ਆਪਣੇ ਆਚਰਣ ‘ਤੇ ਖੁਦ ਹੀ ਉਂਗਲ ਚੁੱਕਣਾ ਰਾਜਸ਼ੀ ਸੱਤਾ ਅਤੇ ਰੁਤਬੇ ਮਾਨਣ ਦੀ ਭੁੱਖੀ ਮਾਨਸਿਕਤਾ ਦਾ ਪ੍ਰਗਟਾਵਾ -- ਬਘੇਲ ਸਿੰਘ ਧਾਲੀਵਾਲ

 ਕਿੰਨਾ ਦੁੱਖ ਹੁੰਦਾ ਜਦੋ ਕੋਈ ਆਪਣੀ ਨਸਲ ਦਾ ਬੰਦਾ ਆਪਣੀ ਹੀ ਨਸਲ ਨੂੰ ਭੰਡਣ ਸਮੇ ਸਾਰੇ ਹੱਦਾਂ ਬੰਨੇ ਪਾਰ ਕਰ ਜਾਂਦਾ ਹੈ। ਅਜਿਹਾ ਕੋਈ ਵੀ ਇਨਸਾਨ ਸਹਿਜ ਸੁਭਾਅ ਨਹੀ ਕਰਦਾ ਬਲਕਿ ਇਹ ਸਥਾਪਤੀ ਦੀ ਖੁਸ਼ੀ ਦੇ ਲਈ ਕੀਤਾ ਜਾਂਦਾ ਹੈ,ਤਾਂ ਕਿ  ਚੰਗੇ ਰੁਤਬੇ ਮਾਨਣ ਦਾ ਸਮਾ ਲਮੇਰਾ ਹੁੰਦਾ ਰਹੇ। ਸ਼ੋਸ਼ਲ ਮੀਡੀਏ ਤੇ ਭਾਸ਼ਾ ਵਿਭਾਗ ਪੰਜਾਬ ਦੇ ਬਹੁ ਚਰਚਿਤ ਡਾਇਰੈਕਟਰ ਜਸਵੰਤ ਸਿੰਘ ਜਫਰ ਹੁਣਾਂ ਦੀ ਇੰਟਰਵਿਊ ਦੀ ਇੱਕ ਕਲਿੱਪ ਤੇਜੀ ਨਾਲ ਵਾਇਰਲ ਹੋ ਰਹੀ ਹੈ,ਜਿਸ ਵਿੱਚ ਉਹਨਾਂ ਨੇ ਆਪਣੇ ਇਤਿਹਾਸ ਨੂੰ,ਆਪਣੇ ਪੁਰਖਿਆਂ ਦੀਆਂ ਲਾਸ਼ਾਨੀ ਕੁਰਬਾਨੀਆਂ ਨੂੰ ਅਤੇ ਉਹਨਾਂ ਦੇ ਚੰਗੇ ਚਰਿੱਤਰ ਵਿਹਾਰ ਦੇ ਸਦਗੁਣਾਂ ਤੋ ਆਪਣੇ ਆਪ ਨੂੰ ਮੂਲ਼ੋਂ ਹੀ ਵੱਖ ਕਰ ਲਿਆ ਹੈ।ਉਹ ਆਪਣੇ ਇਤਿਹਾਸ ਤੇ ਮਾਣ ਕਰਨ ਵਾਲਿਆਂ ਦਾ ਮਜਾਕ ਉਡਾਂਉਂਦੇ ਹੋਏ ਕਹਿੰਦੇ ਹਨ ਕਿ ਜੋ ਅਸੀ ਇਤਿਹਾਸ ਤੇ ਮਾਣ ਕਰਦੇ ਹਾਂ ਉਹ ਸਾਡਾ ਹੈ ਹੀ ਨਹੀ,ਬਲਕਿ ਸਾਡਾ ਤਾਂ ਸੌ ਡੇਢ ਸੌ ਸਾਲ ਬਾਅਦ ਇਤਿਹਾਸ ਬਣੇਗਾ। ਸੌ ਡੇਢ ਸੌ ਸਾਲ ਬਾਅਦ ਬਣਨ ਵਾਲੇ ਇਤਿਹਾਸ ਵਿੱਚ ਉਹਨਾਂ ਨੇ  ਸਿੱਖ ਆਚਰਣ ਨੂੰ ਬੇਹੱਦ ਨੀਵੇਂ ਪੱਧਰ ਤੇ ਦਿਖਾਇਆ ਹੈ। ਅਜਿਹਾ ਕਰਨ ਲਈ ਉਹ ਕਿਸੇ ਸਰਬੇ ਦਾ ਜਿਕਰ ਵੀ ਕਰਦੇ ਹਨ,ਜਿਸ ਵਿੱਚ ਉਹ ਕਹਿੰਦੇ ਹਨ ਕਿ ਔਰਤਾਂ ਨਾਲ ਛੇੜ ਛਾੜ ਦੇ ਮਾਮਲਿਆਂ ਤੇ ਕਰਵਾਏ ਗਏ ਸਰਬੇ ਵਿੱਚ ਸਿੱਖਾਂ ਦਾ ਨਾਮ ਪਹਿਲੇ ਨੰਬਰ ਤੇ ਆਉਂਦਾ ਹੈ,ਪਰੰਤੂ ਉਹਨਾਂ ਵੱਲੋਂ ਉਸ ਸਰਬੇ ਬਾਰੇ ਸਪੱਸਟ ਨਹੀ ਕੀਤਾ ਗਿਆ ਕਿ ਉਹ ਸਰਬੇ ਕਦੋਂ, ਕਿੱਥੇ ਅਤੇ ਕੀ ਦੇਖ ਕੇ ਕੀਤਾ ਗਿਆ ਹੈ। ਜੇਕਰ ਸਰਬੇ ਭਾਰਤ ਵਿੱਚ ਹੋਇਆ ਹੈ,ਤਾਂ ਕੀ ਜਫਰ ਸਾਹਬ ਦੱਸ ਸਕਦੇ ਹਨ ਕਿ ਸਿੱਖਾਂ ਨਾਲੋਂ ਹੋਰ ਕਿਹੜੇ ਫਿਰਕੇ ਦੇ ਲੋਕਾਂ ਨੂੰ ਅਜਿਹਾ ਮਾਣ ਹਾਸਲ ਹੋਇਆ ਹੈ,ਜਿੰਨਾਂ ਦੇ ਮਨਾਂ ਵਿੱਚ ਔਰਤ ਪ੍ਰਤੀ ਐਨਾ ਸਤਿਕਾਰ ਪਾਇਆ ਗਿਆ ਹੈ ? ਪੰਜਾਬ ਤੋ ਬਗੈਰ ਭਾਰਤ ਦਾ ਅਜਿਹਾ ਕਿਹੜਾ ਸੂਬਾ ਹੈ ਜਿੱਥੇ ਕੋਈ ਗੈਰ ਫਿਰਕੇ ਦੀ ਬਹੂ ਬੇਟੀ ਆਪਣੇ ਆਪ ਨੂੰ ਸੁਰਖਿਅਤ ਸਮਝ ਸਕਦੀ ਹੈ ? ਜਫਰ ਸਾਹਬ ਨੂੰ ਇਹ ਪਤਾ ਹੋਣਾ ਚਾਹੀਦਾ ਹੈ ਕਿ ਉਹ ਕੌਂਮਾਂ ਹੀ ਇਤਿਹਾਸ ਸਿਰਜਦੀਆਂ ਹਨ ਜਿੰਨਾਂ ਦੇ ਪੁਰਖਿਆਂ ਨੇ ਇਤਿਹਾਸ ਬਣਾਇਆ ਹੁੰਦਾ ਹੈ। ਮਾਣਮੱਤੇ ਇਤਿਹਾਸ ਤੇ ਮਾਣ ਕਰਕੇ ਹੀ ਉਹਨਾਂ ਦੇ ਵਾਰਸ ਆਪਣੀ ਗੈਰਤ ਨੂੰ ਜਿਉਂਦਾ ਰੱਖਦੇ ਹਨ,ਅਤੇ ਭਵਿੱਖ ਵਿੱਚ ਨਵੇਂ ਮੀਲ ਪੱਥਰ ਗੱਡਦੇ ਹਨ।