ਆਓ ਸਦਾ ਓਸ ਇਲਾਹੀ ਤਾਕਤ ਨੂੰ ਯਾਦ ਰੱਖੀਏ
ਨਾ ਓਹ ਰੱਖੇ ਕਾਗਜ਼ ਕੋਈ,ਨਾ ਹੀ ਰੱਖੇ ਕਿਤਾਬ।
ਹੈ ਨਾ ਇਹੇ ਹੈਰਾਨੀ,ਰੱਖੇ ਹਰ ਇੱਕ ਦਾ ਹਿਸਾਬ?
ਹੈ ਬੰਦੇ ਦੇ ਮਨ ਵਿੱਚ ਕੀ, ਤੇ ਕਰਨਾ ਕੀ ਓਹ ਚਾਹੁੰਦਾ,
ਅੰਦਰੋ ਅੰਦਰੀ ਆਪੇ ਈ ਓਹੋ, ਦਿੰਦਾ ਹੈ ਜਵਾਬ।
ਉਥਲ ਪੁਥਲ ਜਿਹੀ ਮੱਚਦੀ ਹੈ, ਜਦ ਬੰਦੇ ਦੇ ਅੰਦਰ,
ਫੀਤੀ ਲਾ ਕੇ ਮੋਢੇ ਉੱਤੇ,ਦਿੰਦਾ ਬਣਾ ਨਵਾਬ।
ਚਾਪਲੂਸੀ ਕਰਨ ਨਾ ਓਹੋ, ਬਿਲਕੁਲ ਕਿਸੇ ਦੀ ਜਾਣੇ,
ਮਿੱਟੀ ਵਿੱਚ ਮਿਲਾ ਦਿੰਦਾ ਹੈ,ਜੋ ਸੋਚੇ ਬੰਦਾ ਖ਼ਵਾਬ।
ਓਹਨੂੰ ਯਾਦ ਜੇ ਰੱਖੀਏ ਸਾਰੇ,ਦੁੱਖ ਨੇੜੇ ਨਾ ਆਵੇ,
ਓਹਨੂੰ ਭੁੱਲ ਕੇ ਕਦੇ ਵੀ ਨਹੀਂਓਂ, ਆਇਆ ਜਾਣਾ ਤਾਬ।
ਦੱਦਾਹੂਰੀਆ ਆਓ ਓਹਨੂੰ, ਕਦੇ ਵੀ ਮਨੋਂ ਭੁਲਾਈਏ ਨਾ,
ਦਿਲ ਵਿੱਚ ਰੱਖੀਏ ਭੈਅ ਜੇ ਉਸਦਾ, ਤਾਂ ਉਠਾ ਸਕਦੇ ਹਾਂ ਲਾਭ।
ਜਸਵੀਰ ਸ਼ਰਮਾਂ ਦੱਦਾਹੂਰ