ਅੱਧੀ ਧਰਤੀ
ਹਾਂ ਕੁਦਰਤ ਦੀ ਦਾਤ ਅਸੀਂ ਵੀ,
ਜੀਵਨ ਜਿਉਣਾ ਚਾਹੀਏ ਹੂ।
ਚਾਰ ਚੁਫੇਰੇ ਫਿਰਨ ਭੇੜੀਏ,
ਕਿੱਦਾਂ ਮਾਸ ਬਚਾਈਏ ਹੂ।
ਚੰਮ ਦੇ ਭੁੱਖੇ, ਅੱਤ ਦੇ ਲੋਭੀ,
ਦਿਸਦੇ ਢੇਰ ਸਿਆਣੇ ਪਰ,
ਭੇਖੀ ਲਾਣੇ ਦੇ ਭੇਖਾਂ ਦੀ,
ਮਿਲ ਕੇ ਝੰਡ ਲੁਹਾਈਏ ਹੂ।
ਗੰਦ ਦਿਮਾਗ਼ਾਂ ਦੇ ਵਿਚ ਭਰਿਆ,
ਜਿੱਥੇ ਵੀ ਦਿਲ ਕਰਦਾ ਥੁੱਕਣ,
ਪਲ ਵਿਚ ਲੱਗੇ ਸਮਝ ਅਸਾਨੂੰ,
ਸਿੱਧੀ ਆਖ ਸੁਣਾਈਏ ਹੂ।
ਅੱਧੀ ਧਰਤੀ ਤੇ ਹੱਕ ਸਾਡਾ,
ਤੇ ਜੀਵਨ ਵੀ ਸਾਡਾ ਹੈ,
ਕਾਹਤੋਂ ਅਪਣਾ ਆਪ ਛੁਪਾ ਕੇ,
ਸਾਰੀ ਅਉਧ ਲੰਘਾਈਏ ਹੂ।
'ਰਾਜਨ' ਹੁਣ ਤੂੰ ਦੁਰਗਾ ਬਣ ਕੇ,
ਹੱਥੀਂ ਸਾਂਭ ਕਟਾਰੀ ਕਾਨੀ,
ਇਕ ਇਕ ਕਰ ਕੇ ਪਾਜ ਉਘਾੜੋ,
ਐਵੇਂ ਨਾ ਸ਼ਰਮਾਈਏ ਹੂ।
ਰਾਜਨਦੀਪ ਕੌਰ ਮਾਨ