ਇਹ ਸਿੱਖੀ ਦੇ ਸ਼ਾਨਾਂ ਮੱਤੇ ਇਤਿਹਾਸ ਦੀ ਬਦੌਲਤ ਹੀ ਸੀ ਕਿ ਬੰਦਾ ਸਿੰਘ ਬਹਾਦਰ ਦੇ ਨਾਲ 740 ਸਿੰਘਾਂ ਨੇ ਧਰਮ ਛੱਡਣਾ ਨਹੀ, ਮਰਨਾ ਸਵੀਕਾਰ ਕੀਤਾ ਸੀ। ਉਹਨਾਂ ਦੇ ਸਾਹਮਣੇ ਸ੍ਰੀ ਗੁਰੂ ਅਰਜਨ ਦੇਵ ਜੀ ਦੀ ਸ਼ਹਾਦਤ ਦਾ ਇਤਹਾਸ ਸੀ,ਉਹਨਾਂ ਦੇ ਸਾਹਮਣੇ ਚਾਂਦਨੀ ਚੌਂਕ ਵਿੱਚ ਸੀਸ ਕਟਾ ਕੇ ਸ਼ਹੀਦ ਹੋਏ ਗੁਰੂ ਤੇਗ ਬਹਾਦਰ ਸਾਹਿਬ ਅਤੇ ਉਹਨਾਂ  ਦੇ ਨਾਲ  ਤੂੰਬਾ  ਤੂੰਬਾ ਹੋਏ ਸ਼ਹੀਦਾਂ ਸ਼ਾਨਾਮੱਤਾ ਇਤਿਹਾਸ ਖੜਾ ਸੀ।ਉਹਨਾਂ ਨੂੰ ਗੁਰੂ ਸਾਹਿਬ ਦੇ ਸੱਤ ਅਤੇ ਨੌ ਸਾਲ ਦੇ ਨੰਨੇ ਲਾਲਾਂ ਦੇ ਨੀਹਾਂ ਵਿੱਚ ਅਡੋਲ ਖੜੇ ਨੂਰੀ ਚਿਹਰੇ ਪਰਤੱਖ ਦਿਖਾਈ ਦੇ ਰਹੇ ਸਨ,ਜਿਸ ਦੀ ਬਦੌਲਤ ਉਹਨਾਂ ਨੇ ਧਰਮ ਛੱਡਣਾ ਨਹੀ ਬਲਕਿ ਧਰਮ ਤੋ ਕੁਰਬਾਨ ਹੋਣਾ ਚੁਣਿਆ ਸੀ। ਜੇਕਰ ਬਹੁਤਾ ਦੂਰ ਨਾ ਵੀ ਜਾਈਏ ਤਾਂ ਅਜੇ ਮਸਾਂ ਚਾਲੀ ਇਕਤਾਲੀ ਸਾਲ ਪੁਰਾਣੀ ਗਾਥਾ ਹੀ ਹੈ ਸ੍ਰੀ ਦਰਬਾਰ ਸਾਹਿਬ ਤੇ ਭਾਰਤੀ ਫੌਜਾਂ ਚੜਕੇ ਆਉਣ ਦੀ ਤਿਆਰੀ ਕਰ ਰਹੀਆਂ ਸਨ,ਤਾਂ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਰਾਖੀ ਲਈ ਆਪਣੇ ਕੁੱਝ ਮੁੱਠੀ ਭਰ ਮਰਜੀਵੜਿਆਂ ਨਾਲ ਡਟੇ  ਕੌਂਮ ਦੇ ਮਹਾਨ ਸ਼ਹੀਦ ਬਾਬਾ ਜਰਨੈਲ ਸਿੰਘ ਭਿੰਡਰਾਂ ਵਾਲਿਆਂ ਨੇ ਕਿਹਾ ਸੀ ਕਿ ਦੁਨੀਆਂ ਇਸ ਮੁਕਾਬਲੇ ਨੂੰ ਦੇਖੇਗੀ,ਅਸੀ ਕੱਚੀ ਗੜੀ ਦਾ ਇਤਹਾਸ ਦੁਹਰਾ ਦੇਵਾਂਗੇ।