ਸੁਰੀਲਾ ਫਨਕਾਰ ਪੰਜਾਬੀ ਗਾਇਕ ਤੇ ਗੀਤਕਾਰ : ਮੀਤ ਮਨੀ
ਪੰਜਾਬੀ ਸੰਗੀਤ ਇੰਡਸਟਰੀ ‘ਚ ਨਵੇਂ-ਨਵੇਂ ਚਿਹਰੇ ਆਪਣੀ ਕਲਾ ਦੇ ਜੌਹਰ ਦਿਖਾ ਕੇ ਵੱਖਰੀ ਪਹਿਚਾਣ ਹਾਸਲ ਕਰਨ ਦੀ ਕੋਸ਼ਿਸ਼ ਵਿੱਚ ਲੱਗੇ ਹੋਏ ਹਨ। ਅਜਿਹਾ ਹੀ ਫਨਕਾਰ ਆਪਣੇ ਹੁਨਰ ਦੇ ਦਮ ਤੇ ਗਾਇਕੀ ਦੇ ਪਿੜ ਵਿੱਚ ਆਪਣੀ ਭੂਮਿਕਾ ਨਿਭਾਉਣ ਲੱਗਾ ਹੋਇਆ ਹੈ ਜੋ ਆਪਣੇ ਗੀਤ ਬੇਸ਼ਰਮ ਨੂੰ ਲੈ ਕੇ ਚਰਚਾ ਵਿੱਚ ਆਇਆ ਸੀ ਉਹ ਫਨਕਾਰ ਹੈ ਮੀਤ ਮਨੀ ।
ਮੀਤ ਮਨੀ ਦਾ ਜਨਮ ਹਲਕਾ ਦਿੜ੍ਹਬਾ ਦੇ ਪਿੰਡ ਛਾਜਲੀ ਵਿਖੇ ਪਿਤਾ ਕ੍ਰਿਪਾਲ ਸਿੰਘ ਤੇ ਮਾਤਾ ਮਲਕੀਤ ਕੌਰ ਦੀ ਕੁੱਖੋਂ 1986
ਵਿੱਚ ਹੋਇਆ। ਮੀਤ ਮਨੀ ਦਾ ਦਸਵੀਂ ਦੀ ਪੜ੍ਹਾਈ ਦੌਰਾਨ ਸੰਗੀਤ ਨਾਲ ਚੰਗਾ ਮੋਹ ਪੈ ਗਿਆ ਸੀ। ਗੀਤ ਲਿਖਣ ਦੀ ਚੇਟਕ ਇਸ ਨੂੰ ਪ੍ਰਸਿੱਧ ਗੀਤਕਾਰ ਅਨਪੜ੍ਹ ਆਸੀ, ਦੇਵ ਥਰੀਕੇ ਵਾਲਾ, ਗਿੱਲ ਅਕੋਈ ਵਾਲਾ, ਗੁਰਨਾਮ ਗਾਮਾ ਦੇ ਲਿਖੇ ਗੀਤਾਂ ਨੂੰ ਸੁਣਕੇ ਲੱਗ ਪਈ।ਇਸ ਦੀ ਕਲਮ ਤੋਂ ਲਿਖੇ ਗੀਤਾਂ ਨੂੰ ਗਾਇਕ ਸਰਬਜੀਤ ਸਿੱਧੂ, ਮਨਪ੍ਰੀਤ ਮਾਣਾ, ਸੁਰਿੰਦਰ ਸੋਹੀ, ਤਰਸੇਮ ਰਾਹੀਂ, ਮਿਸ ਪ੍ਰੀਤ ਪਾਤੜਾਂ ਅਤੇ ਮਕਬੂਲ ਗਾਇਕ ਮਿੰਟੂ ਧੂਰੀ ਦੀ ਅਵਾਜ ਵਿੱਚ ਰਿਕਾਰਡ ਹੋਏ।
ਪ੍ਰਸਿੱਧ ਗਾਇਕ ਮਿੰਟੂ ਧੂਰੀ ਦੀ ਅਵਾਜ ਵਿੱਚ ਰਿਕਾਰਡ ਗੀਤ 'ਬੇਵਫਾ' ਕਾਫੀ ਮਕਬੂਲ ਹੋਇਆ।
ਇਸ ਗੀਤ ਦੀ ਪ੍ਰਸਿੱਧੀ ਪ੍ਰਾਪਤ ਹੋਣ ਤੇ ਇਸ ਨੇ ਅਖਾੜਿਆਂ ਦੇ
ਬਾਦਸ਼ਾਹ ਤੇ ਬੁਲੰਦ ਅਵਾਜ ਦੇ ਮਾਲਕ ਜਨਾਬ ਲਾਭ ਹੀਰਾ ਅਤੇ ਪੰਜਾਬੀ ਗਾਇਕਾਂ ਸਤਵਿੰਦਰ ਬਿੱਟੀ ਤੱਕ ਪਹੁੰਚ ਕੀਤੀ।
