ਬਰਨਾਲਾ 9 ਅਗਸਤ (ਬਘੇਲ ਸਿੰਘ ਧਾਲੀਵਾਲ/ਚਮਕੌਰ ਸਿੰਘ ਗੱਗੀ) ਮਾਲਵੇ ਦੇ ਕੇਂਦਰ ਬਿੰਦੂ ਕਹੇ ਜਾਂਦੇ ਜਿਲਾ ਬਰਨਾਲਾ ਚ ਪਾਖੰਡ ਤੇ ਮਨਮੱਤ ਨਾਲ ਜੋੜ ਕੇ ਆਰਥਿਕ ਲਾਹਾ ਲੈਣ ਵਾਲੇ ਬਾਬਿਆਂ ਦੀ ਕਾਫੀ ਜਿਆਦਾ ਭਰਮਾਰ ਤਾਂ ਹੈ ਹੀ, ਬਲਕਿ ਇਥੇ ਦੇਸੀ ਵੈਦਗਿਰੀ ਦੀ ਆੜ ਹੇਠ, ਮਰਦਾਨਾ ਕਮਜੋਰੀ, ਨਸ਼ਾ ਛੜਾਉਣ ਅਤੇ ਗੋਡਿਆਂ ਦੇ ਦਰਦਾਂ ਆਦਿ ਬਿਮਾਰੀਆਂ ਦੇ ਇਲਾਜ ਦਾ ਗੁੰਮਰਾਹਕੁਨ ਢੰਡੋਰਾ ਪਿੱਟ ਕੇ ਲੋਕਾਂ ਦੀ ਖੂਬ ਆਰਥਿਕ ਲੁੱਟ ਕੀਤੀ ਜਾ ਰਹੀ ਹੈ। ਪਰ ਜਿਲੇ ਦਾ ਸਿਹਤ ਵਿਭਾਗ ਕੁੰਭਕਰਨੀ ਨੀਂਦ ਸੁੱਤਾ ਪਿਆ ਜਾਪਦਾ ਹੈ। ਬਰਨਾਲਾ ਤੋਂ ਰਾਏਕੋਟ ਹਾਈਵੇਅ ਤੇ ਕਈ ਲੁੱਟ ਦੀਆਂ ਦੁਕਾਨਾਂ ਸਥਾਪਿਤ ਹੋ ਚੁੱਕੀਆਂ ਹਨ। ਮੌਕੇ ਤੇ ਜਾ ਕੇ ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਦੇਖਿਆ ਗਿਆ ਕਿ ਇੱਕ ਦੁਕਾਨ ਤੇ ਤਾਂ ਹਜ਼ਾਰਾਂ ਦੀਆਂ ਗੱਲਾਂ ਹੋ ਰਹੀਆਂ ਸਨ, ਕਿਉਕਿ ਦਵਾਈਆਂ ਵੇਚਣ ਵਾਲਾ ਬਾਬਾ ਕਹਿ ਰਿਹਾ ਸੀ ਕਿ ਅਸੀਂ ਵਿਦੇਸ਼ਾਂ ਚ ਵੀ ਦਵਾਈ ਭੇਜਦੇ ਹਾਂ ਤੇ ਵਿਦੇਸ਼ ਜਾ ਰਹੇ ਐਨ.ਆਰ.ਆਈ ਲੋਕਾਂ ਨੂੰ ਗੁੰਮਰਾਹ ਕਰਕੇ ਆਰਥਿਕ ਸ਼ੋਸ਼ਣ ਕੀਤਾ ਜਾ ਰਿਹਾ ਹੈ। ਨਸ਼ਾ ਛੜਾਉਣ ਦੇ ਨਾਮ ਤੇ ਚੱਲ ਰਹੀਆਂ ਦੁਕਾਨਾਂ ਵੱਲ ਸਿਹਤ ਵਿਭਾਗ ਵੱਲੋਂ ਧਿਆਨ ਦੇਣਾ ਹੁੰਦਾ ਹੈ, ਪਰ ਇਥੇ ਤੇ ਇਹ ਕੰਮ ਸਿਹਤ ਵਿਭਾਗ ਦੀ ਛਤਰ ਛਾਇਆ ਹੇਠ ਹੀ ਚੱਲ ਰਿਹਾ ਜਾਪਦਾ ਹੈ। ਅਜਿਹਾ ਬੇਨਿਜਮੀ ਗੋਰਖ ਧੰਦਾ ਕਰਨ ਵਾਲੇ ਬਹੁਤ ਸਾਰੇ ਲੋਕ ਤਾਂ ਕਰੋੜਾਂਪਤੀ ਬਣ ਚੁੱਕੇ ਹਨ, ਪ੍ਰੰਤੂ ਪੀੜਤ ਲੋਕ ਜਿੱਥੇ ਬਿਮਾਰੀਆਂ ਨਾਲ ਜੂਝ ਰਹੇ ਹਨ, ਉਥੇ ਆਰਥਿਕ ਲੁੱਟ ਦਾ ਵੀ ਸ਼ਿਕਾਰ ਹੋ ਰਹੇ ਹਨ। ਲੋਕਾਂ ਦੀ ਲੁੱਟ ਕਰਕੇ ਕਰੋੜਪਤੀ ਬਣੇ ਇਨਾਂ ਵੈਦਗਿਰੀ ਦੀ ਆੜ ਵਿੱਚ ਗੋਰਖ ਧੰਦਾ ਕਰਨ ਵਾਲੇ ਲੋਕਾਂ ਵੱਲ ਅਤੇ ਭਿ੍ਰਸ਼ਟ ਸਿਹਤ ਅਧਿਕਾਰੀਆਂ ਵੱਲ ਸਬੰਧਿਤ ਵਿਭਾਗ ਤੇ ਵੱਡੇ ਵੱਡੇ ਵਾਅਦੇ ਕਰਕੇ ਸੱਤਾ ਚ ਪਹੁੰਚੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਕੀ ਇਸ ਪਾਸੇ ਧਿਆਨ ਦੇਵੇਗੀ? ਇਹ ਦੇਖਣਾ ਹੋਵੇਗਾ।