ਹਿੰਦੀ ਕਵਿਤਾ
ਦਲਿਤ ਅਤੇ ਚੋਣਾਂ
°°°°°°°°°°°°°°
* ਮੂਲ : ਬੱਚਾ ਲਾਲ ਉਨਮੇਸ਼
* ਅਨੁ : ਪ੍ਰੋ. ਨਵ ਸੰਗੀਤ ਸਿੰਘ
ਕਿਹੜੀ ਜ਼ਾਤ ਦਾ ਹੈਂ ਬਈ?
ਦਲਿਤ ਹਾਂ ਸਾਬ੍ਹ!
ਨਹੀਂ, ਮਤਲਬ ਕਿਸ ਵਿੱਚ ਆਉਂਦਾ ਹੈਂ?
ਤੁਹਾਡੀ ਗਲ਼ੀ ਵਿੱਚ ਆਉਂਦਾ ਹਾਂ।
ਗੰਦੀ ਨਾਲ਼ੀ ਵਿੱਚ ਆਉਂਦਾ ਹਾਂ।
ਅਤੇ ਅੱਡ ਕੀਤੀ ਹੋਈ ਥਾਲ਼ੀ ਵਿੱਚ ਆਉਂਦਾ ਹਾਂ ਸਾਬ੍ਹ!
ਮੈਨੂੰ ਲੱਗਿਆ, ਹਿੰਦੂ ਵਿੱਚ ਆਉਂਦਾ ਹੈਂ
ਆਉਂਦਾ ਹਾਂ ਨਾ ਸਾਬ੍ਹ!
ਪਰ ਤੁਹਾਡੀ ਚੋਣ ਵਿੱਚ।
ਕੀ ਖਾਂਦਾ ਹੈਂ ਬਈ?
ਜੋ ਇੱਕ ਦਲਿਤ ਖਾਂਦਾ ਹੈ ਸਾਬ੍ਹ!
ਨਹੀਂ, ਮਤਲਬ ਕੀ-ਕੀ ਖਾਂਦਾ ਹੈਂ?
ਤੁਹਾਥੋਂ ਮਾਰ ਖਾਂਦਾ ਹਾਂ।
ਕਰਜ਼ ਦਾ ਭਾਰ ਖਾਂਦਾ ਹਾਂ।
ਅਤੇ ਤੰਗੀ ਵਿੱਚ ਲੂਣ ਤੇ ਕਦੇ ਆਚਾਰ ਖਾਂਦਾ ਹਾਂ ਸਾਬ੍ਹ!
ਮੈਨੂੰ ਲੱਗਿਆ, ਮੁਰਗਾ ਖਾਂਦਾ ਹੈਂ
ਖਾਂਦਾ ਹਾਂ ਨਾ ਸਾਬ੍ਹ!
ਪਰ ਤੁਹਾਡੀ ਚੋਣ ਵਿੱਚ।
ਕੀ ਪੀਂਦਾ ਹੈਂ ਬਈ?
ਜੋ ਇੱਕ ਦਲਿਤ ਪੀਂਦਾ ਹੈ ਸਾਬ੍ਹ
ਨਹੀਂ, ਮਤਲਬ ਕੀ-ਕੀ ਪੀਂਦਾ ਹੈਂ?
ਛੂਤ-ਛਾਤ ਦਾ ਗ਼ਮ।
ਟੁੱਟੇ ਅਰਮਾਨਾਂ ਦਾ ਦਮ।
ਅਤੇ ਨੰਗੀਆਂ ਅੱਖਾਂ ਨਾਲ ਵੇਖਿਆ ਗਿਆ ਸਾਰਾ ਭਰਮ ਸਾਬ੍ਹ!
ਮੈਨੂੰ ਲੱਗਿਆ, ਸ਼ਰਾਬ ਪੀਂਦਾ ਹੈਂ
ਪੀਂਦਾ ਹਾਂ ਨਾ ਸਾਬ੍ਹ!
ਪਰ ਤੁਹਾਡੀ ਚੋਣ ਵਿੱਚ।
ਕੀ ਮਿਲਿਆ ਹੈ ਬਈ?
ਜੋ ਦਲਿਤਾਂ ਨੂੰ ਮਿਲਦਾ ਹੈ ਸਾਬ੍ਹ!
ਨਹੀਂ, ਮਤਲਬ ਕੀ-ਕੀ ਮਿਲਿਆ ਹੈ?
ਜ਼ਿੱਲਤ ਭਰੀ ਜ਼ਿੰਦਗੀ।
ਤੁਹਾਡੀ ਸੁੱਟੀ ਹੋਈ ਗੰਦਗੀ।
ਅਤੇ ਉਸ ਤੇ ਤੁਹਾਡੇ ਜਿਹੇ ਪਰਜੀਵੀਆਂ ਦੀ ਬੰਦਗੀ ਸਾਬ੍ਹ!
ਮੈਨੂੰ ਲੱਗਿਆ, ਵਾਅਦੇ ਮਿਲੇ ਹਨ
ਮਿਲਦੇ ਨੇ ਸਾਬ੍ਹ!
ਪਰ ਤੁਹਾਡੀ ਚੋਣ ਵਿੱਚ।
ਕੀ ਕੀਤਾ ਹੈ ਬਈ?
ਜੋ ਦਲਿਤ ਕਰਦਾ ਹੈ ਸਾਬ੍ਹ!
ਨਹੀਂ, ਮਤਲਬ ਕੀ-ਕੀ ਕੀਤਾ ਹੈ?
ਸੌ ਦਿਨ ਸੂਏ ਵਿੱਚ ਕੰਮ ਕੀਤਾ ਹੈ।
ਮੁੜ੍ਹਕੇ ਨਾਲ ਲੱਥਪੱਥ ਸਵੇਰ ਨੂੰ ਸ਼ਾਮ ਕੀਤਾ ਹੈ।
ਅਤੇ ਆਉਂਦੇ-ਜਾਂਦੇ ਠਾਕੁਰਾਂ ਨੂੰ ਸਲਾਮ ਕੀਤਾ ਸਾਬ੍ਹ!
ਮੈਨੂੰ ਲੱਗਿਆ, ਕੋਈ ਵੱਡਾ ਕੰਮ ਕੀਤਾ ਹੈ
ਕੀਤਾ ਹੈ ਨਾ ਸਾਬ੍ਹ!
ਤੁਹਾਡੀ ਚੋਣ ਦਾ ਪ੍ਰਚਾਰ...।