ਚੰਡੀਗੜ੍ਹ : ਭਾਰਤੀ ਜਨਤਾ ਪਾਰਟੀ ਨੇ ਵੀਰਵਾਰ ਨੂੰ 27 ਉਮੀਦਵਾਰਾਂ ਦੀ ਦੂਜੀ ਸੂਚੀ ਜਾਰੀ ਕਰ ਦਿੱਤੀ। ਇਨ੍ਹਾਂ 27 ਸੀਟਾਂ ’ਚੋਂ ਸਿਰਫ਼ ਪੰਜ ਹੀ ਅਜਿਹੀਆਂ ਹਨ, ਜਿੱਥੇ ਭਾਜਪਾ ਪਹਿਲਾਂ ਚੋਣ ਲੜਦੀ ਰਹੀ ਹੈ। 22 ਸੀਟਾਂ ’ਤੇ ਪਾਰਟੀ ਨੇ ਪਹਿਲੀ ਵਾਰੀ ਉਮੀਦਵਾਰ ਉਤਾਰੇ ਹਨ। ਪੰਜ ਪੁਰਾਣੀਆਂ ਸੀਟਾਂ ’ਚੋਂ ਵੀ ਦੋ ਅੰਮ੍ਰਿਤਸਰ ਪੱਛਮੀ ਤੇ ਰਾਜਪੁਰਾ ’ਚ ਭਾਜਪਾ ਨੇ ਚਿਹਰੇ ਬਦਲ ਦਿੱਤੇ ਹਨ, ਜਦਕਿ ਤਿੰਨ ਸੀਟਾਂ ’ਤੇ ਪੁਰਾਣੇ ਆਗੂਆਂ ’ਤੇ ਭਰੋਸਾ ਪ੍ਰਗਟਾਇਆ ਹੈ। ਭਾਜਪਾ ਨੇ ਕਾਂਗਰਸ ਛੱਡ ਕੇ ਪਾਰਟੀ ’ਚ ਸ਼ਾਮਲ ਹੋਏ ਦੋ ਵਿਧਾਇਕਾਂ ਨੂੰ ਵੀ ਮੈਦਾਨ ’ਚ ਉਤਾਰਿਆ ਹੈ। ਮੋਗਾ ਸੀਟ ’ਤੇ ਕਾਂਗਰਸ ਤੋਂ ਆਏ ਵਿਧਾਇਕ ਹਰਜੋਤ ਕਮਲ ਤੇ ਬਟਾਲਾ ਸੀਟ ’ਤੇ ਕਾਂਗਰਸ ਤੋਂ ਆਏ ਵਿਧਾਇਕ ਹਰਜੋਤ ਕਮਲ ਤੇ ਬਟਾਲਾ ਸੀਟ ’ਤੇ ਕਾਂਗਰਸ ਛੱਡ ਕੇ ਭਾਜਪਾ ’ਚ ਆਏ ਕਾਦੀਆਂ ਦੇ ਵਿਧਾਇਕ ਫ਼ਤਹਿਜੰਗ ਸਿੰਘ ਬਾਜਵਾ ਨੂੰ ਉਮੀਦਵਾਰ ਬਣਾਇਆ ਹੈ।
ਭਾਜਪਾ ਨੇ ਸਭ ਤੋਂ ਵੱਡਾ ਦਾਅ ਫਗਵਾੜਾ ਸੀਟ ’ਤੇ ਖੇਡਿਆ ਹੈ। ਇਸ ਸੀਟ ਤੋਂ ਰਾਸ਼ਟਰੀ ਅਨੁਸੂਚਿਤ ਜਾਤੀ ਕਮਿਸ਼ਨ ਦੇ ਚੇਅਰਮੈਨ ਤੇ ਸਾਬਕਾ ਕੇਂਦਰੀ ਰਾਜ ਮੰਤਰੀ ਵਿਜੇ ਸਾਂਪਲਾ ਨੂੰ ਉਮੀਦਵਾਰ ਐਲਾਨਿਆ ਹੈ। ਸਾਂਪਲਾ ਪ੍ਰਦੇਸ਼ ਭਾਜਪਾ ਦੇ ਪ੍ਰਧਾਨ ਵੀ ਰਹਿ ਚੁੱਕੇ ਹਨ। ਇਸੇ ਤਰ੍ਹਾਂ ਘੱਟਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਤੇ ਸਾਬਕਾ ਨੌਕਰਸ਼ਾਹ ਇਕਬਾਲ ਸਿੰਘ ਲਾਲਪੁਰਾ ਨੂੰ ਰੂਪਨਗਰ ਤੋਂ ਚੋਣ ਮੈਦਾਨ ’ਚ ਉਤਾਰਿਆ ਹੈ।
ਕਿਸਾਨ ਅੰਦੋਲਨ ਦੌਰਾਨ ਖਾਸੇ ਸਰਗਰਮ ਰਹੇ ਹਰਜੀਤ ਗਰੇਵਾਲ ਨੂੰ ਪਾਰਟੀ ਨੇ ਟਿਕਟ ਨਹੀਂ ਦਿੱਤੀ। ਉਨ੍ਹਾਂ ਦੀ ਥਾਂ ’ਤੇ ਜਗਦੀਸ਼ ਕੁਮਾਰ ਜੱਗਾ ’ਤੇ ਰਾਜਪੁਰਾ ਤੋਂ ਦਾਅ ਖੇਡਿਆ ਹੈ। ਅੰਮ੍ਰਿਤਸਰ ਪੱਛਮੀ (ਰਾਖਵੀਂ) ’ਤੇ ਭਾਜਪਾ ਨੇ ਕੁਮਾਰ ਅਮਿਤ ਬਾਲਮੀਕਿ ਨੂੰ ਟਿਕਟ ਦਿੱਤੀ ਹੈ। ਪਿਛਲੀ ਵਾਰੀ ਇਸ ਸੀਟ ਤੋਂ ਰਾਕੇਸ਼ ਗਿੱਲ ਚੋਣ ਲੜੇ ਸਨ। ਉੱਥੇ, ਸਾਬਕਾ ਅਕਾਲੀ ਵਿਧਾਇਕ ਸਰਬਜੀਤ ਸਿੰਘ ਮੱਕੜ ਨੂੰ ਭਾਜਪਾ ਨੇ ਜਲੰਧਰ ਕੈਂਟ ਤੋਂ ਮੈਦਾਨ ’ਚ ਉਤਾਰਿਆ ਹੈ।
ਭੋਆ ਤੋਂ ਭਾਜਪਾ ਨੇ ਸਾਬਕਾ ਵਿਧਾਇਕ ਸੀਮਾ ਕੁਮਾਰੀ ’ਤੇ ਭਰੋਸਾ ਪ੍ਰਗਟਾਇਆ ਹੈ। ਸੀਮਾ ਕੁਮਾਰੀ 2017 ’ਚ 23,819 ਵੋਟਾਂ ਨਾਲ ਜੋਗਿੰਦਰ ਪਾਲ ਤੋਂ ਚੋਣ ਹਾਰ ਗਏ ਸਨ। ਇਸੇ ਤਰ੍ਹਾਂ ਅਨੰਦਪੁਰ ਸਾਹਿਬ ’ਚ ਪਾਰਟੀ ਨੇ ਮੁੜ ਡਾ. ਪਰਮਿੰਦਰ ਸ਼ਰਮਾ ’ਤੇ ਦਾਅ ਖੇਡਿਆ ਹੈ। ਉਹ ਵੀ ਪਿਛਲੀ ਚੋਣ 5,107 ਵੋਟਾਂ ਨਾਲ ਹਾਰ ਗਏ ਸਨ। ਇਸ ਸੀਟ ’ਤੇ ਸਾਬਕਾ ਮੰਤਰੀ ਮਦਨ ਮੋਹਨ ਮਿੱਤਲ ਦੇ ਬੇਟੇ ਅਰਵਿੰਦ ਮਿੱਤਲ ਆਪਣਾ ਦਾਅਵਾ ਜਤਾ ਰਹੇ ਸਨ। ਕਰਤਾਰਪੁਰ ’ਚ ਭਾਜਪਾ ਨੇ ਜਲੰਧਰ ਤੋਂ ਸਾਬਕਾ ਕਾਂਗਰਸੀ ਮੇਅਰ ਰਹੇ ਸੁਰਿੰਦਰ ਮਹੇ ਨੂੰ ਟਿਕਟ ਦਿੱਤੀ ਹੈ। ਮਹੇ ਲੰਬੇ ਸਮੇਂ ਤੋਂ ਭਾਜਪਾ ਦੇ ਨਾਲ ਜੁੜੇ ਹੋਏ ਹਨ।
ਜ਼ਿਕਰਯੋਗ ਹੈ ਕਿ ਭਾਜਪਾ ਇਸ ’ਤੇ 65 ਸੀਟਾਂ ’ਤੇ ਚੋਣ ਲੜ ਰਹੀ ਹੈ। ਪਹਿਲਾਂ ਪਾਰਟੀ ਸਿਰਫ਼ 23 ਸੀਟਾਂ ’ਤੇ ਹੀ ਲੜਦੀ ਰਹੀ ਹੈ। ਗਠਜੋੜ ਦੀਆਂ ਹੋਰ ਪਾਰਟੀਆਂ ’ਚ ਕੈਪਟਨ ਅਮਰਿੰਦਰ ਸਿੰਘ ਦੀ ਪੰਜਾਬ ਲੋਕ ਕਾਂਗਰਸ 37 ਤੇ ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) 15 ਸੀਟਾਂ ’ਤੇ ਚੋਣ ਲੜ ਰਿਹਾ ਹੈ।