ਪਟਿਆਲਾ, 2 ਅਗਸਤ 2025 – ਪਟਿਆਲਾ ਜ਼ਿਲ੍ਹੇ ਦੇ ਪਿੰਡ ਰਵਾਸ ਬ੍ਰਾਹਮਣਾਂ ਦੇ ਇੱਕ ਪਿੱਗ ਫਾਰਮ ਵਿੱਚ ਅਫਰੀਕਨ ਸਵਾਈਨ ਫੀਵਰ ਦੀ ਪੁਸ਼ਟੀ ਹੋਣ ਤੋਂ ਬਾਅਦ ਜ਼ਿਲ੍ਹਾ ਪ੍ਰਸ਼ਾਸਨ ਅਲਰਟ ‘ਤੇ ਆ ਗਿਆ ਹੈ। ਡਿਪਟੀ ਕਮਿਸ਼ਨਰ ਡਾ. ਪ੍ਰੀਤੀ ਯਾਦਵ ਨੇ ਜ਼ਿਲ੍ਹੇ ਦੇ ਸਮੂਹ ਸੂਰ ਪਾਲਕਾਂ ਨੂੰ ਬਿਮਾਰੀ ਨੂੰ ਲੈ ਕੇ ਜ਼ਰੂਰੀ ਸਾਵਧਾਨੀਆਂ ਵਰਤਣ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਇੱਕ ਛੂਤੀ ਵਿਸ਼ਾਣੂ ਬਿਮਾਰੀ ਹੈ ਜੋ ਸਿਰਫ ਸੂਰਾਂ ਵਿੱਚ ਹੀ ਹੁੰਦੀ ਹੈ ਅਤੇ ਮਨੁੱਖਾਂ ਵਿੱਚ ਨਹੀਂ ਫੈਲਦੀ।
ਡਾ. ਯਾਦਵ ਨੇ ਚਿਤਾਵਨੀ ਦਿੱਤੀ ਕਿ ਅਫਰੀਕਨ ਸਵਾਈਨ ਫੀਵਰ ਬਹੁਤ ਤੇਜ਼ੀ ਨਾਲ ਫੈਲਦਾ ਹੈ ਅਤੇ ਇਸ ਨਾਲ ਸੂਰਾਂ ਦੀ ਮੌਤ ਦੀ ਦਰ 100 ਫੀਸਦੀ ਹੈ। ਇਸੇ ਕਾਰਨ ਪਸ਼ੂ ਪਾਲਣ ਵਿਭਾਗ ਵੱਲੋਂ ਇਸ ਨੂੰ ਰੋਕਣ ਲਈ ਵਿਸ਼ੇਸ਼ ਮੁਹਿੰਮ ਚਲਾਈ ਜਾ ਰਹੀ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਲਾਗ ਵਾਲੇ ਖੇਤਰ ਦੀ ਘੋਸ਼ਣਾ ਕਰਦਿਆਂ ਰਵਾਸ ਬ੍ਰਾਹਮਣਾਂ ਪਿੰਡ ਤੋਂ 1 ਕਿਲੋਮੀਟਰ ਤੱਕ ਇਲਾਕਾ ਇਨਫੈਕਟਿਡ ਜ਼ੋਨ ਅਤੇ 1 ਤੋਂ 10 ਕਿਲੋਮੀਟਰ ਤੱਕ ਨਿਗਰਾਨੀ ਜ਼ੋਨ ਵਜੋਂ ਐਲਾਨ ਕੀਤਾ ਹੈ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪਟਿਆਲਾ ਦੇ ਡਿਪਟੀ ਡਾਇਰੈਕਟਰ ਪਸ਼ੂ ਪਾਲਣ ਡਾ. ਰਾਜੀਵ ਗਰੋਵਰ ਨੇ ਦੱਸਿਆ ਕਿ ਬਿਮਾਰੀ ਦੀ ਪੁਸ਼ਟੀ ਹੋਣ ਤੋਂ ਬਾਅਦ ਮਰੀਜ਼ ਸੂਰਾਂ ਤੋਂ ਤੰਦਰੁਸਤ ਪਸ਼ੂਆਂ ਨੂੰ ਬਚਾਉਣ ਲਈ ਸੈਂਪਲਿੰਗ ਸ਼ੁਰੂ ਕਰ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਇਹ ਰੋਗ ਬਿਮਾਰ ਸੂਰਾਂ, ਉਨ੍ਹਾਂ ਦੀ ਫੀਡ, ਸਾਜੋ-ਸਾਮਾਨ ਜਾਂ ਆਵਾਜਾਈ ਰਾਹੀਂ ਫੈਲ ਸਕਦਾ ਹੈ, ਪਰ ਇਹ ਮਨੁੱਖਾਂ ਲਈ ਘਾਤਕ ਨਹੀਂ। ਇਸ ਲਈ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਹੈ।
ਡਾ. ਗਰੋਵਰ ਨੇ ਪigg ਫਾਰਮ ਮਾਲਕਾਂ ਨੂੰ ਸੂਚਿਤ ਕੀਤਾ ਕਿ ਉਹ ਪਸ਼ੂ ਪਾਲਣ ਵਿਭਾਗ ਵੱਲੋਂ ਜਾਰੀ ਕੀਤੀਆਂ ਬਾਇਓਸਕਿਊਰਟੀ ਹਿਦਾਇਤਾਂ ਦੀ ਪਾਲਣਾ ਯਕੀਨੀ ਬਣਾਉਣ। ਫਾਰਮਾਂ ਤੇ ਮਨੁੱਖੀ ਆਵਾਜਾਈ ਅਤੇ ਸੂਰਾਂ ਜਾਂ ਉਨ੍ਹਾਂ ਦੇ ਮੀਟ ਪਦਾਰਥ ਦੀ ਅਣਲੋੜੀਂਦੀ ਆਮਦ-ਰਫਤ ਤੋਂ ਗੁਰੇਜ਼ ਕਰਨ ਦੀ ਸਖ਼ਤ ਲੋੜ ਹੈ।