ਡੇਰਾ ਬਾਬਾ ਗਾਂਧਾ ਸਿੰਘ ਦੀ ਵਿਵਾਦਤ ਜਮੀਨ ਤੇ ਲੱਗ ਸਕਦੀ 145, ਫੈਸਲਾ ਐਸ ਡੀ ਐਮ ਦੇ ਹੱਥ,ਪੁਲਿਸ ਨੇ ਦੋਵੇ ਧੜਿਆਂ ਨੂੰ ਕੱਢਿਆ ਬਾਹਰ, ਮਹੰਤ ਪਿਆਰਾ ਸਿੰਘ ਨੇ ਕਿਹਾ ਕਿ ਇਹ ਜਮੀਨ ਡੇਰੇ ਦੀ ਮਾਲਕੀ
ਬਰਨਾਲਾ 5 ਮਈ (ਬਘੇਲ ਸਿੰਘ ਧਾਲੀਵਾਲ) ਡੇਰਾ ਬਾਬਾ ਗਾਂਧਾ ਸਿੰਘ ਦੀ ਪੰਜ ਕਨਾਲ ਪੰਜ ਮਰਲੇ ਆਵਾ ਬਸਤੀ ਵਾਲੀ ਜਮੀਨ ਤੋ ਦੋਨੋ ਧਿਰਾਂ ਡੇਰਾ ਬਾਬਾ ਗਾਂਧਾ ਸਿੰਘ ਵੱਲੋਂ ਆਵਾ ਵਸਤੀ ਵਾਲੇ ਮੁਹੱਲਾ ਨਿਵਾਸੀਆਂ ਅਤੇ ਸਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੁਲਾਜਮਾਂ ਨੂੰ ਵਿਵਾਦਤ ਜਮੀਨ ਚੋ ਬਾਹਰ ਕਰਕੇ ਪੁਲਿਸ ਨੇ ਉਕਤ ਜਮੀਨ ਆਪਣੇ ਕੰਟਰੋਲ ਵਿੱਚ ਲੈ ਲਈ ਹੈ।ਤਹਿਸੀਲਦਾਰ ਬਰਨਾਲਾ ਵੱਲੋਂ ਝਗੜੇ ਵਾਲੀ ਥਾਂ ਤੇ ਪਹੁੰਚ ਕੇ ਥਾਣਾ ਸਿਟੀ 1 ਦੇ ਐਸ ਐਚ ਓ ਜਸਵਿੰਦਰ ਸਿੰਘ ਨੂੰ ਰੌਲੇ ਵਾਲੀ ਜਮੀਨ ਵਿੱਚੋਂ ਦੋਵਾਂ ਧਿਰਾਂ ਨੂੰ ਬਾਹਰ ਕਰਕੇ ਕੰਡਿਆਲੀ ਤਾਰ ਲਾਕੇ ਲਾਂਘਾ ਬੰਦ ਕਰਨ ਦੀ ਤਾਕੀਦ ਕੀਤੀ ਗਈ ਹੈ।ਇਸ ਕਾਰਵਾਈ ਸਬੰਧੀ ਉਹਨਾਂ ਦੱਸਿਆ ਕਿ ਬਰਨਾਲਾ ਪੁਲਿਸ ਵੱਲੋਂ ਮਾਣਯੋਗ ਐਸ ਡੀ ਐਮ ਸਾਹਿਬ ਬਰਨਾਲਾ ਨੂੰ ਵਿਵਾਦਤ ਜਮੀਨ ਤੇ ਲੜਾਈ ਝਗੜਾ ਹੋਣ ਦੇ ਖਦਸੇ ਸਬੰਧੀ ਲਿਖ ਕੇ ਭੇਜ ਦਿੱਤਾ ਸੀ,ਜਿਸ ਦੀ ਸੁਣਵਾਈ 14 ਮਈ ਨੂੰ ਹੋਵੇਗੀ।ਉਸ ਦਿਨ ਦੋਨੋਂ ਧਿਰਾਂ ਦਾ ਪੱਖ ਸੁਨਣ ਤੋ ਬਾਅਦ ਐਸ ਡੀ ਐਮ ਸਾਹਿਬ ਫੈਸਲਾ ਦੇਣਗੇ। ਉਦੋਂ ਤੱਕ ਅਮਨ ਕਨੂੰਨ ਦੀ ਹਾਲਤ ਨੂੰ ਕਾਬੂ ਵਿੱਚ ਰੱਖਣ ਲਈ ਦੋਵਾਂ ਧਿਰਾਂ ਨੂੰ ਉਠਾ ਕੇ ਜਮੀਨ ਵਿੱਚ ਦਾਖਲਾ ਰੋਕ ਦਿੱਤਾ ਗਿਆ ਹੈ।