ਬਰਨਾਲਾ, 20 ਅਪ੍ਰੈਲ (ਬਘੇਲ ਸਿੰਘ ਧਾਲੀਵਾਲ)-ਨਸ਼ਿਆਂ ਦੇ ਮਾਮਲੇ ਵਿੱਚ ਬਰਨਾਲਾ ਪੁਲਿਸ ਦੀ ਕਾਰਗੁਜਾਰੀ ਚਰਚਾ ਵਿੱਚ ਰਹੀ ਹੈ | ਮੈਡੀਕਲ ਨਸ਼ਿਆਂ ਦੇ ਵੱਡੇ ਵੱਡੇ ਅੰਤਰਰਾਜੀ ਸਰਗਨੇ ਬਰਨਾਲਾ ਪੁਲਿਸ ਨੇ ਕਾਬੂ ਕੀਤੇ ਹਨ | ਬਰਨਾਲਾ ਪੁਲਿਸ ਦੀ ਮਾਰ ਦਿੱਲੀ ਉੱਤਰ ਪ੍ਰਦੇਸ਼ ਤੱਕ ਵੀ ਰਹੀ ਹੈ | ਬੀਤੇ ਦਿਨੀ ਭਾਰੀ ਮਾਤਰਾ ਵਿੱਚ ਚੂਰਾ ਪੋਸਤ ਫੜਕੇ ਬਰਨਾਲਾ ਪੁਲਿਸ ਨੇ ਵੱਡੀ ਕਾਮਯਾਬੀ ਹਾਸਲ ਕੀਤੀ |ਇਸ ਕਾਰਗੁਜਾਰੀ ਦੇ ਸੰਦਰਭ ਵਿੱਚ ਸਵਾਲ ਪੈਦਾ ਹੁੰਦਾ ਹੈ ਕਿ ਫਿਰ ਕੀ ਕਾਰਨ ਹੈ ਕਿ ਬਰਨਾਲਾ ਵਿੱਚ ਨਸ਼ਿਆਂ ਤੇ ਕਾਬੂ ਪਾਉਣ ਵਿੱਚ ਬਰਨਾਲਾ ਪੁਲਿਸ ਕਾਮਯਾਬ ਨਹੀ ਹੋ ਸਕੀ | ਸਿਵਲ ਹਸਪਤਾਲ ਬਰਨਾਲਾ ਦੇ ਅੰਦਰ (ਨਸ਼ਾ ਛੁਡਾਉ ਕੇਂਦਰ ਦੇ ਕੋਲ) ਅਤੇ ਹਸਪਤਾਲ ਦੇ ਇਰਦ ਗਿਰਦ ਸਾਰਾ ਦਿਨ ਮੈਡੀਕਲ ਨਸ਼ਿਆਂ ਦੀ ਵਿਕਰੀ ਸ਼ਰੇਆਮ ਬਿਨਾ ਕਿਸੇ ਡਰ ਅਤੇ ਰੋਕ ਟੋਕ ਦੇ ਚੱਲਦੀ ਰਹਿੰਦੀ ਹੈ | ਕੁੱਝ ਮੈਡੀਕਲ ਸਟੋਰਾਂ ਦੇ ਏਜੰਟ ਨਸ਼ੇ ਵਾਲੀਆਂ ਗੋਲੀਆਂ ਕੈਪਸੂਲ ਸ਼ਰੇਆਮ ਵੇਚਦੇ ਦੇਖੇ ਜਾ ਸਕਦੇ ਹਨ | ਇਹ ਗੋਰਖਧੰਦਾ ਸਵੇਰੇ ਅਤੇ ਸਾਮ ਦੇ ਸਮੇ ਜਿਆਦਾ ਸਰਗਰਮੀ ਨਾਲ ਚੱਲਦਾ ਹੈ,ਪਰ ਕੋਈ ਪੁੱਛਣ ਵਾਲਾ ਜਾਂ ਰੋਕਣ ਵਾਲਾ ਕਦੇ ਵੀ ਕੋਈ ਨਜਰ ਨਹੀ ਆਇਆ | ਹੈਰਾਨੀ ਇਸ ਗੱਲ ਦੀ ਹੈ ਕਿ ਇੱਥੋਂ ਥਾਣਾ ਸਿਟੀ 1 ਵੀ ਕੋਈ ਜਿਆਦਾ ਦੂਰੀ ਤੇ ਨਹੀ ਹੈ,ਪਰ ਇਹ ਸਮਝ ਤੋਂ ਬਾਹਰ ਦੀ ਗੱਲ ਹੈ ਕਿ ਉੱਤਰ ਪ੍ਰਦੇਸ਼ ਤੱਕ ਮਾਰ ਕਰਨ ਵਾਲੀ ਬਰਨਾਲਾ ਪੁਲਿਸ ਨੂੰ ਆਪਣੇ ਸਹਿਰ ਵਿੱਚ ਖਾਸ ਕਰਕੇ ਸਿਟੀ ਥਾਣੇ ਦੇ ਨੱਕ ਹੇਠ ਚੱਲਦੇ ਇਸ ਮਾਰੂ ਕਾਰੋਬਾਰ ਦੀ ਜਾਣਕਾਰੀ ਬਰਨਾਲਾ ਪੁਲਿਸ ਨੂੰ ਨਾ ਹੋਵੇ,ਇਹ ਮੰਨਿਆ ਨਹੀ ਜਾ ਸਕਦਾ | ਬੀਤੇ ਦਿਨੀ 22 ਏਕੜ ਦੇ ਵਾਲਮੀਕ ਚੌਂਕ ਵਿੱਚ ਨਾਕਾ ਲਾਈ ਖੜੇ ਥਾਣਾ ਸਿਟੀ 1 ਦੇ ਐਸ ਐਚ ਓ ਨੂੰ ਇਹ ਜਾਣਕਾਰੀ ਦਿੱਤੀ ਵੀ ਗਈ ਸੀ ਕਿ ਸਿਵਲ ਹਸਪਤਾਲ ਤੋਂ ਪਿੱਛੇ ਰਾਮ ਬਾਗ ਰੋਡ ਉੱਪਰ ਭਾਰਤੀ ਸਟੇਟ ਬੈਂਕ ਦੇ ਬਿਲਕੁਲ ਸਾਹਮਣੇ ਭੀੜ ਭੜੱਕੇ ਵਿੱਚ ਨਸ਼ਾ ਵੇਚਣ ਵਾਲੇ ਅਨਸਰ ਬਗੈਰ ਰਾਹਗੀਰਾਂ ਦੀ ਪ੍ਰਵਾਹ ਕੀਤਿਆਂ ਸਰੇਆਮ ਗੋਲੀਆਂ ਕੈਪਸੂਲ ਵੇਚ ਰਹੇ ਹਨ,ਪਰ ਐਸ ਐਚ ਓ ਵੱਲੋਂ ਇਸ ਬੇਹੱਦ ਗੰਭੀਰ ਸਮੱਸਿਆ ਨੂੰ ਸੰਜੀਦਗੀ ਨਾਲ ਸੁਣਿਆ ਹੀ ਨਹੀ ਸੀ ਗਿਆ,ਜਦੋਂਕਿ ਪਿਛਲੇ ਦਿਨੀ ਡੇਰਾ ਬਾਬਾ ਗਾਂਧਾ ਸਿੰਘ ਅਤੇ ਸ੍ਰੋਮਣੀ ਕਮੇਟੀ ਦੇ ਜਮੀਨੀ ਵਿਵਾਦ ਵਿੱਚ ਸਿਟੀ ਪੁਲਿਸ ਧਿਰ ਬਣਕੇ ਭੂਮਿਕਾ ਨਿਭਾਉਂਦੀ ਵੀ ਦੇਖੀ ਗਈ ਹੈ, ਅਜਿਹੀ ਭੂਮਿਕਾ ਪੁਲਿਸ ਪ੍ਰਤੀ ਪਹਿਲਾਂ ਹੀ ਲੋਕ ਮਨਾਂ ਵਿੱਚ ਬਣੀ ਮਾੜੀ ਛਵੀ ਨੂੰ ਹੋਰ ਵੀ ਗੰਧਲਾ ਬਣਾ ਦਿੰਦੀ ਹੈ ਅਤੇ ਸ਼ਹਿਰ 'ਚ ਹੁੰਦੀ ਮਾਰੂ ਮੈਡੀਕਲ ਨਸ਼ਿਆਂ ਦੀ ਕਾਲਾ ਬਜਾਰੀ ਨੂੰ ਨਜਰ ਅੰਦਾਜ਼ ਕਰਨਾ ਪੁਲਿਸ ਦੀ ਕਾਰਗੁਜਾਰੀ ਨੂੰ ਸ਼ੱਕ ਦੇ ਘੇਰੇ ਵਿੱਚ ਖੜਾ ਕਰਦਾ ਹੈ | ਸੋ ਦੇਖਣ ਹੋਵੇਗਾ ਕਿ ਬਰਨਾਲਾ ਪੁਲਿਸ ਨਸ਼ਿਆਂ ਦੇ ਇਸ ਕਾਲੇ ਕਾਰੋਬਾਰ ਨੂੰ ਰੋਕਣ ਵਿੱਚ ਸਫਲ ਹੁੰਦੀ ਹੈ ਜਾਂ ਇਹ ਮਾਰੂ ਧੰਦਾ ਮਾਵਾਂ ਦੇ ਪੁੱਤਾਂ ਨੂੰ ਸਿਵਿਆਂ ਦੇ ਰਾਹ ਤੋਰਨ ਲਈ ਇਸੇ ਤਰ੍ਹਾਂ ਜਿੰਮੇਵਾਰ ਬਣਦਾ ਰਹੇਗਾ ?
-ਬਾਕਸ ਨਿਊਜ-
ਜਦੋਂ ਇਸ ਸਬੰਧੀ ਸਿਵਲ ਹਸਪਤਾਲ ਬਰਨਾਲਾ ਦੇ ਸੀਨੀਅਰ ਮੈਡੀਕਲ ਅਫਸਰ ਤਪਿੰਦਰਜੋਤ ਕੌਸਲ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ ਅਸੀ ਪਹਿਲਾਂ ਵੀ ਐਸ ਐਸ ਪੀ ਬਰਨਾਲਾ ਨੂੰ ਬੇਨਤੀ ਕੀਤੀ ਸੀ,ਉਦੋਂ ਉਹਨਾਂ ਵੱਲੋਂ ਪੁਲਿਸ ਨੂੰ ਹਦਾਇਤ ਵੀ ਕਰ ਦਿੱਤੀ ਗਈ ਸੀ ਅਤੇ ਇਹ ਨਸ਼ਾ ਵੇਚਣ ਵਾਲੇ ਭਜਾ ਵੀ ਦਿੱਤੇ ਸਨ,ਪਰ ਕੁੱਝ ਸਮੇ ਬਾਅਦ ਪੁਲਿਸ ਨੇ ਗੇੜਾ ਮਾਰਨਾ ਫਿਰ ਬੰਦ ਕਰ ਦਿੱਤਾ ਤਾਂ ਕਰਕੇ ਹੁਣ ਫਿਰ ਪਹਿਲਾਂ ਵਾਲਾ ਹੀ ਹਾਲ ਹੋ ਗਿਆ ਹੈ,ਸੋ ਅਸੀ ਹੁਣ ਵੀ ਇਸ ਬਾਬਤ ਪੁਲਿਸ ਨੂੰ ਲਿਖਤੀ ਬੇਨਤੀ ਭੇਜੀ ਹੈ |
--ਬਾਕਸ ਨਿਊਜ-
ਜਦੋਂ ਇਸ ਸਬੰਧੀ ਐਸਐਸਪੀ ਸੰਦੀਪ ਕੁਮਾਰ ਮਲਿਕ ਨਾਲ ਗੱਲ ਕਰਨ ਲਈ ਫੋਨ 'ਤੇ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਉਨ੍ਹਾਂ ਵੱਲੋਂ ਫੋਨ ਨਾ ਚੁੱਕੇ ਜਾਣ ਕਾਰਣ ਸੰਪਰਕ ਨਹੀਂ ਹੋ ਸਕਿਆ |