ਚੰਡੀਗੜ੍ਹ ਦੇ ਹੋਟਲ ਮੈਟਰੋ ਵਿਖੇ ਪੰਜਾਬੀ ਫ਼ਿਲਮ ‘ਓਹ ਕੁੜੀ’ ਦਾ ਪੋਸਟਰ ਰਿਲੀਜ਼ ਕੀਤਾ ਗਿਆ
ਇੰਜੀ. ਹਰਬੰਸ ਸਿੰਘ ਕੁਲਾਰ ਦੇ ਕੁਲਾਰ ਪ੍ਰੋਡਕਸ਼ਨਸ, ਪਟਿਆਲਾ ਦੇ ਬੈਨਰ ਹੇਠ ਨੌਜਵਾਨ ਨਿਰਦੇਸ਼ਿਕ ਦੇਵੀ ਸ਼ਰਮਾ ਦੀ ਨਿਰਦੇਸ਼ਨਾ ਵਿਚ ਬਣੀ ਇਸ ਫ਼ਿਲਮ ਦੇ ਪੋਸਟਰ ਰਿਲੀਜ਼ ਦੀ ਇਹ ਰਸਮ ਮੁੰਬਈ ਤੋਂ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਪ੍ਰੋਡਿਊਸਰ ਡਾਇਰੈਕਟਰ ਕੁਲਜੀਤ ਸਿੰਘ ਮਲਹੋਤਰਾ ਤੇ ਪ੍ਰਸਿੱਧ ਅਦਾਕਾਰ ਹਰਜੀਤ ਵਾਲੀਆ ਨੇ ਨਿਭਾਈ। ਇਸ ਦੌਰਾਨ ਉਨ੍ਹਾਂ ਨਾਲ ਫ਼ਿਲਮ ਦਾ ਹੀਰੋ ਮਨਦੀਪ ਸਿੰਘ ਸਿੱਧੂ, ਹੀਰੋਇਨ ਪਰਵੀਨ ਬਾਣੀ, ਬਲਕਾਰ ਸਿੱਧੂ, ਮੰਗਤ ਗਰਗ, ਮਨਪ੍ਰੀਤ ਕੌਰ, ਹਰਦੀਪ ਕੌਰ ਖਾਲਸਾ, ਜਸਬੀਰ ਗੋਰਾ ਡੀ ਓ ਪੀ, ਬਲਜਿੰਦਰ ਦਾਰਾਪੁਰੀ, ਗਗਨਦੀਪ ਸਿੰਘ ਗੁਰਾਇਆ, ਹਰਬੰਸ ਸਿੰਘ ਕੁਲਾਰ, ਨਿਰਦੇਸ਼ਕ ਦੇਵੀ ਸ਼ਰਮਾ ਆਦਿ ਮੌਜੂਦ ਸਨ। ਨਿਰਮਾਤਾ ਕੁਲਾਰ ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਫ਼ਿਲਮ ਦੀ ਰਿਲੀਜ਼ ਤੋਂ ਬਾਅਦ ਮੈਂ ਆਪਣੀ ਨਵੀਂ ਪੰਜਾਬੀ ਫ਼ਿਲਮ ਜੋ ਮੇਰੀ ਆਪਣੀ ਲਿਖੀ ਕਹਾਣੀ ’ਤੇ ਆਧਾਰਿਤ ਹੈ ਬਹੁਤ ਛੇਤੀ ਸ਼ੁਰੂ ਕਰਨ ਜਾ ਰਿਹਾ ਹਾਂ। ਨਿਰਦੇਸ਼ਕ ਦੇਵੀ ਸ਼ਰਮਾ ਨੇ ਆਖਿਆ ਕਿ ਮੈਨੂੰ ਕੁਲਾਰ ਸਾਹਬ ਨਾਲ ਪਹਿਲਾ ਪ੍ਰੋਜੈਕਟ ਕਰ ਕੇ ਬਹੁਤ ਵਧੀਆ ਲੱਗਿਆ। ਅਦਾਕਾਰ ਹਰਜੀਤ ਵਾਲੀਆ ਨੇ ਕਿਹਾ ਕਿ ਹੁਣ ਸਾਡਾ ਪੰਜਾਬੀ ਸਿਨਮਾ ਤਰੱਕੀ ਦੀਆਂ ਲੀਹਾਂ ’ਤੇ ਹੈ। ਰੱਬ ਕਰੇ ਕੇ ਸਾਡਾ ਸਿਨਮਾ ਹੋਰ ਤਰੱਕੀ ਕਰੇ ਤੇ ਕੁਲਾਰ ਪ੍ਰੋਡਕਸ਼ਨਸ ਦੀ ਪਹਿਲੀ ਪੰਜਾਬੀ ਫ਼ਿਲਮ ‘ਉਹ ਕੁੜੀ’ ਸੁਪਰਹਿੱਟ ਹੋਵੇ। ਉਨਾਂ ਨੌਜਵਾਨ ਫ਼ਿਲਮ ਇਤਿਹਾਸਕਾਰ ਤੇ ਅਦਾਕਾਰ ਮਨਦੀਪ ਸਿੱਧੂ ਤੇ ਅਦਾਕਾਰਾ ਪਰਵੀਨ ਬਾਣੀ ਤੋਂ ਵੀ ਪੰਜਾਬੀ ਸਿਨਮਾ ਦੀ ਬਿਹਤਰ ਆਸ ਪ੍ਰਗਟਾਈ।
----------------------------------------------
ਮੰਗਤ ਗਰਗ, ਬਠਿੰਡਾ