ਜਿਕਰਯੋਗਹੈ ਕਿ ਉਕਤ ਵਿਵਾਦਤ ਜਮੀਨ ਡੇਰਾ ਬਾਬਾ ਗਾਂਧਾ ਸਿੰਘ ਦੀ ਮਲਕੀਅਤ ਹੈ,ਜਿਸ ਨੂੰ ਪਿਛਲੇ ਸਮਝੌਤਿਆਂ ਦੀ ਆੜ ਵਿੱਚ ਸਰੋਮਣੀ ਕਮੇਟੀ ਵੱਲੋਂ ਉਕਤ ਜਮੀਨ ਲੀਜ ਤੇ ਦੇ ਦਿੱਤੀ ਗਈ ਸੀ ਅਤੇ ਸਬੰਧਤ ਪਾਰਟੀ ਨੇ ਉਸਾਰੀ ਵੀ ਸੁਰੂਕਰ ਦਿੱਤੀ ਸੀ,ਪਰ ਡੇਰਾ ਬਾਬਾ ਗਾਂਧਾ ਸਿੰਘ ਦੇ ਮੁਖੀ ਮਹੰਤ ਪਿਆਰਾ ਸਿੰਘ ਨੂੰ ਸਮੇ ਸਿਰ ਪਤਾ ਲੱਗ ਜਾਣ ਕਾਰਨ ਉਹਨਾਂ ਨੇ ਉੱਥੇ ਕੀਤੀ ਜਾ ਰਹੀ ਉਸਾਰੀ ਨੂੰ ਰੁਕਵਾ ਕੇ ਪੁਲਿਸ ਅਤੇ ਐਸ ਡੀ ਐਮ ਬਰਨਾਲਾ ਨੂੰ ਦਰਖਾਸਤਾਂ ਦੇ ਦਿੱਤੀਆਂ ਸਨ। ਸਰੋਮਣੀ ਕਮੇਟੀ ਵੱਲੋਂ ਵੀ ਪੁਲਿਸ ਰਾਹੀ ਉਕਤ ਜਮੀਨ ਦਾ ਕਬਜਾ ਲੈਣ ਲਈ ਚਾਰਾਜੋਈ ਕੀਤੀ ਗਈ ਸੀ,ਪਰ ਕਾਮਯਾਬ ਨਹੀ ਸੀ ਹੋ ਸਕੀ। ਉਸ ਦਿਨ ਤੋ ਹੀ ਉੱਥੇ ਦੋਵੇਂ ਧਿਰਾਂ ਡੇਰਾ ਜਮਾਕੇ ਬੈਠ ਬਈਆਂ ਸਨ।ਦੱਸਣਾ ਬਣਦਾ ਹੈ ਕਿ ਬਾਬਾ ਪਿਆਰਾ ਸਿੰਘ ਮੁਢਲੇ ਦਿਨਾਂ ਤੋ ਹੀ ਥਾਣਾ ਸਿਟੀ 1 ਦੇ ਐਸ ਐਚ ਓ ‘ਤੇ ਦੂਜੀ ਧਿਰ ਦਾ ਪੱਖ ਪੂਰਨ ਦਾ ਦੋਸ਼ ਵੀ ਲਾ ਰਹੇ ਹਨ।ਪਰ ਹੁਣ ਧਾਰਾ 145 ਦੀਆਂ ਸੰਭਾਵਨਾਵਾਂ ਨੇ ਸਮੀਕਰਨ ਬਦਲ ਦਿੱਤੇ ਹਨ।ਇਸ ਜਮੀਨ ਤੋ ਛਿੜੇ ਵਿਵਾਦ ਕਾਰਨ ਭੇਖ ਵੀ ਹਰਕਤ ਵਿੱਚ ਆ ਗਿਆ ਸੀ।ਪੰਚਾਇਤੀ ਅਖਾੜਾ ਨਿਰਮਲ ਭੇਖ ਕਨਖਲ ਹਰਿਦੁਆਰ ਅਤੇ ਪ੍ਰਾਚੀਨ ਨਿਰਮਲ ਮਹਾਂ ਮੰਡਲ ਸਮੇਤ ਨਿਰਮਲ ਭੇਖ ਦੇ ਵੱਡੀ ਗਿਣਤੀ ਵਿੱਚ ਸੰਤ ਮਹਾਂ ਪੁਰਖ ਡੇਰਾ ਬਾਬਾ ਗਾਂਧਾ ਸਿੰਘ ਬਰਨਾਲਾ ਵਿੱਚ ਮਹੰਤ ਪਿਆਰਾ ਸਿੰਘ ਦੇ ਹੱਕ ਵਿੱਚ ਇਕੱਤਰ ਹੋ ਗਏ ਸਨ| ਇਸ ਮਸਲੇ ਸਬੰਧੀ ਕੀਤੀ ਪ੍ਰੈਸ ਕਾਨਫਰੰਸ ਦੌਰਾਨ ਪੱਤਰਕਾਰਾਂ ਨਾਲ ਰੂਬਰੂ ਹੁੰਦਿਆਂ ਪੰਚਾਇਤੀ ਨਿਰਮਲ ਅਖਾੜਾ ਰਜਿ: ਕਨਖਲ (ਹਰਿਦੁਆਰ) ਦੇ ਕੋਠਾਰੀ ਮਹੰਤ ਜਸਵਿੰਦਰ ਸਿੰਘ ਨੇ ਸਾਰੇ ਮਾਮਲੇ ਦੀ ਵਿਸਥਾਰ ਪੂਰਵਕ ਜਾਣਕਾਰੀ ਦਿੰਦਿਆਂ ਦੱਸਿਆ ਸੀ ਕਿ ਸੁਪਰੀਮ ਕੋਰਟ ਵੱਲੋਂ ਅਤੇ ਮਾਨਯੋਗ ਪੰਜਾਬ ਹਰਿਆਣਾ ਹਾਈਕੋਰਟ ਵੱਲੋਂ ਇਹ ਫੈਸਲਾ ਹੋ ਚੁੱਕਾ ਹੈ ਕਿ ਸ੍ਰੋ.ਗੁ.ਪ੍ਰਬੰਧਕ ਕਮੇਟੀ ਦਾ ਡੇਰਾ ਬਾਬਾ ਗਾਂਧਾ ਸਿੰਘ ਦੀ ਜਾਇਦਾਦ ਨਾਲ ਕੋਈ ਤੁਅੱਲਕ ਵਾਸਤਾ ਨਹੀਂ | ਸ੍ਰੋਮਣੀ ਕਮੇਟੀ ਨੇ ਪੰਜਾਬ ਹਰਿਆਣਾ ਹਾਈਕੋਰਟ ਦੇ ਉਕਤ ਫੈਸਲੇ ਖਿਲਾਫ਼ ਜੋ ਅਪੀਲ ਮਾਨਯੋਗ ਸੁਪਰੀਮ ਕੋਰਟ 'ਚ ਕੀਤੀ ਸੀ, ਉਹ ਵਾਪਸੀ ਰੂਪ ਵਿਚ ਮਿਤੀ 15/12/23 ਨੂੰ ਖਾਰਜ ਹੋ ਚੁਕੀ ਹੈ | ਸੋ ਉਪਰੋਕਤ ਦੇ ਸੰਦਰਭ ਵਿਚ ਸ੍ਰੋਮਣੀ ਕਮੇਟੀ ਨੂੰ ਡੇਰੇ ਦੀ ਕਿਸੇ ਵੀ ਜਾਇਦਾਦ 'ਤੇ ਕਿਸੇ ਵੀ ਤਰ੍ਹਾਂ ਦਾ ਹੱਕ ਜਤਾਉਣ ਦਾ ਕੋਈ ਹੱਕ ਨਹੀ | ਉਨ੍ਹਾਂ ਕਿਹਾ ਕਿ ਅਦਾਲਤਾਂ ਵਿੱਚੋਂ ਮਾਤ ਖਾ ਜਾਣ ਤੋ ਬਾਅਦ ਸ੍ਰੋਮਣੀ ਕਮੇਟੀ ਨੇ ਬਾਬਾ ਗਾਂਧਾ ਸਿੰਘ ਦੀ ਜਾਇਦਾਦ ਨੂੰ ਹੜੱਪਣ ਲਈ ਜੋ ਕੁੱਝ ਵਿਅਕਤੀਆਂ ਨੂੰ ਅੱਗੇ ਲਾ ਕੇ ਨਿਰਮਲ ਭੇਖ ਦਾ ਗੈਰ ਕਨੂੰਨੀ ਢੰਗ ਨਾਲ ਨਵਾਂ ਧੜਾ ਖੜਾ ਕਰਕੇ ਉਹਦੇ ਨਾਲ 37/63 ਦੇ ਸਮਝੌਤਾ ਕੀਤਾ ਹੈ,ਉਹ ਬਿਲਕੁਲ ਹੀ ਗੈਰ ਕਨੂੰਨੀ ਅਤੇ ਫਰਾਡ ਹੈ |