ਪਟਿਆਲਾ ਵਿਖੇ ਪੰਜਾਬੀ ਫ਼ਿਲਮ ‘ਉਹ ਕੁੜੀ’ ਦਾ ਪੋਸਟਰ ਰਿਲੀਜ਼
ਇੰਜੀ. ਹਰਬੰਸ ਸਿੰਘ ਕੁਲਾਰ ਦੇ ਕੁਲਾਰ ਪ੍ਰੋਡਕਸ਼ਨਸ, ਪਟਿਆਲਾ ਦੇ ਬੈਨਰ ਹੇਠ ਨੌਜਵਾਨ ਨਿਰਦੇਸ਼ਿਕ ਦੇਵੀ ਸ਼ਰਮਾ ਦੀ ਨਿਰਦੇਸ਼ਨਾ ਵਿਚ ਬਣੀ ਪਹਿਲੀ ਪੰਜਾਬੀ ਫ਼ਿਲਮ ‘ਉਹ ਕੁੜੀ’ ਦਾ ਪੋਸਟਰ ਕੱਲ੍ਹ ਨਿਰਮਾਤਾ ਹਰਬੰਸ ਸਿੰਘ ਕੁਲਾਰ ਦੇ ਗ੍ਰਹਿ ਵਿਖੇ ਰਿਲੀਜ਼ ਕੀਤਾ ਗਿਆ। ਪੋਸਟਰ ਰਿਲੀਜ਼ ਦੀ ਇਹ ਰਸਮ ਪ੍ਰਸਿੱਧ ਅਦਾਕਾਰ ਤੇ ਨਿਰਦੇਸ਼ਿਕ ਗਿਰਜਾ ਸ਼ੰਕਰ (ਮਹਾਂਭਰਤ ਚਰਚਿੱਤ) ਨੇ ਨਿਭਾਈ। ਇਸ ਦੌਰਾਨ ਉਨ੍ਹਾਂ ਨਾਲ ਫ਼ਿਲਮ ਦਾ ਹੀਰੋ ਮਨਦੀਪ ਸਿੰਘ ਸਿੱਧੂ, ਹੀਰੋਇਨ ਪਰਵੀਨ ਬਾਣੀ, ਹਰਬੰਸ ਸਿੰਘ ਕੁਲਾਰ, ਨਿਰਦੇਸ਼ਕ ਦੇਵੀ ਸ਼ਰਮਾ ਆਦਿ ਮੌਜੂਦ ਸਨ। ਨਿਰਮਾਤਾ ਕੁਲਾਰ ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਫ਼ਿਲਮ ਦੀ ਰਿਲੀਜ਼ ਤੋਂ ਬਾਅਦ ਮੈਂ ਆਪਣੀ ਨਵੀਂ ਪੰਜਾਬੀ ਫ਼ਿਲਮ ਜੋ ਮੇਰੀ ਆਪਣੀ ਲਿਖੀ ਕਹਾਣੀ ’ਤੇ ਆਧਾਰਿਤ ਹੈ ਬਹੁਤ ਛੇਤੀ ਸ਼ੁਰੂ ਕਰਨ ਜਾ ਰਿਹਾ ਹਾਂ। ਨਿਰਦੇਸ਼ਕ ਦੇਵੀ ਸ਼ਰਮਾ ਨੇ ਆਖਿਆ ਕਿ ਮੈਨੂੰ ਕੁਲਾਰ ਸਾਹਬ ਨਾਲ ਪਹਿਲਾ ਪ੍ਰੋਜੈਕਟ ਕਰ ਕੇ ਬਹੁਤ ਵਧੀਆ ਲੱਗਿਆ। ਅਦਾਕਾਰ ਗਿਰਜਾ ਸ਼ੰਕਰ ਨੇ ਕਿਹਾ ਕਿ ਹੁਣ ਸਾਡਾ ਪੰਜਾਬੀ ਸਿਨਮਾ ਤਰੱਕੀ ਦੀਆਂ ਲੀਹਾਂ ’ਤੇ ਹੈ। ਰੱਬ ਕਰੇ ਕੇ ਸਾਡਾ ਸਿਨਮਾ ਹੋਰ ਤਰੱਕੀ ਕਰੇ ਤੇ ਕੁਲਾਰ ਪ੍ਰੋਡਕਸ਼ਨਸ ਦੀ ਪਹਿਲੀ ਪੰਜਾਬੀ ਫ਼ਿਲਮ ‘ਉਹ ਕੁੜੀ’ ਸੁਪਰਹਿੱਟ ਹੋਵੇ। ਉਨਾਂ ਨੌਜਵਾਨ ਫ਼ਿਲਮ ਇਤਿਹਾਸਕਾਰ ਤੇ ਅਦਾਕਾਰ ਮਨਦੀਪ ਸਿੱਧੂ ਤੇ ਅਦਾਕਾਰਾ ਪਰਵੀਨ ਬਾਣੀ ਤੋਂ ਵੀ ਪੰਜਾਬੀ ਸਿਨਮਾ ਦੀ ਬਿਹਤਰ ਆਸ ਪ੍ਰਗਟਾਈ। ਇਸ ਦੌਰਾਨ ਨਿਰਮਾਤਾ ਹਰਬੰਸ ਸਿੰਘ ਕੁਲਾਰ ਵੱਲੋਂ ਪੋਸਟਰ ਰਿਲੀਜ਼ ਦੀ ਖ਼ੁਸ਼ੀ ਵਿਚ ਆਪਣੀ ਫ਼ਿਲਮ ਟੀਮ ਨੂੰ ਮੋਹਨ ਕਾਂਟੀਨੈਂਟਲ ਹੋਟਲ, ਪਟਿਆਲਾ ਵਿਚ ਸੈਲੀਬ੍ਰੇਸਨ ਪਾਰਟ ਵੀ ਦਿੱਤੀ ਗਈ।
ਮੰਗਤ ਗਰਗ, ਬਠਿੰਡਾ