ਫਿਰੋਜ਼ਪੁਰ : ਅਣਜਾਨ ਢਾਬਿਆਂ 'ਤੇ ਰੋਟੀ ਪਾਣੀ ਖਾਣ-ਪੀਣ ਲਈ ਰੁਕਣ ਵਾਲੇ ਟਰੱਕ ਤੇ ਹੋਰ ਕਮਰਸ਼ੀਅਲ ਵਾਹਨ ਡਰਾਈਵਰਾਂ ਲਈ ਬੜੀ ਅਹਿਮ ਖਬਰ ਹੈ। ਫਿਰੋਜ਼ਪੁਰ ਵਿਖੇ ਠੇਕੇ 'ਤੇ ਪੰਜਾਬੀ ਢਾਬਾ ਚਲਾਉਣ ਵਾਲੇ ਅਜਿਹੇ ਹੀ ਇਕ ਵਿਅਕਤੀ ਵੱਲੋਂ ਢਾਬੇ 'ਤੇ ਰੁਕਣ ਵਾਲੇ ਟਰੱਕਾਂ ਅਤੇ ਵਹੀਕਲਾਂ ਤੋਂ ਡੀਜ਼ਲ ਅਤੇ ਪੈਟਰੋਲ ਚੋਰੀ ਕਰਨ ਦੇ ਦੋਸ਼ ਵਿੱਚ ਪੁਲਿਸ ਨੇ ਮਾਮਲਾ ਦਰਜ ਕੀਤਾ ਹੈ।ਥਾਣਾ ਘੱਲਖੁਰਦ ਪੁਲਿਸ ਨੇ ਉਕਤ ਵਿਅਕਤੀ ਕੋਲੋਂ ਚੋਰੀ ਕੀਤਾ ਹੋਇਆ 720 ਲੀਟਰ ਡੀਜ਼ਲ ਅਤੇ 210 ਲੀਟਰ ਪੈਟਰੋਲ ਬਰਾਮਦ ਕਰਦਿਆਂ ਉਸ ਖਿਲਾਫ 379 ਆਈਪੀਸੀ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਜਾਣਕਾਰੀ ਦਿੰਦੇ ਹੋਏ ਸਬ ਇੰਸਪੈਕਟਰ ਸਰਵਨ ਸਿੰਘ ਇੰਚਾਰਜ਼ ਪੁਲਿਸ ਚੌਕੀ ਮੁੱਦਕੀ ਨੇ ਦੱਸਿਆ ਕਿ ਉਨ੍ਹਾਂ ਦੀ ਪੁਲਿਸ ਪਾਰਟੀ ਬੀਤੇ ਦਿਨ ਗਸ਼ਤ ਵਾ ਚੈਕਿੰਗ ਦੇ ਸਬੰਧ ਵਿਚ ਮੁੱਦਕੀ ਵਿਖੇ ਮੌਜ਼ੂਦ ਸੀ ਤਾਂ ਇਸ ਦੌਰਾਨ ਖਾਸ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ਦੋਸ਼ੀ ਮੁਹੰਮਦ ਫੈਆਦ ਪੁੱਤਰ ਮੁਹੰਮਦ ਫਕਰੂਦੀਨ ਵਾਸੀ ਅਮਨਾ ਪੂਰਨਾ ਜ਼ਿਲ੍ਹਾ ਪੰਜਾਬੀ ਢਾਬਾ ਠੇਕੇ 'ਤੇ ਲੈ ਕੇ ਚਲਾਉਂਦਾ ਹੈ, ਜੋ ਢਾਬੇ ’ਤੇ ਆਉਣ ਵਾਲੇ ਟਰੱਕ, ਵ੍ਹੀਕਲ ਤੋਂ ਡੀਜ਼ਲ ਤੇ ਪੈਟਰੋਲ ਚੋਰੀ ਕਰ ਕੇ ਅੱਗੇ ਵੇਚਦਾ ਹੈ। ਉਕਤ ਵਿਅਕਤੀ ਨੇ ਚੋਰੀ ਕੀਤਾ ਹੋਇਆ ਤੇਲ ਡਰੰਮਾਂ 'ਚ ਪਾ ਕੇ ਢਾਬੇ ਵਿਚ ਬਣੇ ਕਮਰੇ ਵਿਚ ਲੁਕੋ ਕੇ ਰੱਖਿਆ ਹੈ। ਜੇਕਰ ਹੁਣੇ ਛਾਪੇਮਾਰੀ ਕੀਤੀ ਜਾਵੇ ਤਾਂ ਬਰਾਮਦ ਹੋ ਸਕਦਾ ਹੈ। ਪੁਲਿਸ ਪਾਰਟੀ ਵੱਲੋਂ ਛਾਪੇਮਾਰੀ ਕਰਕੇ ਮੌਕੇ ’ਤੇ 720 ਲੀਟਰ ਡੀਜ਼ਲ ਅਤੇ 210 ਲੀਟਰ ਪੈਟਰੋਲ ਬਰਾਮਦ ਕੀਤਾ ਗਿਆ। ਜਾਂਚਕਰਤਾ ਨੇ ਦੱਸਿਆ ਕਿ ਪੁਲਿਸ ਨੇ ਉਕਤ ਦੋਸ਼ੀ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ ।