ਧਨੌਲਾ, 2 ਮਈ (ਚਮਕੌਰ ਸਿੰਘ ਗੱਗੀ)-ਅੱਜ ਬਾਅਦ ਦੁਪਹਿਰ ਧਨੌਲਾ ਨੇੜੇ ਪਿੰਡ ਅਤਰ ਸਿੰਘ ਵਾਲਾ ਰੋਡ ਵਿਖੇ ਕਣਕ ਦੇ ਨਾੜ ਨੂੰ ਲੱਗੀ ਅੱਗ ਨਾਲ 200 ਏਕੜ ਦੇ ਕਰੀਬ ਨਾੜ ਸੜ ਕੇ ਸੁਆਹ ਹੋ ਗਿਆ ਬੜੀ ਮੁਸ਼ੱਕਤ ਨਾਲ ਅੱਗ ਬੁਝਾਊ ਦਸਤੇ ਨੇ ਅੱਗ ਤੇ ਕਾਬੂ ਪਾਇਆ। ਮੌਕੇ ਤੇ ਇਕੱਤਰ ਕੀਤੀ ਜਾਣਕਾਰੀ ਅਨੁਸਾਰ ਸਥਾਨਕ ਲੋਕਾਂ ਨੇ ਦੱਸਿਆ ਕਿ ਇਹ ਅੱਗ ਧਨੌਲਾ ਭੀਖੀ ਰੋਡ ਤੋਂ ਗੁਰਦੁਆਰਾ ਸ਼ਹੀਦ ਬਾਬਾ ਨੱਥਾ ਸਿੰਘ ਦੇ ਬਣੇ ਗੇਟ ਕੋਲੋਂ ਚਲ ਕੇ ਪਿੰਡ ਅਤਰ ਸਿੰਘ ਵਾਲਾ ਦੇ ਨਜ਼ਦੀਕ ਪਹੁੰਚ ਗਈ। ਕਣਕ ਦੀ ਨਾੜ ਨੂੰ ਅੱਗ ਲੱਗਣ ਦਾ ਗੁਰਦੁਆਰਾ ਸਾਹਿਬ ਤੋ ਹੋਈ ਅਨਾਊਂਸਮੈਂਟ ਤੇ ਲੋਕਾਂ ਨੂੰ ਪਤਾ ਲੱਗਿਆ।
ਕਣਕ ਦਾ ਨਾੜ ਸੁਕਾ ਹੋਣ ਕਰਕੇ ਅੱਗ ਬਹੁਤ ਤੇਜੀ ਨਾਲ ਅੱਗੇ ਫੈਲ ਰਹੀ ਸੀ ਇਸ ਨੂੰ ਰੋਕਣ ਲਈ ਉਕਤ ਵਿਅਕਤੀਆਂ ਨੇ ਆਪਣੀਆ ਜਾਨਾਂ ਦੀ ਪ੍ਰਵਾਹ ਨਾ ਕਰਦੇ ਹੋਏ ਆਪਣੇ ਆਪਣੇ ਟਰੈਕਟਰਾਂ ਤੇ ਤਵੀਆਂ ਅਤੇ ਹਲਾਂ ਨਾਲ ਅੱਗ ਦੇ ਵਿੱਚ ਵਾੜ ਦਿੱਤਾ ਪਰ ਅੱਗ ਅੱਗੇ ਵਧਦੀ ਗਈ ਹਵਾ ਦਾ ਰੁੱਖ ਇਧਰ ਨੂੰ ਹੋਣ ਕਰਕੇ ਅੱਗ ਹੋਰ ਤੇਜ ਹੁੰਦੀ ਗਈ। ਉਸ ਸਮੇਂ ਜਲਦੀ ਨਾਲ ਹੀ ਬਰਨਾਲਾ ਤੋਂ ਆਏ ਅੱਗ ਬੁਜਾਓ ਦਸਤੇ ਦੀ ਇਕ ਗੱਡੀ ਆ ਗਈ ਜਿਸ ਦੇ ਮੁਲਾਜ਼ਮਾਂ ਨੇ ਆਪਣੀ ਫੁਰਤੀ ਦਿਖਾਉਂਦਿਆਂ ਪਾਣੀ ਦੀਆਂ ਵਾਛੜਾਂ ਨਾਲ ਅੱਗ ਤੇ ਕਾਬੂ ਪਾ ਲਿਆ ਗਿਆ ਪਰ ਉਸ ਵੇਲੇ ਜਦੋਂ ਕਿ ਪਰਮਿੰਦਰ ਸਿੰਘ ਪੰਮਾ ਪੁੱਤਰ ਸ਼ਿੰਗਾਰਾ ਸਿੰਘ ਦੀ 45 ਏਕੜ, ਲੱਖਾ ਸਿੰਘ ਪੁੱਤਰ ਨਿਰਮਲ ਸਿੰਘ ਦੀ ਦਸ ਏਕੇੜ ਅਵਤਾਰ ਸਿੰਘ ਪੁੱਤਰ ਚਰਨ ਸਿੰਘ ਦੀ 10 ਏਕੜ,ਗੁਰਚਰਨ ਸਿੰਘ ਹਰਬੰਸ ਸਿੰਘ ਦੀ 3 ਏਕੜ ਸਮੇਤ ਪੰਮਾ ਸਿੰਘ ਦੇ 12 ਕਿਲੇ ਅਤੇ ਹੋਰ ਕਿਸਾਨਾਂ ਦੀ 200 ਏਕੜ ਦੇ ਕਰੀਬ ਕਣਕ ਦਾ ਨਾੜ ਅੱਗ ਨਾਲ ਸੜ ਕੇ ਸਵਾਹ ਹੋ ਗਈ।
ਉਕਤ ਵਿਅਕਤੀਆਂ ਅਤੇ ਸਥਾਨਕ ਲੋਕਾਂ ਵੱਲੋਂ ਪੰਜਾਬ ਦੀ ਆਮ ਆਦਮੀ ਪਾਰਟੀ ਦੀ ਸਰਕਾਰ ਤੋਂ ਮੰਗ ਕਰਦਿਆਂ ਕਿਹਾ ਕਿ ਹੋਣੇ ਨੁਕਸਾਨ ਦਾ ਮੁਆਵਜਾ ਦਿੱਤਾ ਜਾਵੇ ਕਿਉਂਕਿ ਇਹਨਾਂ ਨੇ ਆਪਣੇ ਪਸ਼ੂਆਂ ਨੂੰ ਪਾਉਣ ਲਈ ਹੁਣ ਤੂੜੀ ਮੁੱਲ ਲੈਣੀ ਪਏਗੀ।