ਸੋ ਹੋਇਆ ਵੀ ਠੀਕ ਉਹਨਾਂ ਦੇ ਕਹਿਣ ਮੁਤਾਬਿਕ ਹੀ ਸੀ,ਜਦੋ ਮਾਰੂ ਹਥਿਆਰਾਂ,ਟੈਂਕਾਂ ਤੋਪਾਂ ਅਤੇ  ਜਹਿਰੀਲੇ ਬੰਬਾਂ ਨਾਲ ਲੈਸ  ਲੱਖਾਂ ਭਾਰਤੀ ਫੌਜਾਂ ਦੇ ਕੁੱਝ ਕੁ ਗਿਣਤੀ ਦੇ ਸਿੱਖ ਨੌਜਵਾਨਾਂ ਨੇ ਸੱਤ ਦਿਨ ਤੱਕ ਛੱਕੇ ਛੁਡਾ ਕੇ ਰੱਖੇ ਸਨ।ਕੀ ਇਹ ਇਤਿਹਾਸ ਦਾ ਕਮਾਲ ਨਹੀ ਹੈ ? ਜੇਕਰ ਇਤਿਹਾਸ ਹੀ ਮੱਸੇ ਰੰਘੜ ਜਾਂ ਨਰੈਣੂ ਮਹੰਤ ਵਾਲਾ ਹੁੰਦਾ ਤਾਂ ਉਹਨਾਂ ਦੇ ਵਾਰਸਾਂ ਨੇ ਸੱਤ ਦਿਨ ਤੱਕ ਲੜਾਈ ਨਹੀ ਸੀ ਕਰਨੀ ਬਲਕਿ ਪਹਿਲੇ ਹੀ ਦਿਨ ਉਹਨਾਂ ਅੱਗੇ ਗੋਡੇ ਟੇਕ,ਈਨ ਮੰਨ ਕੇ ਹਰ ਖਿਦਮਤ ਲਈ ਹਾਜਰ ਹੋਣ ਦਾ ਅਹਿਦ ਲੈਣਾ ਸੀ। ਜੇਕਰ ਇਤਿਹਾਸ ਕਿਸੇ ਕੌਂਮ ਲਈ ਮਇਨੇ ਹੀ ਨਾਹ ਰੱਖਦਾ ਹੁੰਦਾ ਤਾਂ ਕੌਂਮਾਂ ਨਵੇਂ ਇਤਿਹਾਸ ਸਿਰਸਜਣ ਦੇ ਕਾਬਲ ਵੀ ਨਾ ਹੋ ਸਕਦੀਆਂ।ਇਹ ਪੁਰਖਿਆਂ ਦੇ ਪਾਏ ਸਾਨਦਾਰ ਪੂਰਨਿਆਂ ਅਤੇ ਰਵਾਇਤਾਂ ਦੀ ਬਦੌਲਤ ਹੀ ਹੈ ਕਿ ਪੰਜਾਬ ਦੇ ਜਾਏ ਅੱਜ ਵੀ ਬੇਗਾਨੀਆਂ ਬਹੂ ਬੇਟੀਆਂ ਦੀ ਇੱਜ਼ਤਾਂ ਦੀ ਰਾਖੀ ਆਪਣੀ ਜਾਨ ਤੇ ਖੇਡ ਕੇ ਕਰਦੇ ਹਨ,ਇਹ ਕੋਈ ਬਹੁਤ ਪੁਰਾਣੇ ਵਾਕਿਆਤ ਵੀ ਨਹੀ ਹਨ ਬਲਕਿ ਅਜੇ ਕੱਲ੍ਹ ਦੀਆਂ ਗੱਲਾਂ ਹਨ ਜਦੋ ਮਹਾਨ ਭਾਰਤ ਦੇ ਮੌਜੂਦਾ ਸਮੇ ਦੇ ਨੇਤਾਵਾਂ ਨੇ ਮੁਸਲਮ ਬੀਬੀਆਂ ਦੀ ਇੱਜਤ ਨਾਲ ਖੇਡਣ ਦੇ ਨਾਹਰੇ ਦਿੱਤੇ ਸਨ,ਪਰ ਉਹ ਪੰਜਾਬ ਦੇ ਜਾਏ ਹੀ ਸਨ ਜਿੰਨਾਂ  ਨੇ ਮੁਤੱਸਬੀ ਭੇੜੀਆਂ ਦੇ ਅਜਿਹੇ ਇਰਾਦਿਆਂ ਨੂੰ ਮਿੱਟੀ ਵਿੱਚ ਮਿਲਾਇਆ ਸੀ ਅਤੇ ਕਸ਼ਮੀਰੀ ਮੁਸਲਮ ਬੇਟੀਆਂ ਨੂੰ ਬਾ-ਇਜ਼ਤ ਉਹਨਾਂ ਦੇ ਘਰਾਂ ਤੱਕ ਪਹੁੰਚਾਇਆ ਸੀ।ਕੀ ਭਾਸ਼ਾ ਵਿਭਾਗ ਦੇ ਡਾਇਰੈਕਟਰ ਨੂੰ ਉਹ ਸਮਾ ਐਨੀ ਜਲਦੀ ਭੁੱਲ ਗਿਆ ਹੈ ? ਜੇਕਰ ਯਾਦ ਹੈ ਤਾਂ ਕੀ ਉਹ ਦੱਸਣਗੇ ਪਈ ਜੇਕਰ ਸਿੱਖ ਆਪਣੇ ਸਾਨਦਾਰ ਵਿਰਸੇ ਨੂੰ ਭੁੱਲੇ ਹੁੰਦੇ ਅਤੇ ਜਫਰ ਸਾਹਬ ਦੇ ਕਹਿਣ ਮੁਤਾਬਿਕ ਜੇਕਰ ਸਿੱਖਾ ਨੇ ਵੀ ਇਹ ਸੋਚ ਲਿਆ ਹੁੰਦਾ ਕਿ ਸਾਡਾ ਉਸ ਇਤਿਹਾਸ ਨਾਲ ਕੋਈ ਸਬੰਧ  ਹੀ ਨਹੀ ਹੈ,ਫਿਰ ਉਹਨਾਂ ਅਜਿਹੇ ਧਰਮੀ ਕੰਮ ਕਰ ਸਕਣੇ ਸਨ ? ਜੇਕਰ ਉਹਨਾਂ ਦੇ ਜਿਕਰ ਕੀਤੇ ਸਰਬੇ ਨੂੰ ਸੱਚ ਮੰਨ ਵੀ ਲਿਆ ਜਾਵੇ,ਫਿਰ ਉਹ ਸਿੱਖ ਨੌਜਵਾਨ ਕੌਣ ਸਨ ਜਿਹੜੇ ਹਿੰਦੁਸਤਾਨੀ ਹਬਸੀ ਭੇੜੀਆਂ ਤੋ ਬਚਾ ਕੇ ਮੁਸਲਮ ਕਸ਼ਮੀਰੀ ਬੱਚੀਆਂ ਨੂੰ  ਉਹਨਾਂ ਦੇ ਘਰਾਂ ਤੱਕ ਸੁਰਖਿਅਤ ਪਹੁੰਚਾ ਕੇ ਆਏ ਸਨ। ਜਫਰ ਸਾਹਬ ਤੁਹਾਨੂੰ ਸਿੱਖ ਹੋਣ ਤੇ ਮਾਣ ਹੀ ਨਹੀ ਹੈ, ਜੇਕਰ ਹੁੰਦਾ ਤਾਂ ਜਦੋ ਤੁਸੀ ਕਸ਼ਮੀਰ ਵਿੱਚ ਜਾਕੇ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦਾ ਸਤਾਬਦੀ ਵਰ੍ਹਾ ਮਨਾਉਣ ਗਏ ਸੀ ਤਾਂ ਤੁਹਾਡੇ ਇਹ ਵਾਕਿਆਤ ਵੀ ਜਰੂਰ ਯਾਦ ਹੋਣਾ ਸੀ,ਜਿਸ ਨਾਲ ਤੁਹਾਨੂੰ ਕਸ਼ਮੀਰ ਵਿੱਚ ਹੋਰ ਵੀ ਮਾਨ ਸਨਮਾਨ ਮਿਲਣਾ ਸੀ, ਪਰ ਤੁਸੀ ਅਜਿਹਾ ਨਹੀ ਸੀ ਕਰ ਸਕਦੇ,ਕਿਉਂਕਿ ਅਜਿਹਾ ਕਰਨ ਨਾਲ ਤੁਹਾਡੇ ਤੋ ਸ਼ਥਾਪਤੀ ਨੇ ਨਰਾਜ਼ ਹੋ ਜਾਣਾ ਸੀ, ਸੋ ਅਜਿਹਾ ਪੰਗਾ ਤੁਸੀ ਕਿਸੇ ਵੀ ਕੀਮਤ ਤੇ ਨਹੀ ਲੈ ਸਕਦੇ ਜਿਸ ਦੇ ਨਾਲ ਤੁਹਾਡੇ ਰੁਤਬੇ ਨੂੰ ਖਤਰਾ ਪਹੁੰਚਦਾ ਹੋਵੇ। ਪਿਛਲੇ ਦੋ ਦਿਨ ਦੀ ਗੱਲ ਹੈ ਜਦੋ ਮੈਨੂੰ ਕਿਸੇ ਕੰਮ ਦੇ ਸਿਲਸਿਲੇ ਵਿੱਚ ਲੁਧਿਆਣੇ ਲਾਗੇ ਡੇਹਲੋਂ ਜਾਣਾ ਪਿਆ ਸੀ,ਇਤਫਾਕਨ ਮੈਨੂੰ ਉਥੇ ਇੱਕ ਚੰਡੀਗੜ ਤੋ ਆਇਆ ਪੱਤਰਕਾਰ ਦੋਸਤ ਮਿਲ ਗਿਆ,ਉਹਦੇ ਨਾਲ ਇੱਕ ਕਸ਼ਮੀਰਨ ਕੁੜੀ ਸੀ ਜਿਹੜੀ ਉਹਨੂੰ ਆਪਣੀ ਮਦਦ ਲਈ ਡੇਹਲੋਂ ਦੇ ਨਰਸਿੰਗ ਕਾਲਜ ਲੈ ਕੇ ਆਈ ਸੀ,ਜਿੱਥੇ ਉਹ ਨਰਸਿੰਗ ਦੀ ਪੜਾਈ ਕਰਦੀ ਸੀ ਪਰ ਹੁਣ ਉਹ ਪਿਛਲੇ ਸਾਲ ਡੇਢ ਸਾਲ  ਤੋ ਕਾਲਜ ਨਹੀ ਸੀ ਆਈ।ਕਾਲਜ ਦੀ ਮੈਨੇਜਮੈਂਟ ਨੇ ਉਹਨੂੰ ਜੁਰਮਾਨਾ ਲਾ ਦਿੱਤਾ ਸੀ,ਉਹਨੇ ਕਸ਼ਮੀਰ ਤੋ ਆਕੇ ਉਸ ਪੱਤਰਕਾਰ ਨੂੰ ਆਪਣੀ ਮਦਦ ਲਈ ਡੇਹਲੋਂ ਬੁਲਾਇਆ ਸੀ।ਮੈਨੂੰ ਵੀ ਉਸ ਬੱਚੀ ਨਾਲ ਗੱਲਬਾਤ ਕਰਨ ਦਾ ਮੌਕਾ ਮਿਲਿਆ ਸੀ।