ਕੰਧ ਟੱਪ ਕੇ ਸਰਕਾਰੀ ਸਕੂਲ 'ਚ ਦਾਖ਼ਲ ਹੋਇਆ ਨਸ਼ੇੜੀ, ਬੱਚੀਆਂ ਦੇ ਮਾਰੇ ਥੱਪੜ, ਨਾਲੇ ਘੁੱਟਿਆ ਗਲ਼ਾ

ਪਟਿਆਲਾ

ਨੇੜਲੇ ਪਿੰਡ ਸ਼ੇਰਮਾਜਰਾ ਵਿਖੇ ਨਸ਼ੇ 'ਚ ਟੱਲੀ ਵਿਅਕਤੀ ਨੇ ਸਰਕਾਰੀ ਸਕੂਲ ਵਿਚ ਦਾਖ਼ਲ ਹੋ ਕੇ ਬੱਚਿਆਂ ਦੀ ਕੁੱਟਮਾਰ ਕੀਤੀ। ਨਸ਼ੇੜੀ ਦੇ ਸਾਹਮਣੇ ਜਿਹੜਾ ਵੀ ਬੱਚਿਆ ਆਇਆ ਉਸਦੇ ਥੱਪੜ ਮਾਰਨ ਦੇ ਨਾਲ ਗਲ਼ਾ ਘੁੱਟਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ। ਭੱਜ ਦੌੜ ਮਚੀ ਤਾਂ ਸਕੂਲ ਦੇ ਅਧਿਆਪਕ ਨੇ ਮਦਦ ਲਈ ਪੁਲਿਸ ਚੌਕੀ ਵਿਚ ਸੰਪਰਕ ਕੀਤਾ ਤਾਂ ਤੁਰੰਤ ਮੁਲਾਜ਼ਮ ਭੇਜਣ ਦੀ ਬਜਾਏ ਸਕੂਲ ਤੋਂ ਲਿਖਤੀ ਸ਼ਿਕਾਇਤ ਆਉਣ ਤੋਂ ਬਾਅਦ ਸਕੂਲ ਪੁੱਜਣ ਦੀ ਗੱਲ ਕਹਿ ਦਿੱਤੀ। ਆਖ਼ਰਕਾਰ ਅਧਿਆਪਕਾਂ ਵੱਲੋਂ 100 ਨੰਬਰ 'ਤੇ ਫੋਨ ਕਰਨ 'ਤੇ ਕਰੀਬ ਪੌਣੇ ਘੰਟੇ ਬਾਅਦ ਪੁਲਿਸ ਸਕੂਲ ਵਿਚ ਪੁੱਜੀ ਤੇ ਮੁਲਜ਼ਮ ਨੂੰ ਫੜ ਕੇ ਥਾਣੇ ਲੈ ਗਈ। ਇਸ ਵਾਰਦਾਤ ਤੋਂ ਬਾਅਦ ਜਿਥੇ ਸਕੂਲੀ ਵਿਦਿਆਰਥੀਆਂ ਵਿਚ ਸਹਿਮ ਦਾ ਮਾਹੌਲ ਹੈ ਉਥੇ ਹੀ ਅਧਿਆਪਕ ਵੀ ਘਬਰਾਏ ਹੋਏ ਹਨ, ਕਿਉਂਕਿ ਬੱਚਿਆਂ 'ਤੇ ਹਮਲਾ ਕਰਨ ਵਾਲਾ ਵਿਅਕਤੀ ਸਕੂਲ ਦੇ ਨੇੇੜੇ ਹੀ ਰਹਿੰਦਾ ਹੈ। ਚੌਕੀ ਇੰਚਾਰਜ ਜਗਦੀਸ਼ ਸਿੰਘ ਨੇ ਕਿਹਾ ਕਿ ਪੁਲਿਸ ਤੁਰੰਤ ਮੌਕੇ 'ਤੇ ਪੁੱਜੀ ਹੈ ਤੇ ਮੁਲਜ਼ਮ ਨਿਸ਼ੂ ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ ਤੇ ਸਕੂਲ ਪਿੰ੍ਸੀਪਲ ਦੀ ਸ਼ਿਕਾਇਤ 'ਤੇ ਸਕੂਲ 'ਚ ਹੰਗਾਮਾ ਕਰਨ ਵਾਲੇ ਨਿਸ਼ੂ ਨਾਮੀ ਵਿਅਕਤੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ।

ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਦੇ ਅਧਿਆਪਕ ਨਵਜੀਤ ਕੌਰ ਨੇ ਦੱਸਿਆ ਕਿ ਸਵੇਰੇ ਨਿਸ਼ੂ ਨਾਮ ਦੇ ਵਿਅਕਤੀ ਸਕੂਲ ਦਾ ਗੇਟ ਟੱਪ ਕੇ ਅੰਦਰ ਦਾਖ਼ਲ ਹੋਇਆ ਜੋਕਿ ਨਸ਼ੇ ਦੀ ਹਾਲਤ 'ਚ ਸੀ। ਪੇਪਰ ਸ਼ੁਰੂ ਹੋਣ ਵਾਲਾ ਸੀ, ਇਸੇ ਦੌਰਾਨ ਵਿਅਕਤੀ ਨੇ ਬੱਚੀਆਂ ਨੂੰ ਫੜ ਫੜ ਕੇ ਕੁੱਟਣਾ ਸ਼ੁਰੂ ਕਰ ਦਿੱਤਾ। ਸਕੂਲ ਦੇ ਵੱਡੇ ਵਿਦਿਆਰਥੀਆਂ ਨੇ ਵਿਅਕਤੀ ਨੂੰ ਕਾਬੂ ਕੀਤਾ ਤੇ ਸਕੂਲ ਤੋਂ ਬਾਹਰ ਕੱਿਢਆ। ਇਸ ਤੋਂ ਬਾਅਦ ਵੀ ਇਹ ਵਿਅਕਤੀ ਡੰਡਾ ਲੈ ਕੇ ਸਕੂਲ ਵਿਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰਦਾ ਰਿਹਾ। ਨਵਜੀਤ ਕੌਰ ਨੇ ਦੱਸਿਆ ਕਿ ਜਦੋਂ ਇਸ ਬਾਰੇ ਡਕਾਲਾ ਪੁਲਿਸ ਚੌਕੀ ਵਿਚ ਫੋਨ ਕਰ ਕੇ ਸੂਚਨਾ ਦਿੱਤੀ ਤਾਂ ਉਨ੍ਹਾਂ ਕਿਹਾ ਕਿ ਪਹਿਲਾਂ ਲਿਖਤੀ ਸ਼ਿਕਾਇਤ ਭੇਜੋ ਫਿਰ ਮੁਲਾਜ਼ਮ ਭੇਜਿਆ ਜਾਵੇਗਾ। ਕੋਈ ਹੋਰ ਵਾਰਦਾਤ ਹੋਣ ਦੇ ਡਰੋਂ ਤੁਰੰਤ 100 ਨੰਬਰ 'ਤੇ ਫੋਨ ਕਰ ਕੇ ਸਕੂਲ ਵਿਚ ਹੋਈ ਘਟਨਾ ਤੇ ਚੌਕੀ ਮੁਲਾਜ਼ਮਾਂ ਦੇ ਰੱਵਈਏ ਤੋਂ ਜਾਣੂ ਕਰਵਾਇਆ, ਜਿਸ ਤੋਂ ਤੁਰੰਤ ਬਾਅਦ ਪੁਲਿਸ ਮੁਲਾਜ਼ਮ ਸਕੂਲ ਵਿਚ ਪੁੱਜੀ ਤੇ ਮੁਲਜ਼ਮ ਨੂੰ ਨਾਲ ਲੈ ਗਈ। ਸੱਤਵੀਂ ਜਮਾਤ ਦੇ ਵਿਦਿਆਰਥੀ ਜਾਨਵੀਰ ਸਿੰਘ ਨੇ ਦੱਸਿਆ ਕਿ ਵਿਅਕਤੀ ਨੇ ਕਲਾਸ ਵਿਚ ਦਾਖ਼ਲ ਹੋ ਕੇ ਕੁੜੀਆਂ ਦੇ ਥੱਪੜ ਮਾਰਨੇ ਸ਼ੁਰੂ ਕਰ ਦਿੱਤਾ। ਜਸਮੀਨ ਕੌਰ ਨੇ ਦੱਸਿਆ ਕਿ ਉਸਦੇ ਥੱਪੜ ਮਾਰਿਆ ਤੇ ਫਿਰ ਇਕ ਇਕ ਕਰਕੇ ਹੋਰ ਵਿਦਿਆਰਥੀਆਂ ਨੂੰ ਮਾਰਨਾ ਸ਼ੁਰੂ ਕਰ ਦਿੱਤਾ। ਵਿਦਿਆਰਥੀ ਨੇ ਮੁਹੰਮਦ ਨੇ ਦੱਸਿਆ ਕਿ ਵਿਅਕਤੀ ਨਸ਼ੇ ਵਿਚ ਸੀ ਤੇ ਉਸਨੇ ਕਲਾਸ ਵਿਚ ਆਉਣ ਸਾਰ ਗਲ਼ਾ ਘੁੱਟ ਦਿੱਤਾ।