ਯੂਨੀਵਰਸਿਟੀ ਦੇ ਸਕਿਓਰਟੀ ਗਾਰਡ ਨਾਲ ਭੱਜੀ ਧੀ, ਪਿਉ ਨੇ ਲਿਆ ਫਾਹਾ

 ਜਗਰਾਉਂ : ਜਗਰਾਉਂ ਨੇੜੇ ਯੂਨੀਵਰਸਿਟੀ ਦੇ ਕਾਲ ਸੈਂਟਰ ਦੀ ਆਪਰੇਟਰ ਦੇ ਯੂਨੀਵਰਸਿਟੀ ਦੇ ਹੀ ਸਿਕਿਉਰਟੀ ਗਾਰਡ ਨਾਲ ਭੱਜ ਜਾਣ ਦੇ ਦੁੱਖੋਂ ਉਸਦੇ ਪਿਓ ਨੇ ਘਰ ਵਿੱਚ ਫਾਹਾ ਲੈ ਲਿਆ। ਜਾਣਕਾਰੀ ਅਨੁਸਾਰ ਪਿੰਡ ਬਰਸਾਲ ਵਾਸੀ ਟਰੱਕ ਆਪਰੇਟਰ ਪਿਛਲੇ ਕਈ ਦਿਨਾਂ ਤੋਂ ਟਰੱਕ ਲੈ ਕੇ ਪੰਜਾਬ ਤੋਂ ਬਾਹਰਲੇ ਸੂਬਿਆਂ 'ਚ ਗੇੜਾ ਲਗਾਉਣ ਗਿਆ ਸੀ। ਪਿੱਛੋਂ ਉਸ ਦੀ ਧੀ ਜੋ ਕਿ ਇਕ ਯੂਨੀਵਰਸਿਟੀ ਦੇ ਕਾਲ ਸੈਂਟਰ 'ਚ ਬਤੌਰ ਆਪਰੇਟਰ ਨੌਕਰੀ ਕਰਦੀ ਸੀ। ਯੂਨੀਵਰਸਿਟੀ ਦੇ ਹੀ ਸਕਿਓਰਟੀ ਗਾਰਡ ਨਾਲ ਕੁਝ ਦਿਨ ਪਹਿਲਾਂ ਵਿਆਹ ਕਰਵਾਉਣ ਚਲੀ ਗਈ। ਉਸਦੇ ਘਰ ਨਾ ਪਹੁੰਚਣ 'ਤੇ ਪਰਿਵਾਰ ਕਈ ਦਿਨਾਂ ਤੋਂ ਭਾਲ ਕਰ ਰਿਹਾ ਸੀ ਤੇ ਇਸ ਦੀ ਪੁਲਿਸ ਨੂੰ ਵੀ ਸੂਚਨਾ ਦਿੱਤੀ। ਜਾਂਚ ਦੌਰਾਨ ਸਾਹਮਣੇ ਆਇਆ ਕਿ ਕਾਲ ਸੈਂਟਰ ਦੀ ਆਪਰੇਟਰ ਯੂਨੀਵਰਸਿਟੀ ਦੇ ਹੀ ਸਕਿਓਰਿਟੀ ਗਾਰਡ ਨਾਲ ਵਿਆਹ ਕਰਵਾਉਣ ਚਲੀ ਗਈ। ਇੱਥੇ ਇਹ ਵੀ ਵਰਣਨ ਯੋਗ ਹੈ ਕਿ ਉਕਤ ਦੋਵੇਂ ਜਿੱਥੇ ਇੱਕੋ ਯੂਨੀਵਰਸਿਟੀ 'ਚ ਕੰਮ ਕਰਦੇ ਸਨ ਉੱਥੇ ਹੀ ਇੱਕੋ ਪਿੰਡ ਦੇ ਰਹਿਣ ਵਾਲੇ ਹਨ। ਟਰੱਕ ਲੈ ਕੇ ਘਰ ਪੁੱਜੇ ਪਿਤਾ ਨੂੰ ਜਦੋਂ ਧੀ ਦੇ ਪਿੰਡ ਦੇ ਹੀ ਮੁੰਡੇ ਨਾਲ ਦੌੜ ਜਾਣ ਬਾਰੇ ਪਤਾ ਲੱਗਾ ਤਾਂ ਉਨ੍ਹਾਂ ਘਰ 'ਚ ਹੀ ਚੁੰਨੀ ਨਾਲ ਫਾਹਾ ਲੈ ਕੇ ਆਤਮਹੱਤਿਆ ਕਰ ਲਈ। ਇਸ ਮਾਮਲੇ 'ਚ ਜਗਰਾਓਂ ਥਾਣਾ ਸਦਰ ਦੀ ਪੁਲਿਸ ਨੇ ਮੁਕੱਦਮਾ ਦਰਜ ਕਰ ਲਿਆ।