ਮੰਡੀ, 3 ਸਤੰਬਰ: ਮੰਡੀ ਜ਼ਿਲ੍ਹੇ ਦੇ ਸੁੰਦਰਨਗਰ ਸਬ-ਡਿਵੀਜ਼ਨ ਦੇ ਜੰਗਮਬਾਗ ਵਿੱਚ ਮੰਗਲਵਾਰ ਸ਼ਾਮ ਜ਼ਮੀਨ ਖਿਸਕਣ ਕਾਰਨ ਵੱਡਾ ਹਾਦਸਾ ਵਾਪਰਿਆ। ਮਲਬੇ ਹੇਠ ਆਉਣ ਨਾਲ ਹੁਣ ਤੱਕ ਛੇ ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ, ਜਿਨ੍ਹਾਂ ਵਿੱਚ ਇੱਕੋ ਪਰਿਵਾਰ ਦੇ ਚਾਰ ਮੈਂਬਰ ਵੀ ਸ਼ਾਮਲ ਹਨ। ਮ੍ਰਿਤਕਾਂ ਦੀ ਪਛਾਣ ਗੁਰਪ੍ਰੀਤ ਸਿੰਘ, ਭਾਰਤੀ, ਸੁਰੇਂਦਰ ਕੌਰ, ਕੀਰਤ, ਸ਼ਾਂਤੀ ਦੇਵੀ ਅਤੇ ਪ੍ਰਕਾਸ਼ ਚੰਦ ਸ਼ਰਮਾ ਵਜੋਂ ਹੋਈ ਹੈ।
ਹਾਦਸੇ 'ਚ ਟਾਟਾ ਸੂਮੋ ਕਾਰ ਮਲਬੇ ਹੇਠ ਦੱਬ ਗਈ। ਉਸਦੀ ਖਿੜਕੀ ਦਾ ਸ਼ੀਸ਼ਾ ਨਾਲੇ ਵਿੱਚ ਮਿਲਿਆ ਹੈ। ਸੂਮੋ ਡਰਾਈਵਰ ਰਾਹੁਲ ਨਾਚਨ ਖੇਤਰ ਦੇ ਖਤਰਵਾੜੀ ਦਾ ਰਹਿਣ ਵਾਲਾ ਸੀ। ਰਾਹਤ ਟੀਮ ਇਹ ਪਤਾ ਲਗਾ ਰਹੀ ਹੈ ਕਿ ਰਾਹੁਲ ਕਾਰ ਵਿੱਚ ਇਕੱਲਾ ਸੀ ਜਾਂ ਉਸਦੇ ਨਾਲ ਹੋਰ ਯਾਤਰੀ ਵੀ ਸਨ।
ਮਲਬੇ ਵਿੱਚੋਂ ਛੇ ਲਾਸ਼ਾਂ ਕੱਢੀਆਂ ਜਾ ਚੁੱਕੀਆਂ ਹਨ। ਆਖਰੀ ਮ੍ਰਿਤਕ ਪ੍ਰਕਾਸ਼ ਚੰਦ ਸ਼ਰਮਾ ਵਾਸੀ ਦਧਿਆਲ ਸੀ, ਜੋ ਸਕੂਟੀ 'ਤੇ ਜਾ ਰਿਹਾ ਸੀ। ਆਧਾਰ ਕਾਰਡ ਰਾਹੀਂ ਉਸਦੀ ਪਛਾਣ ਹੋਈ।
ਮੰਗਲਵਾਰ ਸ਼ਾਮ ਛੇ ਵਜੇ ਸ਼ੁਰੂ ਹੋਏ ਰਾਹਤ ਅਤੇ ਬਚਾਅ ਕਾਰਜ ਅਜੇ ਵੀ ਜਾਰੀ ਹਨ। ਜੇਸੀਬੀ ਮਸ਼ੀਨਾਂ ਨਾਲ ਮਲਬਾ ਹਟਾਉਣ ਦੀ ਕੋਸ਼ਿਸ਼ ਜਾਰੀ ਹੈ। ਸਥਾਨਕ ਲੋਕ ਵੀ ਪ੍ਰਸ਼ਾਸਨ ਅਤੇ ਆਫ਼ਤ ਪ੍ਰਬੰਧਨ ਟੀਮ ਨਾਲ ਸਹਿਯੋਗ ਕਰ ਰਹੇ ਹਨ।
ਭਾਰੀ ਮੀਂਹ ਅਤੇ ਜ਼ਮੀਨ ਖਿਸਕਣ ਦੇ ਖ਼ਤਰੇ ਨੂੰ ਦੇਖਦੇ ਹੋਏ, ਪ੍ਰਸ਼ਾਸਨ ਨੇ ਮੰਗਲਵਾਰ ਨੂੰ ਮੰਡੀ ਜ਼ਿਲ੍ਹੇ ਦੇ ਸਾਰੇ ਸਬ-ਡਿਵੀਜ਼ਨਾਂ ਵਿੱਚ ਸਕੂਲ ਬੰਦ ਰੱਖਣ ਦੇ ਹੁਕਮ ਜਾਰੀ ਕੀਤੇ, ਹਾਲਾਂਕਿ ਸਦਰ ਸਬ-ਡਿਵੀਜ਼ਨ ਨੂੰ ਇਸ ਵਿੱਚੋਂ ਬਾਹਰ ਰੱਖਿਆ ਗਿਆ।
ਇਸ ਤੋਂ ਇਲਾਵਾ, ਜੋਗਿੰਦਰਨਗਰ ਸਬ-ਡਿਵੀਜ਼ਨ ਦੇ ਨੇਰ ਘਰਵਾਸਦਾ ਖੇਤਰ ਵਿੱਚ ਮੰਗਲਵਾਰ ਅੱਧੀ ਰਾਤ ਨੂੰ ਜ਼ਮੀਨ ਖਿਸਕਣ ਕਾਰਨ 15 ਘਰਾਂ ਨੂੰ ਭਾਰੀ ਨੁਕਸਾਨ ਪਹੁੰਚਿਆ। ਇਨ੍ਹਾਂ ਘਰਾਂ ਨੂੰ ਤੁਰੰਤ ਖਾਲੀ ਕਰਵਾ ਕੇ ਪ੍ਰਭਾਵਿਤ ਪਰਿਵਾਰਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਪਹੁੰਚਾਇਆ ਗਿਆ ਹੈ।