ਅੰਮ੍ਰਿਤਸਰ, 11 ਅਕਤੂਬਰ – ਅੰਮ੍ਰਿਤਸਰ ਜ਼ਿਲ੍ਹੇ ਵਿੱਚ ਚਾਇਨਾ ਡੋਰ ਨਾਲ ਜੁੜੀ ਇੱਕ ਹੋਰ ਖ਼ਤਰਨਾਕ ਘਟਨਾ ਸਾਹਮਣੇ ਆਈ ਹੈ। ਸਾਧਾ ਪਿੰਡ ਬਾਈਪਾਸ ਨੇੜੇ ਜਸਕਰਨ ਪਾਲ ਸਿੰਘ ਨਾਮਕ ਨੌਜਵਾਨ ਦਫ਼ਤਰ ਜਾਂਦੇ ਸਮੇਂ ਚਾਇਨਾ ਡੋਰ ਦਾ ਸ਼ਿਕਾਰ ਹੋ ਗਿਆ। ਮੋਟਰਸਾਈਕਲ ਚਲਾਉਂਦੇ ਸਮੇਂ ਡੋਰ ਉਸਦੀ ਗਰਦਨ ਅਤੇ ਉਂਗਲੀ ਵਿੱਚ ਲਿਪਟ ਗਈ, ਜਿਸ ਨਾਲ ਉਹ ਜ਼ਖ਼ਮੀ ਹੋ ਗਿਆ।
ਜਸਕਰਨ ਨੇ ਦੱਸਿਆ ਕਿ ਡੋਰ ਐਨੀ ਤਿੱਖੀ ਸੀ ਕਿ ਉਸਦਾ ਬੈਗ ਪਾੜ ਗਿਆ ਅਤੇ ਗਰਦਨ ਤੇ ਹੱਥ 'ਤੇ ਡੂੰਘੇ ਕੱਟ ਆ ਗਏ। ਖੁਸ਼ਕਿਸਮਤੀ ਨਾਲ ਜਾਨੀ ਨੁਕਸਾਨ ਨਹੀਂ ਹੋਇਆ, ਪਰ ਘਟਨਾ ਤੋਂ ਬਾਅਦ ਨੌਜਵਾਨ ਸਦਮੇ ਵਿੱਚ ਹੈ।
ਉਸਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਹੈ ਕਿ ਚਾਇਨਾ ਡੋਰ 'ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਈ ਜਾਵੇ ਤਾਂ ਜੋ ਹੋਰ ਕਿਸੇ ਨਾਲ ਅਜਿਹਾ ਹਾਦਸਾ ਨਾ ਵਾਪਰੇ। ਸਥਾਨਕ ਨਾਗਰਿਕਾਂ ਨੇ ਵੀ ਗੁੱਸਾ ਪ੍ਰਗਟ ਕਰਦਿਆਂ ਮੰਗ ਕੀਤੀ ਹੈ ਕਿ ਚਾਇਨਾ ਡੋਰ ਵੇਚਣ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇ।
ਇਸ ਸਾਲ ਚਾਇਨਾ ਡੋਰ ਨੇ ਲੈ ਲਈਆਂ ਦੋ ਜਾਨਾਂ
ਅੰਮ੍ਰਿਤਸਰ ਦੇ ਅਜਨਾਲਾ ਨੇੜੇ ਪਹਿਲਾਂ ਹੀ ਇੱਕ 19 ਸਾਲਾ ਨੌਜਵਾਨ ਪਵਨਦੀਪ ਸਿੰਘ ਦੀ ਗਲਾ ਕੱਟ ਜਾਣ ਕਾਰਨ ਮੌਤ ਹੋ ਚੁੱਕੀ ਹੈ।
ਦੂਜੀ ਘਟਨਾ ਐਲੀਵੇਟਿਡ ਰੋਡ ਫਲਾਈਓਵਰ 'ਤੇ ਵਾਪਰੀ ਸੀ, ਜਿੱਥੇ ਸ਼ਮਸ਼ੇਰ ਸਿੰਘ (40) ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ ਸੀ।
ਲਗਾਤਾਰ ਵੱਧ ਰਹੀਆਂ ਅਜਿਹੀਆਂ ਘਟਨਾਵਾਂ ਨੇ ਪ੍ਰਸ਼ਾਸਨ 'ਤੇ ਦਬਾਅ ਵਧਾ ਦਿੱਤਾ ਹੈ ਕਿ ਚਾਇਨਾ ਡੋਰ ਦੀ ਵਿਕਰੀ 'ਤੇ ਤੁਰੰਤ ਪਾਬੰਦੀ ਲਗਾ ਕੇ ਕੜੀ ਨਿਗਰਾਨੀ ਕੀਤੀ ਜਾਵੇ।