ਜਲੰਧਰ
ਥਾਣਾ ਇਕ ਅਧੀਨ ਆਉਂਦੀ ਨਵੀਂ ਸਬਜ਼ੀ ਮੰਡੀ ਮਕਸੂਦਾਂ ਦੇ ਨਜ਼ਦੀਕ ਸਥਿਤ ਬਿਜਲੀ ਘਰ ਦੇ ਬਿਲਕੁਲ ਸਾਹਮਣੇ ਸੈਂਟਰਲ ਬੈਂਕ ਦੇ ਬਾਹਰ ਦਿਨ ਦਿਹਾੜੇ ਮਹਿਲਾ ਅਧਿਆਪਕ ਕੋਲੋਂ ਦੋ ਐਕਟੀਵਾ ਸਵਾਰ ਲੁਟੇਰੇ ਪਰਸ ਖੋਹ ਕੇ ਫ਼ਰਾਰ ਹੋ ਗਏ। ਲੁੱਟ ਖੋਹ ਦਾ ਸ਼ਿਕਾਰ ਹੋਈ ਐੱਨਆਈਟੀ ਕਾਲਜ ਦੇ ਨਜ਼ਦੀਕ ਸਥਿਤ ਸੇਂਟ ਸੋਲਜਲ ਸਕੂਲ 'ਚ ਅੰਗਰੇਜ਼ੀ ਵਿਸ਼ੇ ਦੀ ਅਧਿਆਪਕ ਮੀਨਾਕਸ਼ੀ ਵਾਸੀ ਗੁਰਜੇਪਾਲ ਨਗਰ ਨੇ ਦੱਸਿਆ ਕਿ ਉਹ ਦੁਪਹਿਰ ਵੇਲੇ ਮਕਸੂਦਾਂ ਵਿਖੇ ਸਥਿਤ ਸੈਂਟਰਲ ਬੈਂਕ ਦੇ ਏਟੀਐੱਮ 'ਚੋਂ ਪੈਸੇ ਕਢਵਾਉਣ ਆਈ ਸੀ ਪਰ ਏਟੀਐੱਮ 'ਚੋਂ ਪੈਸੇ ਨਹੀਂ ਨਿਕਲੇ ਤੇ ਜਦ ਉਹ ਉਥੋਂ ਬਾਹਰ ਨਿਕਲੀ ਤਾਂ ਐਕਟੀਵਾ 'ਤੇ ਸਵਾਰ ਦੋ ਨੌਜਵਾਨਾਂ 'ਚੋਂ ਇਕ ਨੌਜਵਾਨ ਆਪਣੀ ਐਕਟੀਵਾ ਸਟਾਰਟ ਕਰ ਕੇ ਖੜ੍ਹਾ ਰਿਹਾ ਤੇ ਉਸ ਦੇ ਪਿੱਛੇ ਬੈਠੇ ਨੌਜਵਾਨ ਨੇ ਉਸ ਦਾ ਪਰਸ ਝਪਟ ਲਿਆ।
ਉਸ ਨੇ ਦੱਸਿਆ ਕਿ ਉਸ ਵੱਲੋਂ ਲੁਟੇਰਿਆਂ ਦਾ ਪਿੱਛਾ ਕਰਨ ਦੇ ਨਾਲ-ਨਾਲ ਰੌਲਾ ਵੀ ਪਾਇਆ ਪਰ ਉੱਥੇ ਮੌਜੂਦ ਲੋਕ ਉਸ ਦੀ ਮਦਦ ਲਈ ਅੱਗੇ ਨਹੀਂ ਆਏ ਤੇ ਜਦ ਤੱਕ ਆਸ-ਪਾਸ ਦੇ ਦੁਕਾਨਦਾਰਾਂ ਰੌਲਾ ਪੈਣ ਸੁਣ ਕੇ ਬਾਹਰ ਆਏ ਤਦ ਤੱਕ ਲੁਟੇਰੇ ਨਵੀਂ ਸਬਜੀ ਮੰਡੀ ਵੱਲ ਫ਼ਰਾਰ ਹੋ ਗਏ ਸਨ। ਅਧਿਆਪਕ ਮੀਨਾਕਸ਼ੀ ਨੇ ਦੱਸਿਆ ਕਿ ਉਸ ਦੇ ਪਰਸ 'ਚ ਜ਼ਰੂਰੀ ਸਰਕਾਰੀ ਕਾਗਜਾਤ, ਪਛਾਣ ਕਾਰਡ, ਦੋ ਮੋਬਾਈਲ, ਨਕਦੀ, ਘਰ ਦੀਆਂ ਚਾਬੀਆਂ, ਲਾਕਰ ਦੀਆਂ ਚਾਬੀਆਂ ਵੀ ਸੀ। ਪੀੜਤ ਵੱਲੋਂ ਘਟਨਾ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ ਗਈ। ਜਿਸ ਦੌਰਾਨ ਮੌਕੇ 'ਤੇ ਥਾਣਾ 1 ਦੀ ਪੁਲਿਸ ਵੱਲੋਂ ਜਾਂਚ ਆਰੰਭੀ ਗਈ। ਇਹ ਸਾਰੀ ਘਟਨਾ ਸੀਸੀਟੀਵੀ 'ਚ ਕੈਦ ਹੋਈ ਹੈ। ਇਸ ਸਬੰਧੀ ਥਾਣਾ-1 ਦੇ ਥਾਣੇਦਾਰ ਜਸਵਿੰਦਰ ਸਿੰਘ ਦਾ ਕਹਿਣਾ ਹੈ ਕਿ ਸੀਸੀਟੀਵੀ ਕੈਦ ਹੋਈ ਲੁਟੇਰਿਆਂ ਦੀ ਫੁਟੇਜ ਦੇ ਆਧਾਰ 'ਤੇ ਉਨ੍ਹਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।