ਜਲੰਧਰ : ਪੰਜਾਬ ਵਿਚ ਝੋਨੇ ਦਾ ਸੀਜ਼ਨ ਖ਼ਤਮ ਹੋ ਗਿਆ ਹੈ ਤੇ ਕਣਕ ਤੇ ਆਲੂ ਦੀ ਬਿਜਾਈ ਖ਼ਤਮ ਹੋ ਗਈ ਹੈ। ਨਾਲ ਹੀ ਪਰਾਲੀ ਦੀ ਰਹਿੰਦ-ਖੂੰਹਦ ਨੂੰ ਖੇਤਾਂ ਵਿਚ ਅੱਗ ਲਾਉਣ ਸਿਲਸਿਲਾ ਲਗਪਗ ਖਤਮ ਹੋ ਗਿਆ ਹੈ। 30 ਨਵੰਬਰ ਨੂੰ ਸੀਜ਼ਨ ਦੇ ਆਖਰੀ ਦਿਨ ਸੂਬੇ ਵਿਚ ਪਰਾਲੀ ਦੀ ਅੱਗ ਦੇ ਸਿਰਫ 15 ਮਾਮਲੇ ਸਾਹਮਣੇ ਆਏ। ਪ੍ਰਦੂਸ਼ਣ ਵਿਭਾਗ ਦੇ ਅੰਕਡ਼ਿਆਂ ਅਨੁਸਾਰ ਇਸ ਸੀਜ਼ਨ ਦੌਰਾਨ 30 ਨਵੰਬਰ ਤਕ ਸੂਬੇ ’ਚ ਖੇਤਾਂ ’ਚ ਪਰਾਲੀ ਦੀ ਰਹਿੰਦ-ਖੂੰਹਦ ਨੂੰ ਅੱਗ ਲਾਉਣ ਦੇ 49922 ਮਾਮਲੇ ਆਏ ਹਨ। ਜੇ ਪਿਛਲੇ ਦੋ ਸਾਲਾਂ ਦੀ ਗੱਲ ਕੀਤੀ ਜਾਵੇ ਤਾਂ ਇਸ ਸਾਲ ਕਿਸਾਨਾਂ ਨੇ ਬਹੁਤ ਘੱਟ ਪਰਾਲੀ ਦੀ ਰਹਿੰਦ-ਖੂੰਹਦ ਸਾਡ਼ੀ ਹੈ। 2020 ’ਚ 30 ਨਵੰਬਰ ਤਕ ਪਰਾਲੀ ਦੀ ਅੱਗ ਦੇ 76929 ਅਤੇ 2021 ’ਚ 71159 ਮਾਮਲੇ ਆਏ ਸਨ।
ਪਰਾਲੀ ਸਾਡ਼ਨ ਲਈ ਇਸ ਸਾਲ ਵੀ ਮੁੱਖ ਮੰਤਰੀ ਦਾ ਜ਼ਿਲ੍ਹਾ ਮੋਹਰੀ
ਖੇਤਾਂ ਵਿਚ ਪਰਾਲੀ ਦੀ ਰਹਿੰਦ ਨੂੰ ਅੱਗ ਲਾਉਣ ਦੇ ਮਾਮਲੇ ਵਿਚ ਸੂਬੇ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦਾ ਜ਼ਿਲ੍ਹਾ ਸੰਗਰੂਰ ਪਿਛਲੇ ਤਿੰਨ ਸਾਲਾਂ ਲਗਾਤਾਰ ਤੋਂ ਅੱਗੇ ਚੱਲ ਰਿਹਾ ਹੈ। ਪ੍ਰਦੂਸ਼ਣ ਵਿਭਾਗ ਤੋਂ ਮਿਲੇ ਪਿਛਲੇ 3 ਸਾਲਾਂ ਦੇ 30 ਨਵੰਬਰ ਤਕ, ਖੇਤਾਂ ਵਿਚ ਅੱਗ ਲਾਉਣ ਦੇ ਮਾਮਲਿਆਂ ਵਿਚ ਸੰਗਰੂਰ ਜ਼ਿਲ੍ਹੇ ਦੇ 2020 ਵਿਚ ਅੱਗ ਦੇ 9708 ਮਾਮਲੇ, 2021 ਵਿਚ 8001 ਅਤੇ ਇਸ ਸਾਲ 5239 ਮਾਮਲੇ ਦਰਜ ਕੀਤੇ ਗਏ। ਇਸ ਦੇ ਉਲਟ ਪਰਾਲੀ ਦੀ ਅੱਗ ਦੇ ਸਭ ਤੋਂ ਘੱਟ ਮਾਮਲੇ ਪਠਾਨਕੋਟ ਜ਼ਿਲ੍ਹੇ ਵਿਚ ਹਨ, ਜਿੱਥੇ 2020 ਵਿਚ 11, 2021 ਵਿਚ 6 ਅਤੇ ਇਸ ਸਾਲ ਸਿਰਫ਼ ਇਕ ਮਾਮਲਾ ਦਰਜ ਕੀਤਾ ਗਿਆ ਹੈ।
