'ਪਿਆਰ'
ਕਾਹਤੋਂ ਪਿਆਰ ਮਹਾਨ, ਜ਼ਰਾ ਦੱਸ ਖਾਂ ਕਾਹਤੋਂ ਪਿਆਰ ਮਹਾਨ ?
ਆ ਜਾ ਬਹਿ ਜਾ ਕੋਲ ਹੋ ਮੇਰੇ,
ਲੈ ਸੁਣ ਫਿਰ ਇਸ ਦੀ ਸ਼ਾਨ ।
ਕਾਹਤੋਂ ਪਿਆਰ ਮਹਾਨ ਓ ਸੱਜਣਾ ਕਾਹਤੋਂ ਪਿਆਰ ਮਹਾਨ ?
ਪਿਆਰ ਕਦੇ ਨਾ ਨਫ਼ਰਤ ਕਰਦਾ ,
ਤੱਤੀਆਂ ਤਵੀਆਂ ਤੇ ਵੀ ਸ਼ੁਕਰ ਹੈ ਕਰਦਾ ।
ਸਰਬੰਸ ਵਾਰ ਕੇ ਸਭ ਦੇ ਦੁੱਖ ਜਰਦਾ ,
ਮੂੰਹੋਂ ਫਿਰ ਵੀ ਉਫ਼ ਨਾ ਕਰਦਾ ।
ਤਾਹੀਓਂ ਪਿਆਰ ਮਹਾਨ ਓ ਸੱਜਣਾ ਤਾਹੀਓਂ ਪਿਆਰ ਮਹਾਨ ।।
ਚਰਖੜੀਆਂ ਉੱਤੇ ਭੱਜ ਜਾ ਚੜ੍ਹਦਾ ,
ਖੱਲ ਲੁਹਾ ਕੇ ਵੱਡੇ ਦੁੱਖ ਜਰਦਾ ।
ਹਸਤੀ ਆਪਣੀ ਖ਼ਾਕ ਇਹ ਕਰਦਾ ,
ਮੂੰਹੋਂ ਫਿਰ ਵੀ ਉਫ਼ ਨਾ ਕਰਦਾ ।
ਤਾਹੀਓਂ ਪਿਆਰ ਮਹਾਨ ਓ ਸੱਜਣਾ ਤਾਹੀਓਂ ਪਿਆਰ ਮਹਾਨ ।।
ਪਿਆਰ ਤਾਂ ਕੰਜਰੀ ਬਣ ਕੇ ਨੱਚਦਾ ,
ਮੁਰਸ਼ਦ ਅੱਗੇ ਘੁੰਗਰੂ ਬੰਨ੍ਹ ਮੱਚਦਾ ।
ਕੱਚਿਆਂ ਘੜਿਆਂ ਸੰਗ ਵੀ ਤਰਦਾ ,
ਮੂੰਹੋਂ ਫਿਰ ਵੀ ਉਫ਼ ਨਾ ਕਰਦਾ ।
ਤਾਹੀਓਂ ਪਿਆਰ ਮਹਾਨ ਓ ਸੱਜਣਾ ਤਾਹੀਓਂ ਪਿਆਰ ਮਹਾਨ ।।
ਬਿਰਹਾ ਦੀ ਅੱਗ ਵਿੱਚ ਰਹਿੰਦਾ ਸੜਦਾ ,
ਦੂਜਿਆਂ ਤੇ ਕਦੇ ਦੋਸ਼ ਨਾ ਮੜੵਦਾ ।
ਨਫ਼ਾ ਨੁਕਸਾਨ ਨੂੰ ਹੱਸ ਕੇ ਜਰਦਾ ,
ਮੂੰਹੋਂ ਫਿਰ ਵੀ ਉਫ਼ ਨਾ ਕਰਦਾ ।
ਤਾਹੀਓਂ ਪਿਆਰ ਮਹਾਨ ਓ ਸੱਜਣਾ ਤਾਂਹੀਓਂ ਪਿਆਰ ਮਹਾਨ ।।
ਦੁਸ਼ਮਣ ਦੇ ਵੀ ਪੱਟੀਆਂ ਕਰਦਾ ,
ਸੀਸ ਵਾਰ ਕੇ ਸਭ ਦੇ ਦੁਖ ਜਰਦਾ ।
'ਸੰਜੀਵ' ਛੱਡ ਨਫ਼ਰਤ ਚੱਖ਼ ਅਮਿ੍ਤ ਇੱਕ ਵਾਰੀ ,
ਫੇਰ ਪਿਆਰ ਦਾ ਵੇਖੀਂ ਕਿਵੇਂ ਮੀਂਹ ਵਰ੍ਹਦਾ ।
ਤਾਹੀਓਂ ਪਿਆਰ ਮਹਾਨ ਓ ਝੱਲਿਆ ਤਾਹੀਓਂ ਪਿਆਰ ਮਹਾਨ ।।
ਸੰਜੀਵ ਅਰੋੜਾ ( ਲੈਕਚਰਾਰ )