ਸਾਡੇ ਪਿੰਡ ਜਦ ਆਉਣ ਪੰਘੂੜੇ - ਬਲਵਿੰਦਰ ਬਾਲਮ ਗੁਰਦਾਸਪੁਰ
ਸਾਡੇ ਪਿੰਡ ਜਦ ਆਉਣ ਪੰਘੂੜੇ
ਸਭ ਦੇ ਮਨ ਨੂੰ ਭਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ
ਵੱਖ-ਵੱਖ ਜਾਤਾਂ ਪਾਤਾਂ ਦੇ ਵਿਚ |
ਪ੍ਰਭਾਤਾਂ ਤੇ ਰਾਤਾਂ ਦੇ ਵਿਚ |
ਸਾਂਝੇ ਨਗਮੇ ਗਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ
ਵੱਖੋ-ਵੱਖ ਆਵਾਜ਼ਾਂ ਦੇ ਵਿਚ |
ਚੀਂ-ਚੀਂ ਚੂੰ-ਚੂੰ ਸਾਜ਼ਾਂ ਦੇ ਵਿਚ |
ਸ਼ੋਰ ਸ਼ਰਾਬਾ ਪਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ |
ਚਲਦੇ ਰਹਿਣਾ ਹੀ ਜੀਵਨ ਹੈ |
ਉਨਤੀ ਵਿਚ ਤਾਂ ਹੀ ਜਨਗਣ ਹੈ |
ਸਭ ਨੂੰ ਇਹ ਸਮਝਾਉਣ ਪੰਘੂੜੇ
ਸਾਡੇ ਪਿੰਡ ਜਦ ਆਉਣ ਪੰਘੂੜੇ
ਦੂਜਿਆਂ ਨੂੰ ਇਹ ਸੁੱਖ ਦੇਂਦੇ ਨੇ |
ਅੇਪਰ ਇਹ ਖੁਦ ਦੁੱਖ ਲੈਂਦੇ ਨੇ |
ਤਨ ਤੇ ਸਿਤਮ ਹੰਢਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ
ਬੱਚੇ ਬੁੱਢੇ ਨਰ ਤੇ ਨਾਰੀ |
ਸਭਨਾ ਦੇ ਨਾਲ ਕਰਦੇ ਯਾਰੀ
ਅਪਣੇ ਉਪਰ ਬਿਠਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ |
ਇਹ ਤਾਂ ਸਿਆਭਚਾਰ ਬਣਾਂਦੇ |
ਵਿਛੜਿਆਂ ਨੂੰ ਫੇਰ ਮਿਲਾਂਦੇ |
ਸਾਰੀ ਧਰਤ ਸਜਾਉਣ ਪੰਘੂੜੇ |
ਸਾਡੇ ਪਿੰਡ ਜਦ ਆਉਣ ਪੰਘੂੜੇ |
ਪ੍ਰਾਚੀਨ ਸਮੇਂ ਦੀਆਂ ਚੀਜਾਂ ਨੂੰ |
ਸਧਰਾਂ ਚਾਵਾਂ ਰੀਝਾਂ ਨੂੰ |
ਬਾਲਮ ਯਾਦ ਕਰਵਾਉਣ ਪੰਘੂੜੇ |
ਬਲਵਿੰਦਰ ਬਾਲਮ ਗੁਰਦਾਸਪੁਰ