ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
-------------------------
ਪਿਛਲੇ ਦੋਹੇਂ ਲੰਘੇ ਬਹੁਤੇ ਚੰਗੇ ਸਾਲ ਨਹੀਂ
ਕੁਦਰਤ ਹੈ ਜੋ ਕਰਦੀ ਆਪਾਂ ਸਕਦੇ ਟਾਲ ਨਹੀਂ ,
ਵੀਹ ਤੇ ਇੱਕੀ ਨਾਲੋਂ ਹੋਵੇ ਚੰਗਾ ਬਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਨਾਮ ਕਰੋਨਾ ਬੂਰੀ ਬਿਮਾਰੀ ਹੋਰ ਸਤਾਵੇ ਨਾ
ਆਵੈ ਸੁੱਖ ਦਾ ਸਾਹ ਕੋਈ ਮੂੰਹ ਤੇ ਮਾਸਕ ਲਾਵੇ ਨਾ ,
ਡਰੇ ਡਰੇ ਤੇ ਸਹਿਮੇ ਲੋਕ ਨਾ ਦੇਣ ਵਿਖਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਲਾਕਡਾਉਨ ਨਾ ਲੱਗੇ ਬੰਦ ਨਾ ਕਰਨ ਬਾਜ਼ਾਰਾਂ ਨੂੰ
ਰੋਕੇ ਨਾ ਕੋਈ ਰੇਲ , ਬੱਸ ਤੇ ਮੋਟਰ ਕਾਰਾਂ ਨੂੰ ,
ਖੁੱਲ੍ਹਦੇ ਰਹਿਣ ਸਕੂਲ ਤੇ ਹੁੰਦੀ ਰਹੇ ਪੜ੍ਹਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਚੱਲਣ ਕਾਰੋਬਾਰ ਕਦੇ ਨਾ ਆਵੇ ਮੰਦਾ ਜੀ
ਹਰ ਕੋਈ ਆਖੇ ਵਧੀਆ ਹੈ ਸਾਡਾ ਕੰਮ ਧੰਦਾ ਜੀ ,
ਸਭ ਨੂੰ ਹੋਵੇ ਵਾਧਾ ਚੰਗੀ ਕਰਨ ਕਮਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਖੁਲ੍ਹੇ ਰਹਿਣ ਸਿਨੇਮੇ , ਪਾਰਕ , ਹੋਟਲ ਪੰਜ ਤਾਰੇ
ਕੁੱਲੂ , ਸ਼ਿਮਲਾ , ਡਲਹੌਜ਼ੀ ਥਾਂ ਪਿਕਨਿਕ ਦੇ ਸਾਰੇ ,
ਜਿੱਥੇ ਜਿਹਦਾ ਜੀ ਕਰਦਾ ਜਾ ਕਰੇ ਘੁਮਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਛੋਟੇ ਵੱਡੇ ਇੱਕ ਦੂਜੇ ਨੂੰ ਪਿਆਰ ਕਰਨ ਸਾਰੇ
ਇੱਕ ਦੂਜੇ ਦੇ ਧਰਮਾਂ ਦਾ ਸਤਿਕਾਰ ਕਰਨ ਸਾਰੇ ,
ਹਿੰਦੂ , ਮੋਮਨ ਹੋਵੇ ਚਾਹੇ ਸਿੱਖ , ਇਸਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਕਰੇ ਵਕਾਲਤ ਨਾਲੇ ਕਵਿਤਾ ਲਿਖਕੇ ਗਾਉਂਦਾ ਹੈ
ਹਰ ਵਾਰੀ ਜੋ ਨਵੇਂ ਸਾਲ ਤੇ ਛੰਦ ਬਣਾਉਂਦਾ ਹੈ ,
ਪਾ ਕੇ ਕਾਲਾ ਕੋਟ ਤੇ ਲਾ ਕੇ ਰੱਖਦੈ ਟਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
ਛੁੱਟਜੇ ਖਹਿੜਾ ਰੱਬਾ ਸਾਡਾ ਹੁਣ ਮਹਾਂਮਾਰੀ ਤੋਂ
ਹੋਵੇ ਨਾ ਨੁਕਸਾਨ ਕਿਸੇ ਦਾ ਏਸ ਬਿਮਾਰੀ ਤੋਂ ,
ਹੱਥ ਜੋੜ "ਪਰਵੀਨ" ਮੰਗਦਾ ਜਗ ਭਲਾਈ ਜੀ
ਨਵੇਂ ਸਾਲ ਦੀ ਹੋਵੇ ਸਭ ਨੂੰ ਬਹੁਤ ਵਧਾਈ ਜੀ ।
-------------------------
ਐਡਵੋਕੇਟ ਪਰਵੀਨ ਸ਼ਰਮਾ (ਰਾਉਕੇ ਕਲਾਂ)