀ ਸਾਡੇ ਮਾਂ ਬਾਪ ਕਿਸ ਤਰ੍ਹਾਂ ਸਾਡੀਆਂ ਫੀਸਾਂ ਦੇ ਰਹੇ ਹਨ, ਬੱਚਿਆਂ ਨੂੰ ਮਾਂ ਬਾਪ ਦੇ ਕਹੇ ਮੁਤਾਬਿਕ ਹੀ ਚੱਲਣਾ ਚਾਹੀਦਾ ਹੈ। ਤਾਂ ਜੋ ਘਰ ਵਿੱਚ ਵਧੀਆ ਮਾਹੌਲ ਹੋਵੇ। ਜੇ ਬੱਚੇ ਬਾਰ ਬਾਰ ਮਾਂ ਬਾਪ ਨੂੰ ਕਹਿਣਗੇ ਮੈਨੂੰ ਇਹ ਚੀਜ਼ ਲੈਣੀ ਹੈ , ਇੰਨੇ ਵਧੀਆ ਨੰਬਰ ਆਏ ਹਨ । ਇਹ ਬਿਲਕੁਲ ਗ਼ਲਤ ਗੱਲ ਹੈ ।ਨੰਬਰ ਤੁਸੀਂ ਆਪਣੇ ਆਪ ਲਈ ਲਏ ਹਨ। ਜਮਾਤ ਤੁਸੀਂ ਆਪਣੇ ਆਪ ਲਈ ਪਾਸ ਕੀਤੀ ਹੈ । ਤੁਸੀਂ ਕਿਸੇ ਤੇ ਅਹਿਸਾਨ ਨਹੀਂ ਕੀਤਾ ਹੈ। ਤੁਸੀਂ ਆਪਣੀ ਮੰਜ਼ਿਲ ਸਰ ਕਰਨੀ ਹੈ ।ਫਾਇਦਾ ਤਾਂ ਬੱਚਿਓ ਨੰਬਰਾਂ ਦਾ ਸਿਰਫ ਤੁਹਾਨੂੰ ਹੀ ਹੈ, ਕਿਉਂਕਿ ਤੁਸੀਂ ਕੱਲ੍ਹ ਦੇ ਭਵਿੱਖ ਹੋ। ਇਸ ਕਰਕੇ ਮਾਂ ਬਾਪ ਨੂੰ ਕੋਈ ਵੀ ਚੀਜ਼ ਲਈ ਪ੍ਰੇਸ਼ਾਨ ਨਹੀਂ ਕਰਨਾ ਹੈ ਕਿਉਂਕਿ ਇਹ ਜੋ ਸਮਾਂ ਚੱਲ ਰਿਹਾ ਇਸ ਨੂੰ ਸਬਰ ਸੰਤੋਖ ਨਾਲ ਹੀ ਅਸੀਂ ਕੱਢਣਾ ਹੈ ।ਆਪ ਵੀ ਖੁਸ਼ ਰਹੋ ਤੇ ਮਾਪਿਆਂ ਨੂੰ ਵੀ ਖੁਸ਼ ਰੱਖੋ ।
ਸੰਜੀਵ ਸਿੰਘ ਸੈਣੀ, ਮੋਹਾਲੀ