ਚੋਣ ਰੁਝੇਵਿਆ ਦੇ ਬਾਵਜੂਦ ਬੈਂਸ ਵੱਲੋਂ ਲੋਕ ਮਿਲਣੀ ਸਿਖਰਾਂ ਤੇ
-ਆਪਣੇ ਲੋਕਾਂ ਨੂੰ ਵੋਟਾਂ ਦੇ ਨਾਅ ਤੇ ਲਾਚਾਰ ਨਹੀ ਛੱਡ ਸਕਦਾ: ਬੈਂਸ
ਲੁਧਿਆਣਾ 19 ਜਨਵਰੀ ():- ਚੋਣਾਂ ਦਾ ਬਿਘਲ ਵੱਜਣ ਤੋਂ ਬਾਅਦ ਜਿੱਥੇ ਬਾਕੀ ਉਮੀਦਵਾਰ ਕੁਰਸੀ ਦੀ ਰੇਸ ਵਿਚ ਰੁਝ ਗਏ ਹਨ। ਉਥੇ ਹੀ ਲੁਧਿਆਣਾ ਦੇ ਵਿਧਾਇਕ ਭਰਾਵਾਂ ਦੀ ਜੋੜੀ ਸ. ਬਲਵਿੰਦਰ ਸਿੰਘ ਬੈਂਸ ਅਤੇ ਸ. ਸਿਮਰਜੀਤ ਸਿੰਘ ਬੈਂਸ ਵੱਲੋਂ ਨਿਰੰਤਰ ਚੋਣ ਮੀਟਿੰਗਾ ਦੇ ਨਾਲ ਨਾਲ ਹਰ ਰੋਜ ਦੀ ਤਰਾ ਉਹਨਾ ਦੇ ਕੋਟ ਮੰਗਲ ਸਿੰਘ ਦਫਤਰ ਵਿਖੇ ਪਹੁੰਚਣ ਵਾਲੇ ਲੋੜਵੰਦ ਅਤੇ ਬੇਸਹਾਰਾ ਲੋਕਾਂ ਲਈ ਲੋਕ ਮਿਲਣੀ ਉਸੇ ਤਰਾਂ ਨਿਰੰਤਰ ਜਾਰੀ ਹੈ। ਇਸ ਮੌਕੇ ਸਵਾਲ ਪੁੱਛੇ ਜਾਣ ਤੇ ਵਿਧਾਇਕਾਂ ਨੇ ਕਿਹਾ ਕਿ ਜਿਹੜੀ ਸੰਗਤ ਨੇ ਉਹਨਾਂ ਨੂੰ ਹਮੇਸ਼ਾ ਤੋਂ ਮਾਣ ਬਖਸ਼ ਕੇ ਵਿਧਾਨ ਸਭਾ ਚੋਣਾਂ ਜਿਤਾਈਆ ਅਤੇ ਦੋ ਵਾਰੀ ਲੋਕ ਸਭਾ ਚੋਣਾਂ ਆਜ਼ਾਦ ਲੜ ਕੇ ਵਿਰੋਧੀ ਵੱਡੀਆ ਵੱਡੀਆ ਪਾਰਟੀਆ ਮੁੱਧੇ ਮੂੰਹ ਸੁੱਟ ਦਿੱਤੀਆ, ਉਹਨਾਂ ਲੋਕਾਂ ਨੂੰ ਉਹ ਕਿਸ ਤਰਾਂ ਬੇਬਸ ਅਤੇ ਲਾਚਾਰ ਦੇਖ ਸਕਦੇ ਹਨ।ਉਹਨਾਂ ਦੱਸਿਆ ਕਿ ਕਈ ਲੀਡਰ ਚੋਣਾਂ ਮੌਕੇ ਵੱਡੀਆ ਵੱਡੀਆ ਗੱਲਾਂ ਕਰਕੇ ਵੋਟਾਂ ਭਰਮਾਉਣ ਦੀ ਕੋਸ਼ਿਸ਼ ਕਰਦੇ ਹਨ ਜਿਹਨਾਂ ਨੂੰ ਹਲਕਾ ਆਤਮ ਨਗਰ ਅਤੇ ਦੱਖਣੀ ਦੇ ਲੋਕ ਹਰ ਵਾਰੀ ਅਸਲੀਅਤ ਤੋਂ ਜਾਣੂ ਕਰਵਾ ਦਿੰਦੇ ਹਨ। ਚੋਣ ਮੁਹਿੰਮ ਬਾਰੇ ਸਵਾਲ ਪੁੱਛਣ ਤੇ ਉਹਨਾਂ ਦੱਸਿਆ ਕਿ ਮੇਰੀ ਚੋਣ ਅਤੇ ਮੇਰਾ ਪ੍ਰਚਾਰ ਲੋਕ ਖੁਦ ਆਪ ਮੁਹਾਰੇ ਹੋ ਕੇ ਕਰਦੇ ਹਨ ਇਸ ਲਈ ਲੋਕ ਇਨਸਾਫ ਪਾਰਟੀ ਦਾ ਆਪਣੇ ਹਲਕਿਆ ਵਿਚ ਕਿਸੇ ਵੀ ਪਾਰਟੀ ਜਾਂ ਉਮੀਦਵਾਰ ਨਾਲ ਕੋਈ ਮੁਕਾਬਲਾ ਨਹੀ ਹੈ। ਅਗਾਮੀ ਵਿਧਾਨ ਸਭਾ ਚੋਣਾਂ ਵਿਚ ਲੋਕ ਇਨਸਾਫ ਪਾਰਟੀ ਇਕ ਤਰਫੀ ਜਿੱਤ ਪ੍ਰਾਪਤ ਕਰਕੇ ਲੋਕਾਂ ਦੇ ਹੱਕਾਂ ਦੀ ਰਾਖੀ ਲਈ ਡਾਂਗ ਖੜਕਾਉਦੀ ਰਹੇਗੀ।