ਸੋਨੇ ਦੀ ਜੇਲ੍ਹ
ਜਿੱਤਣ ਤੋਂ ਪਹਿਲਾਂ ਜਿੱਤ ਮਿੱਥੀ ਆਂ ਮੈਂ ,
ਡਰ ਨੂੰ ਡਰਾਉਣਾ ਡਰ ਤੋਂ ਸਿੱਖੀ ਆਂ ਮੈਂ ।
ਕਮਰਾ ਹੀ ਕਬਰ ਸੀ ਮੇਰੀ ,
ਜਿੰਦਾ ਹੋ ਕੇ ਵੀ ਅੱਗ ਵਿੱਚ ਸਿਕੀ ਆਂ ਮੈਂ ।
ਸੁਪਨਿਆਂ ਨੂੰ ਟੁੱਟ ਕੇ ਬਿਖਰ ਦੇ ਵੇਖਿਆ ਏ ,
ਸੰਸਕਾਰਾਂ ਦੀ ਚੱਕੀ ਵਿੱਚ ਪਿਸੀ ਆਂ ਮੈਂ ।
ਜ਼ੁਬਾਨ ਹੁੰਦਿਆਂ ਵੀ ਬੇਜ਼ੁਬਾਨ ਸੀ,
ਆਪਣੇ ਬੀਤੇ ਕੱਲ੍ਹ ਦੀ ਦਾਸਤਾਨ ਲਿਖੀ ਆਂ ਮੈਂ ।
ਬੇਸ਼ੱਕ ਜੇਲ੍ਹ ਸੋਨੇ ਦੀ ਸੀ,
ਆਜ਼ਾਦੀ ਲਈ ਤਰਸੀ ਸਾਲ ਇੱਕੀ ਆਂ ਮੈਂ ।
ਆਪਣੀਆਂ ਇੱਛਾਵਾਂ ਦੀ ਬਲੀ ,
ਆਪਣਿਆਂ ਦੀ ਖ਼ੁਸ਼ੀ ਲਈ ਦਿੱਤੀ ਆਂ ਮੈਂ ।
ਜੇ ਹੰਝੂ ਸਬਰ ਦਾ ਘੁੱਟ ਸਮਝ ਪੀਤੇ,
ਸਬਰ ਤੋੜਨ ਦੀ ਕੋਸ਼ਿਸ਼ ਵੀ ਕੀਤੀ ਆ ਮੈਂ ।
ਅੰਗਿਆਰ ਖਾਧੇ ਅੱਗ ਪੀਤੀ ,
"ਵੀਰਪਾਲ" ਬਾਜ਼ੀ ਤਾਂ ਜਿੱਤੀ ਆ ਮੈਂ ।
ਵੀਰਪਾਲ ਕੌਰ ਭੱਠਲ