ਮੈ ਉਸ ਨੂੰ ਪੁੱਛਿਆ ਕਿ ਹੁਣ ਤੁਹਾਨੂੰ ਡਰ ਨਹੀ ਲੱਗਦਾ,ਤਾਂ ਉਹਦਾ ਜਵਾਬ ਜਦੋ ਤੁਸੀ ਵੀ ਸੁਣੋਗੇ ਤਾਂ ਸਿੱਖਾਂ ਦੇ ਆਚਰਣ ਸਬੰਧੀ ਸਾਰਾ ਕੁੱਝ ਆਪਣੇ ਆਪ ਹੀ ਸਪੱਸਟ ਹੋ ਜਾਵੇਗਾ, ਉਸ ਕੁੜੀ ਦਾ ਬੜਾ ਖੂਬਸੂਰਤ ਜਵਾਬ ਸੀ ਕਿ “ਜਦੋ ਸਰਦਾਰ ਭਰਾ ਨਾਲ ਹੋਣ ਫਿਰ ਡਰ ਕਿਸ ਗੱਲ ਦਾ ਜੀ”, ਪਰ ਜਫਰ ਸਾਹਬ ਕਹਿੰਦੇ ਹਨ ਕਿ ਸਰਬੇ ਵਿੱਚ ਸਿੱਖਾਂ ਦਾ ਆਚਰਣ ਬੇਹੱਦ ਮਾੜਾ ਦਰਜ ਕੀਤਾ ਗਿਆ ਹੈ,ਜਿਸਨੂੰ ਉਹ  ਸ਼ਿੱਦਤ ਨਾਲ ਸਵੀਕਾਰਦੇ ਹੋਏ ਇਤਿਹਾਸ ਦੀ  ਪਰਸੰਗਿਕਤਾ  ਤੋ ਮੁਨਕਰ ਹੋ ਰਹੇ ਹਨ। ਇਸ ਤੋ ਅੱਗੇ ਜਦੋ ਉਸ ਵੀਡੀਓ ਦੇ ਹੇਠਾਂ ਇੱਕ ਹੋਰ ਜ਼ਿੰਮੇਵਾਰ ਹਸਤੀ,ਅਕਾਲੀ ਦਲ ਦੇ ਹਰਚਰਨ ਸਿੰਘ ਬੈਂਸ ਦੀ ਟਿੱਪਣੀ ਦੇਖੀ ਤਾਂ ਉਹਨਾਂ ਨੇ ਉਸ ਬਹਿਸ ਦੇ ਪੱਖ ਵਿੱਚ ਹੋਰ ਵੀ ਅੱਗੇ ਵਧਦਿਆਂ ਸਿੱਖਾਂ ਨੂੰ ਹਿੰਦੂਆਂ ਦਾ ਹੀ ਹਿੱਸਾ ਦੱਸਣ ਤੇ ਸਾਰਾ ਜੋਰ ਲਾ ਦਿੱਤਾ ਹੈ।ਉਹਨਾਂ ਨੇ ਸਿੱਖਾਂ ਦੀ ਵੱਖਰੀ ਕੌਂਮ  ਹੋਣ ਤੇ ਹੀ ਸਵਾਲੀਆ ਨਿਸ਼ਾਨ ਲਾ ਦਿੱਤਾ ਹੈ।। ਇਤਿਹਾਸ ਵਿੱਚ ਸਿੱਖਾਂ ਵੱਲੋਂ ਹਿੰਦੂ ਬਹੂ ਬੇਟੀਆਂ ਨੂੰ ਜਰਵਾਣਿਆਂ ਦੀ ਕੈਦ ਵਿੱਚੋਂ ਛੁਡਾਉਣ ਵਾਲੇ ਕਿੱਸਿਆਂ ਨੂੰ ਨਕਾਰਦਿਆਂ ਉਹਨਾਂ ਕਿਹਾ ਹੈ ਕਿ ਪੁਰਾਤਨ ਸਿੱਖਾਂ ਨੇ ਕਿਸੇ ਗੈਰ ਬਹੂ ਬੇਟੀਆਂ ਨੂੰ ਨਹੀ ਸੀ ਛਡਵਾਇਆ ਸਗੋਂ ਉਹ ਉਹਨਾਂ ਸਿੱਖਾਂ ਦੀਆਂ ਹੀ ਬਹੂ ਬੇਟੀਆਂ ਸਨ ਕਿਉਕਿ ਉਦੋਂ ਸਿੱਖ ਹਿੰਦੂਆਂ ਵਿੱਚੋ ਨਵੇਂ ਨਵੇਂ ਹੀ ਗਏ ਸਨ। ਗੁਲਾਮ ਮਨਸਿਕਤਾ ਨੇ ਉਹਨਾਂ ਨੂੰ ਆਪਣੀ ਹੋਂਦ ਨੂੰ ਸਵੀਕਾਰ ਕਰਨ ਤੋ ਹੀ ਵਰਜ ਦਿੱਤਾ ਹੈ।ਅਜਿਹਾ ਲਿਖਦੇ ਉਹ  ਇਹ ਬਿਲਕੁਲ ਭੁੱਲ ਜਾਂਦੇ ਹਨ ਜਾਂ ਜਾਣਬੁੱਝ ਕੇ ਨਜਰਅੰਦਾਜ ਕਰ ਦਿੰਦੇ ਹਨ ਕਿ ਸਿੱਖ ਉਦੋ ਨਵੇਂ ਨਵੇ ਹਿੰਦੂ ਧਰਮ ਵਿੱਚੋਂ ਨਹੀ ਸਨ ਆਏ ਸਗੋ ਉਸ ਤੋ ਢਾਈ ਪੌਣੇ ਤਿੰਨ ਸੌ ਸਾਲ ਪਹਿਲਾਂ  ਉਦੋ ਵੱਖਰੇ ਹੋ ਗਏ ਸਨ ਜਦੋ ਸ੍ਰੀ ਗੁਰੂ ਨਾਨਕ ਸਾਹਿਬ ਨੇ ਪੰਜ ਸਾਲ ਦੀ ਉਮਰ ਵਿੱਚ  ਜ਼ੇਨਿਊ ਪਾਉਣ ਤੋ ਇਨਕਾਰ ਕਰ ਦਿੱਤਾ ਸੀ।ਖੁਦ ਸਿੱਖਾਂ ਵੱਲੋਂ ਸਿੱਖਾਂ ਖਿਲਾਫ ਬਣਾਈ ਜਾ ਰਹੀ ਗਲਤ ਧਾਰਨਾ ਦੇ ਨਾਲ ਹਿੰਦੁਸਤਾਨ ਪੱਧਰ ਤੇ ਸਿੱਖਾਂ ਖਿਲਾਫ ਸਿਰਜੇ ਜਾ ਰਹੇ ਨਫਰਤੀ ਅਤੇ ਝੂਠੇ ਵਿਰਤਾਂਤਾਂ ਨੂੰ ਹੋਰ ਬਲ ਮਿਲਦਾ ਹੈ। ਸੋ ਉਪਰੋਕਤ ਸਾਰੇ ਵਰਤਾਰੇ ਦੇ ਸੰਦਰਭ ਵਿੱਚ ਇਹ ਕਹਿਣਾ  ਵਾਜਬ  ਹੋਵੇਗਾ ਕਿ ਸਿੱਖਾਂ ਦੇ ਸੱਚੇ ਸੁੱਚੇ ਆਚਰਣ ਤੇ ਸਿੱਖਾਂ ਵੱਲੋਂ ਹੀ ਉਂਗਲ ਚੁੱਕੇ ਜਾਣ ਵਰਗੇ ਆਪਾ ਵਿਰੋਧੀ ਵਿਰਤਾਂਤ ਸਿਰਜੇ ਜਾਣ ਲਈ ਰਾਜਨੀਤਕ ਸੱਤਾ ਅਤੇ ਰੁਤਬੇ ਮਾਨਣ ਦੀ ਭੁੱਖੀ ਮਾਨਸਿਕਤਾ ਜਿੰਮੇਵਾਰ ਹੈ।

 ਬਘੇਲ ਸਿੰਘ ਧਾਲੀਵਾਲ
 99142-58142