ਕਾਵਿ ਪੁਸਤਕ “ਸ਼ਬਦ-ਸਿਰਜਣਹਾਰੇ-3” ਦਾ ਲੋਕ ਅਰਪਨ ਸਮਾਗਮ ਕਰਵਾਇਆ ਗਿਆ
ਫਗਵਾੜਾ, 5 ਦਸੰਬਰ ( ) ਪੁਸਤਕ “ਸ਼ਬਦ-ਸਿਰਜਣਹਾਰੇ-3” ਦੇ ਲੋਕ ਅਰਪਣ ਸਮਾਗਮ ‘ਚ ਬੋਲਦਿਆਂ ਪ੍ਰਸਿੱਧ ਚਿੰਤਕ ਅਤੇ ਯੂਰਪੀਅਨ ਪੰਜਾਬੀ ਸੱਥ ਦੇ ਸੰਚਾਲਕ ਮੋਤਾ ਸਿੰਘ ਸਰਾਏ ਨੇ ਕਿਹਾ ਕਿ ਪੰਜਾਬ ਦੇ ਲੋਕ ਆਪਣੀ ਮਾਂ ਬੋਲੀ ਨੂੰ ਅੰਤਾਂ ਦਾ ਪਿਆਰ ਕਰਦੇ ਹਨ ਅਤੇ ਖ਼ਾਸ ਤੌਰ ‘ਤੇ ਵਿਦੇਸ਼ ਵਸਦੇ ਪੰਜਾਬੀ ਵਿਦਿਆਰਥੀ ਪੰਜਾਬੀ ਪੁਸਤਕਾਂ ਪੜਨ ਦਾ ਬਹੁਤ ਸ਼ੌਂਕ ਰੱਖਦੇ ਹਨ। ਸਮਾਗਮ ‘ਚ ਸਕੇਪ ਸਾਹਿਤਕ ਸੰਸਥਾ ਫਗਵਾੜਾ ਵਲੋਂ ਯੂਰਪੀਅਨ ਪੰਜਾਬੀ ਸੱਥ ਦੇ ਸੰਚਾਲਕ ਮੋਤਾ ਸਿੰਘ ਸਰਾਏ ਦੇ ਸਹਿਯੋਗ ਨਾਲ ਬਲਦੇਵ ਰਾਜ ਕੋਮਲ, ਰਵਿੰਦਰ ਚੋਟ, ਪਰਵਿੰਦਰਜੀਤ ਸਿੰਘ ਅਤੇ ਕਮਲੇਸ਼ ਸੰਧੂ ਦੁਆਰਾ ਸੰਪਾਦਿਤ 45 ਕਵੀਆਂ ਦੇ ਸਾਂਝੇ ਕਾਵਿ-ਸੰਗ੍ਰਹਿ ਸ਼ਬਦ ਸਿਰਜਣਹਾਰੇ-3 ਲੋਕ ਅਰਪਣ ਕੀਤਾ ਗਿਆ। ਇਸ ਸਮੇਂ ਬੋਲਦਿਆਂ ਕੁਲਵਿੰਦਰ ਸਿੰਘ ਸਾਬਕਾ ਜ਼ਿਲਾ ਸਿੱਖਿਆ ਅਫ਼ਸਰ ਨੇ ਕਿਹਾ ਕਿ ਪੰਜਾਬੀ, ਪੁਸਤਕਾਂ ਪੜ੍ਹਨ ਦੇ ਸ਼ੌਂਕੀਨ ਹਨ ਅਤੇ ਇਹ ਭਰਮ ਖ਼ਾਸ ਕਰਕੇ ਧੰਨ ਕੁਬੇਰਾਂ ਵਲੋਂ ਫੈਲਾਇਆ ਜਾ ਰਿਹਾ ਹੈ ਕਿ ਪੰਜਾਬੀ ਪੁਸਤਕਾਂ ਨਹੀਂ ਪੜ੍ਹਦੇ। ਉਹਨਾਂ ਇਹ ਵੀ ਕਿਹਾ ਕਿ ਪੰਜਾਬੀ ਚੰਗੀਆਂ ਪੁਸਤਕਾਂ ਪੜਦੇ ਹਨ ਅਤੇ ਇਹਨਾਂ ‘ਚ ਦਿੱਤੇ ਵਿਚਾਰਾਂ ਉਤੇ ਅਮਲ ਵੀ ਕਰਦੇ ਹਨ। ਪ੍ਰਿੰਸੀਪਲ ਗੁਰਮੀਤ ਸਿੰਘ ਪਲਾਹੀ ਨੇ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੀ ਗੱਲ ਕਰਦਿਆਂ ਕਿਹਾ ਕਿ ਮੌਜੂਦਾ ਸਮੇਂ ਬਿਨਾਂ ਸ਼ੱਕ ਮਾਂ-ਬੋਲੀ ਪੰਜਾਬੀ ਉਤੇ ਹਮਲੇ ਹੋ ਰਹੇ ਹਨ, ਪਰ ਪੰਜਾਬੀ ਇਨਾਂ ਚੁਣੌਤੀਆਂ ਨੂੰ ਪ੍ਰਵਾਨ ਕਰ ਰਹੇ ਹਨ ਅਤੇ ਦੇਸ਼-ਵਿਦੇਸ਼ ‘ਚ ਇਸਦੇ ਪ੍ਰਚਾਰ ਪਸਾਰ ਲਈ ਹੰਭਲੇ ਮਾਰ ਰਹੇ ਹਨ। ਰਵਿੰਦਰ ਚੋਟ ਨੇ ਸ਼ਬਦ ਸਿਰਜਣਹਾਰੇ-3 ਬਾਰੇ ਵਿਚਾਰ ਰੱਖੇ, ਪਰਵਿੰਦਰਜੀਤ ਸਿੰਘ ਨੇ ਸਭਨਾਂ ਨੂੰ ਜੀਅ ਆਇਆਂ ਆਖਿਆ।
ਬਲਦੇਵ ਰਾਜ ਕੋਮਲ ਨੇ ਸਭ ਦਾ ਧੰਨਵਾਦ ਕੀਤਾ। ਸਟੇਜ ਸਕੱਤਰ ਦੀ ਭੂਮਿਕਾ ਕਮਲੇਸ਼ ਸੰਧੂ ਨੇ ਬਾਖੂਬੀ ਨਿਭਾਈ। ਇਸ ਵਿਸ਼ੇਸ਼ ਸਮਾਗਮ ਦੇ ਪ੍ਰਧਾਨਗੀ ਮੰਡਲ ਵਿਚ ਰਵਿੰਦਰ ਚੋਟ, ਬਲਦੇਵ ਰਾਜ ਕੋਮਲ, ਪ੍ਰਿੰਸੀਪਲ ਗੁਰਮੀਤ ਸਿੰਘ ਪਲਾਹੀ, ਮੋਤਾ ਸਿੰਘ ਸਰਾਏ, ਕੁਲਵਿੰਦਰ ਸਿੰਘ ਸਰਾਏ ਸ਼ਾਮਲ ਸਨ। ਸਮਾਗਮ ਵਿਚ ਹਾਜ਼ਰ ਉਹਨਾਂ ਲੇਖਕਾਂ ਨੂੰ ਜਿਹਨਾਂ ਦੀਆਂ ਰਚਨਾਵਾਂ ਪੁਸਤਕ ਸ਼ਬਦ ਸਿਰਜਣਹਾਰੇ-3 ‘ਚ ਸ਼ਾਮਲ ਹਨ, ਪੁਸਤਕ ਭੇਂਟ ਕੀਤੀ ਗਈ। ਮੋਤਾ ਸਿੰਘ ਸਰਾਏ ਦਾ ਸਕੇਪ ਸਾਹਿਤਕ ਸੰਸਥਾ ਵਲੋਂ ਸਨਮਾਨ ਕੀਤਾ ਗਿਆ। ਹੋਰਾਂ ਤੋਂ ਇਲਾਵਾ ਇਸ ਸਮਾਗਮ ‘ਚ ਮਨੋਜ ਫਗਵਾੜਵੀ, ਕਰਮਜੀਤ ਸਿੰਘ ਸੰਧੂ, ਹਰਚਰਨ ਭਾਰਤੀ, ਐਸ.ਐਲ.ਵਿਰਦੀ, ਸੋਹਣ ਸਹਿਜਲ, ਟੀ.ਡੀ. ਚਾਵਲਾ, ਜਸਵਿੰਦਰ ਕੌਰ, ਬਲਬੀਰ ਕੌਰ, ਸੁਨੀਤਾ ਮੈਦਾਨ, ਬੰਸੋ ਦੇਵੀ, ਦਰਸ਼ਨ ਸਿੰਘ ਨੰਦਰਾ, ਸਰਪੰਚ ਸੁਖਵਿੰਦਰ ਸਿੰਘ, ਸੁਖਦੇਵ ਸਿੰਘ ਸੁੱਖ, ਸੁਖਵਿੰਦਰ ਸਿੰਘ ਭੱਟੀ, ਲਾਲੀ ਕਰਤਾਰਪੁਰੀ, ਸੁਬੇਗ ਸਿੰਘ ਹੰਝਰਾ, ਸੋਢੀ ਸੱਤੋਵਾਲੀ, ਸੁਖਦੇਵ ਸਿੰਘ ਗੰਢਵਾਂ, ਲਸ਼ਕਰ ਢੰਡਵਾੜਵੀ, ਬਚਨ ਗੂੜਾ, ਰਵਿੰਦਰ ਸਿੰਘ ਰਾਏ, ਦਵਿੰਦਰ ਸਿੰਘ ਜੱਸਲ, ਦਲਜੀਤ ਮੈਹਿਮੀ, ਗੁਰਨਾਮ ਬਾਵਾ, ਨਰੰਜਣ ਸਿੰਘ ਪਰਵਾਨਾ, ਸਾਧੂ ਸਿੰਘ ਜੱਸਲ, ਸਿਕੰਦਰ, ਪਰਮਜੀਤ ਕੌਰ ਅੱਪਰਾ, ਮਲਕੀਤ ਸਿੰਘ ਆਦਿ ਹਾਜ਼ਰ ਸਨ।