ਫ਼ਿਲਮ ਅਦਾਕਾਰ- ਲਖਵਿੰਦਰ ਸਿੰਘ
ਅੱਜ ਪੀ. ਟੀ .ਸੀ . ਪੰਜਾਬੀ ਗੋਲਡ ਤੇ ਪ੍ਰਸਾਰਿਤ ਹੋਈ ਪੰਜਾਬੀ ਫ਼ਿਲਮ" ਢੋਲ ਰੱਤੀ " ਨੂੰ ਦੇਖਣ ਦਾ ਮੌਕਾ ਮਿਲਿਆ । ਮੈਂ ਸਾਰੀ ਫ਼ਿਲਮ ਸ਼ੁਰੂ ਤੋਂ ਅਖੀਰ ਤੱਕ ਦੇਖੀ ।ਸਾਰੇ ਦੇ ਸਾਰੇ ਪਾਤਰਾਂ ਦਾ ਕੰਮ ਬਹੁਤ ਸ਼ਲਾਘਾਯੋਗ ਸੀ । ਉਨ੍ਹਾਂ ਵਿਚੋਂ ਮੇਰੇ ਛੋਟੇ ਵੀਰ ਲਖਵਿੰਦਰ ਸਿੰਘ ਜੋ ਫ਼ਿਲਮ ਦਾ ਮੁੱਖ ਪਾਤਰ ਸੀ ਤੇ ਇੱਕ ਨਾਇਕ ਵਜੋਂ ਲਖਵਿੰਦਰ ਦੁਆਰਾ ਨਿਭਾਇਆ' ਢੋਲ ' ਦਾ ਕਿਰਦਾਰ ਬਾਕਮਾਲ ਸੀ । ਫ਼ਿਲਮ ਦੇਖ ਕੇ ਐਦਾਂ ਮਹਿਸੂਸ ਹੋਇਆ ਕਿ ਇਹ ਕਿਰਦਾਰ ਜਿਵੇਂ ਲਖਵਿੰਦਰ ਲਈ ਹੀ ਬਣਿਆ ਹੋਵੇ । ਉਸਨੇ ਆਪਣੇ ਕਿਰਦਾਰ ਨਾਲ ਸੱਚਮੁੱਚ ਹੀ ਨਿਆਂ ਕੀਤਾ ਹੈ । ਲਖਵਿੰਦਰ ਤੇ ਮੇਰੀ ਇਹ ਦੋਸਤੀ ਉਸ ਵੇਲੇ ਸ਼ੁਰੂ ਹੁੰਦੀ ਹੈ ਜਦੋਂ ਮੁੰਬਈ ਇਕ ਵਾਰ ਮੇਰੇ ਪਰਮ ਮਿੱਤਰ ਹਰਜੀਤ ਵਾਲੀਆ ਨੇ ਮੇਰੀ ਪਹਿਲੀ ਵਾਰ ਸਾਲ 2008 ਵਿੱਚ ਲੋਖੰਡਵਾਲਾ ਕੰਪਲੈਕਸ ਦੇ ਇਕ ਕੌਫ਼ੀ ਹਾਊਸ ਵਿੱਚ ਇਕ ਖ਼ੂਬਸੂਰਤ ਪੰਜਾਬੀ ਮੁੰਡੇ ਨਾਲ ਜਾਣ -ਪਛਾਣ ਕਰਾਉਂਦੇ ਹੋਏ ਕਿਹਾ ,"ਮੰਗਤ ਯਾਰ ! ਇਹ ਆਪਣਾ ਛੋਟਾ ਵੀਰ ਲਖਵਿੰਦਰ ਹੈ ਜੋ ਕਿ ਪੰਜਾਬੀ ਤੇ ਹਿੰਦੀ ਫ਼ਿਲਮਾਂ ਵਿਚ ਕੰਮ ਕਰ ਰਿਹਾ ਹੈ ,ਬਹੁਤ ਹੀ ਜਾਹੀਨ ਤੇ ਮਿਲਣਸਾਰ ਸੁਭਾਅ ਦਾ ਮਾਲਕ ਹੈ।" ਮੈਂ ਉਸ ਦੀ ਦਿੱਖ ਤੋਂ ਪ੍ਰਭਾਵਿਤ ਹੋਏ ਬਿਨਾਂ ਨਹੀਂ ਰਹਿ ਸਕਿਆ । ਉਸ ਤੋਂ ਬਾਅਦ ਬਹੁਤ ਵਾਰੀ ਇਸ ਨਾਲ ਮੁਲਾਕਾਤਾਂ ਦਾ ਸਬੱਬ ਬਣਿਆ ਤੇ ਇਸ ਨੇ ਆਪਣੀਆਂ ਕਈ ਫਿਲਮਾਂ ਦੇ ਸੈੱਟ ਤੇ ਵੀ ਖ਼ਾਸ ਤੌਰ ਤੇ ਸੱਦਾ ਭੇਜਿਆ ਜਿੰਨ੍ਹਾਂ ਵਿਚੋਂ ਮੈਂ ਦੇਵੀ ਸ਼ਰਮਾ ਦੀਆਂ ਦੋ ਫ਼ਿਲਮਾਂ 'ਕੰਟਰੀ ਸਾਈਡ ਗੁੰਡੇ'ਤੇ 'ਹਵੇਲੀ ਇਨ ਟਰੱਬਲ' ਫ਼ਿਲਮਾਂ ਦੀ ਸ਼ੂਟਿੰਗ ਦੌਰਾਨ ਉਥੇ ਹੀ ਸੀ ਤੇ ਜਦੋਂ ਵੀ ਸੈੱਟ ਤੇ ਮੈਂ ਜਾਂਦਾ ਸੀ ਲਖਵਿੰਦਰ ਨੇ 'ਭਾਜੀ- ਭਾਜੀ' ਕਹਿੰਦੇ ਜੱਫ਼ੀ ਪਾ ਲੈਣੀ । ਇਸ ਵਿਚ ਉਸਦੀ ਅਪਣੱਤ ਤੇ ਪਿਆਰ ਸਾਫ਼ ਨਜ਼ਰ ਆਉਂਦਾ ਸੀ। ਸ਼ਾਲਾ ! ਮੇਰਾ ਇਹ ਛੋਟਾ ਵੀਰ ਹੋਰ ਵੀ ਤਰੱਕੀਆਂ ਕਰੇ ।
ਆਮੀਨ !
ਮੰਗਤ ਗਰਗ