ਪਰ ਇਸ ਦੇ ਲਿਖੇ ਗੀਤਾਂ ਨੂੰ ਏਹ ਕਹਿ ਕੇ ਲੈਣ ਤੋਂ ਇਨਕਾਰ ਕਰ ਦਿੱਤਾ ਕਿ ਸਾਡੇ ਕੋਲ ਪਹਿਲਾਂ ਹੀ ਗੀਤਾਂ ਦਾ ਮਸਾਲਾ ਬਹੁਤ ਪਿਆ ਹੈ। ਜਿਸ ਤੋਂ ਬਾਅਦ ਇਸ ਨੇ ਗਾਇਕੀ ਦੇ ਪਿੜ ਵਿੱਚ ਆਉਣ ਦੀ ਥਾਣ ਲਈ ਅਤੇ ਆਪਣਾ ਉਸਤਾਦ ਜੋਗਾ ਲਹਿਰਾ ਨੂੰ ਧਾਰ ਕੇ ਰਿਆਜ ਕਰਨਾ ਸ਼ੁਰੂ ਕਰ ਦਿੱਤਾ।
ਰਿਆਜ ਕਰਨ ਦੌਰਾਨ ਇਸ ਨੇ ਪਹਿਲਾ ਹੀ ਧਾਰਮਿਕ ਮਾਤਾ ਦੀ ਭੇਟ 'ਤੇਰੇ ਨਾਮ ਦਾ ਨਸ਼ਾ' ਆਪਣੀ ਅਵਾਜ ਵਿੱਚ ਰਿਕਾਰਡ
ਕਰਵਾਈ ਜਿਸ ਨੂੰ ਸਰੋਤਿਆਂ ਨੇ ਪਸੰਦ ਕੀਤਾ।
ਫਿਰ ਤੋਂ ਇਸ ਬਾਅਦ ਸਿੰਗਲ ਟਰੈਕ ਮੇਰੀ ਅਰਥੀ, ਦਿਵਾਲੀ,
ਬੇਸ਼ਰਮ ਗੀਤ ਆਪਣੀ ਅਵਾਜ ਰਿਕਾਰਡ ਕਰਵਾ ਕੇ ਸਰੋਤਿਆਂ ਦੀ ਝੋਲੀ ਪਾਏ ਜਿਨ੍ਹਾਂ ਨੂੰ ਯੂ ਟਿਊਬ ਤੇ ਬੇਹੱਦ ਪਸੰਦ ਕੀਤਾ ਗਿਆ।
ਸੋਲੋ ਗੀਤ ਦਰਸ਼ਕਾਂ ਦੀ ਝੋਲੀ ਪਾਉਣ ਤੋਂ ਬਾਅਦ ਦੋਗਾਣਾ ਗੀਤ
'ਵੀਹ ਲੱਖ' ਪੰਜਾਬੀ ਗਾਇਕਾਂ ਦਿਲਪ੍ਰੀਤ ਅਟਵਾਲ ਨਾਲ
ਰਿਕਾਰਡ ਕਰਵਾਇਆ ਜੋ ਕਾਫੀ ਮਕਬੂਲ ਹੋਇਆ।
ਗਾਇਕੀ ਦੇ ਖੇਤਰ ਵਿੱਚ ਇਸ ਨੂੰ ਸਭ ਤੋਂ ਵੱਧ ਸਹਿਯੋਗ ਬਲਜਿੰਦਰ ਸਿੰਘ, ਲਖਵਿੰਦਰ ਲੱਖੀ, ਬਲੀ ਖਾਨ, ਜਗਦੀਪ
ਧਾਲੀਵਾਲ ਤੋਂ ਇਲਾਵਾ ਇਸ ਦਾ ਭਰਾ ਬਲਜੀਤ ਸਿੰਘ ਕਰ ਰਹੇ ਹਨ। ਅੱਜ-ਕੱਲ੍ਹ ਇਹੇ 'ਸਾਵਲੇ ਯੇ ਰੰਗ ਦੀ ਕੁੜੀ' ਗੀਤ ਦੀ ਤਿਆਰੀ ਵਿੱਚ ਲੱਗਾ ਹੋਇਆ ਹੈ ਜਿਸ ਦੀ ਵੀਡੀਓ ਰਾਹੀਂ ਜਲਦ ਦਰਸ਼ਕਾਂ ਦੇ ਰੂਬਰੂ ਹੋਵੇਗਾ। ਸੋਸ਼ਲ ਮੀਡੀਆ ਤੇ ਚਰਚਿਤ ਗਾਇਕ ਗੁਲਜਾਰ ਖਾਨ ਦੀ ਅਵਾਜ ਵਿੱਚ ਇਸ ਦਾ ਲਿਖਿਆ ਗੀਤ 'ਬਾਰੂਦ' ਜਲਦ ਸ਼ੋਸ਼ਲ ਮੀਡੀਆ ਦੀ ਸਾਈਟ ਯੂ ਟਿਊਬ ਤੇ ਸੁਣਨ ਨੂੰ ਮਿਲੇਗਾ।
ਪੇਸ਼ਕਸ਼ : ਕੁਲਵੰਤ ਛਾਜਲੀ