ਸਰਕਾਰਾਂ ਦੀਆਂ ਗ਼ਲਤ ਨੀਤੀਆਂ ਜ਼ਿੰਮੇਵਾਰ : ਰਾਣੀਭੱਟੀ
ਸੰਯੁਕਤ ਕਿਸਾਨ ਮੋਰਚੇ ਦੇ ਮੈਂਬਰ ਮੁਕੇਸ਼ ਚੰਦਰ ਰਾਣੀਭੱਟੀ ਦਾ ਕਹਿਣਾ ਹੈ ਕਿ ਕਿਸਾਨਾਂ ਵੱਲੋਂ ਖੇਤਾਂ ਵਿਚ ਪਰਾਲੀ ਦੀ ਰਹਿੰਦ-ਖੂੰਹਦ ਨੂੰ ਅੱਗ ਲਾਉਣ ਲਈ ਸਰਕਾਰਾਂ ਦੀਆਂ ਗਲਤ ਨੀਤੀਆਂ ਜ਼ਿੰਮੇਵਾਰ ਹਨ। ਪੰਜਾਬ ਸਰਕਾਰ ਨੇ ਕਿਸਾਨਾਂ ਨੂੰ 1500 ਰੁਪਏ ਪ੍ਰਤੀ ਏਕਡ਼ ਪਰਾਲੀ ਦੀ ਸਾਂਭ-ਸੰਭਾਲ ਕਰਨ ਤੇ ਖੇਤਾਂ ਵਿਚ ਖਪਾਉਣ ਲਈ ਮੁਆਵਜ਼ਾ ਦੇਣ ਦਾ ਵਾਅਦਾ ਕੀਤਾ ਸੀ। ਕੇਂਦਰ ਸਰਕਾਰ ਵੱਲੋਂ ਮੁਕਰਨ ਤੋਂ ਬਾਅਦ ਦਿੱਲੀ ਤੇ ਪੰਜਾਬ ਸਰਕਾਰ ਨੇ ਮੁਆਵਜ਼ਾ ਦੇਣ ਤੋਂ ਹੱਥ ਪਿੱਛੇ ਖਿੱਚ ਲਿਆ। ਛੋਟੇ ਕਿਸਾਨ, ਜਿਨ੍ਹਾਂ ਕੋਲ ਮਸ਼ੀਨਰੀ ਖ਼ਰੀਦਣ ਦੀ ਸਮੱਰਥਾ ਨਹੀਂ ਸੀ, ਨੂੰ ਮਜਬੂਰ ਹੋ ਕੇ ਖੇਤਾਂ ਵਿਚ ਰਹਿੰਦ-ਖੂੰਹਦ ਸਾਡ਼ਨੀ ਪਈ। ਜੇ ਕਿਸਾਨਾਂ ਨੂੰ ਪਰਾਲੀ ਦੀ ਅੱਗ ਲਾਉਣੋਂ ਰੋਕਣਾ ਹੈ ਤਾਂ ਉਨ੍ਹਾਂ ਨੂੰ ਪਰਾਲੀ ਦੀ ਸਾਂਭ-ਸੰਭਾਲ ਕਰਨ ਲਈ ਮੁਆਵਜ਼ਾ ਦਿੱਤਾ ਜਾਣਾ ਚਾਹੀਦਾ ਹੈ।
ਕਿਸਾਨਾਂ ਨੂੰ ਜਾਗਰੂਕ ਕਰਨ ਦਾ ਹੋਇਆ ਅਸਰ
ਜ਼ਿਲ੍ਹਾ ਖੇਤੀਬਾਡ਼ੀ ਸਿਖਲਾਈ ਅਫਸਰ ਕਪੂਰਥਲਾ ਨਰੇਸ਼ ਗੁਲਾਟੀ ਦਾ ਕਹਿਣਾ ਹੈ ਕਿ ਵਿਭਾਗ ਨੇ ਇਸ ਸਾਲ ਝੋਨੇ ਦਾ ਸੀਜ਼ਨ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਕਿਸਾਨਾਂ ਨੂੰ ਖੇਤਾਂ ਵਿਚ ਪਰਾਲੀ ਦੀ ਰਹਿੰਦ-ਖੂੰਹਦ ਸਾਡ਼ਨ ਨਾਲ ਹੋਣ ਵਾਲੇ ਨੁਕਸਾਨ ਬਾਰੇ ਜਾਗਰੂਕ ਕਰਨ ਵਾਸਤੇ ਮੁਹਿੰਮ ਆਰੰਭ ਦਿੱਤੀ ਸੀ। ਵਿਭਾਗ ਨੇ ਪਿੰਡਾਂ ਵਿਚ ਜਾ ਕੇ ਕਿਸਾਨਾਂ ਨੂੰ ਜਾਗਰੂਕ ਕੀਤਾ। ਇਸ ਲਈ ਸੈਮੀਨਾਰ ਕਰਵਾਏ ਗਏ ਅਤੇ ਪਰਾਲੀ ਨਾ ਸਾਡ਼ਨ ਵਾਲੇ ਕਿਸਾਨਾਂ ਨੇ ਸੈਮੀਨਾਰਾਂ ਵਿਚ ਪੁੱਜ ਕੇ ਹੋਰਨਾਂ ਨੂੰ ਪਰਾਲੀ ਨੂੰ ਖੇਤਾਂ ਵਿਚ ਖਪਾਉਣ ਨਾਲ ਹੋਣ ਲਾਭਾਂ ਤੋਂ ਜਾਣੂ ਕਰਵਾਇਆ। ਡਾ. ਨਰੇਸ਼ ਨੇ ਕਿਹਾ ਕਿ ਵਿਭਾਗ ਦੀ ਇਸ ਜਾਗਰੂਕਤਾ ਮੁਹਿੰਮ ਦਾ ਕਿਸਾਨਾਂ ’ਤੇ ਕਾਫੀ ਅਸਰ ਪਿਆ ਹੈ, ਜਿਸ ਸਦਕਾ ਇਸ ਸਾਲ ਪਿਛਲੇ ਸਾਲਾਂ ਨਾਲੋਂ ਖੇਤਾਂ ’ਚ ਅੱਗ ਲਾਉਣ ਦੇ ਮਾਮਲੇ 34 ਫੀਸਦੀ ਘਟੇ ਹਨ। ਜੇ ਕਿਸਾਨ ਇਸੇ ਤਰ੍ਹਾਂ ਜਾਗਰੂਕ ਹੁੰਦੇ ਗਏ ਤਾਂ ਆਉਣ ਵਾਲੇ ਸਾਲਾਂ ਵਿਚ ਝੋਨੇ ਦੀ ਰਹਿੰਦ-ਖੂੰਹਦ ਸਾਡ਼ਨ ਦਾ ਰੁਝਾਨ ਖ਼ਤਮ ਹੋ ਜਾਵੇਗਾ।
23 ਤੋਂ 30 ਨਵੰਬਰ ਤਕ ਆਏ ਮਾਮਲੇ
ਮਿਤੀ ਮਾਮਲੇ
23 ਨਵੰਬਰ 140
24 ਨਵੰਬਰ 66
25 ਨਵੰਬਰ 44
26 ਨਵੰਬਰ 22
27 ਨਵੰਬਰ 12
28 ਨਵੰਬਰ 11
29 ਨਵੰਬਰ 08
30 ਨਵੰਬਰ 15
ਤਿੰਨ ਸਾਲਾਂ ’ਚ 15 ਸਤੰਬਰ ਤੋਂ 30 ਨਵੰਬਰ ਤਕ ਦੇ ਮਾਮਲੇ
ਜ਼ਿਲ੍ਹਾ 2020 2021 2020
ਅੰਮ੍ਰਿਤਸਰ 2423 2171 1542
ਬਰਨਾਲਾ 4524 4313 2910
ਬਠਿੰਡਾ 7827 4476 4592
ਫਤਹਿਗਡ਼੍ਹ ਸਾਹਿਬ 1364 1723 1149
ਫਰੀਦਕੋਟ 3851 3945 2693
ਫਾਜ਼ਲਿਕਾ 3138 2385 2856
ਫਿਰੋਜ਼ਪੁਰ 6960 6272 4295
ਗੁਰਦਾਸਪੁਰ 1949 1395 854
ਹੁਸ਼ਿਆਰਪੁਰ 414 330 259
ਜਲੰਧਰ 1805 2546 1388
ਕਪੂਰਥਲਾ 1635 1787 1279
ਲੁਧਿਆਣਾ 4338 5804 2682
ਮਾਨਸਾ 4973 3216 2815
ਮੋਗਾ 5866 6502 3609
ਮੁਕਤਸਰ 5542 4591 3884
ਐੱਸਬੀਐੱਸ ਨਗਰ 193 356 270
ਪਠਾਨਕੋਟ 11 6 1
ਪਟਿਆਲਾ 5306 5346 3336
ਰੂਪਨਗਰ 210 307 246
ਐੱਸਏਐੱਸ ਨਗਰ 263 205 162
ਸੰਗਰੂਰ 9708 8001 5239
ਤਰਨਤਾਰਨ 4529 4103 3184
ਮਾਲੇਰਕੋਟਲਾ 0 1379 677
ਕੁੱਲ 76929 71159 49922